Toetra RAJA

I KALATIAKO

I Kalakely
Moa amiko
No tantely
Fy sy mamiko !

Tsy mba foiko
Tokoa
Ka antsoiko
Hoe i Kalasoa !

Nefa injao
Izy tsy hita;
Sahy nandao
I Kalangita !

Lavitra ahy
Ilay malala,
Tsy izy va
No i Kaladala ?

Atsy ho atsy
Izy indray
No i Kalaratsy
Mpanafay ?

(...)

Fa na ngita
Sady petaka
Tsy hita
I Kalaketaka :

D’izy ange
No i Kalatiako
Na mahabe
Ny fahoriako !

Toetra RAJA
26 mey 2005

LOKILOKY

Andro hariva
Tsisy olana
Efa hadiva
Ho diavolana,
An-kodimiran'
Arabe ...
Miramirana
Tarehy
Izato ianao
Lokiloky
Milalao
Tsy mety voky
Sy tsy tola
Fa vao maika
Miangola
Sy milaika.

Sarin-teny
No lalao
Izy ireny
No atao
Mampiontana
Fanahy
Manamontsana
Ahiahy

Sarin-teny
No lalao
Izy ireny
No atao
Mampiontana
Fanahy
Manamontsana
Ahiahy.

Lokiloky

H'aho ianao,

Tena toky

Tsotra izao;

Misamonta

Koa ny foko

Ka miatonta

Ny toloko,

Ny endri-tava

Dia midika

Fa mazava

Ny amintsika.

“Rahampitso

Raha toa

Tsy hahadiso

Fa hahasoa :

Moa mety

Raha mihaona

Vetivety,

Sa ahoana ? "

Ny varavarana

Efa akaiky,

Ka iarahana

Manaiky

Fa ilaina

Koa ny alina

Hampisaina

Zava-dalina.

Toetra RAJA

10 novambra 2004

R.A. : Hazavao ny anton'ny nisafidiananao ny teny hoe an-kodimirana ?

T.R. : Ny "an-kodimirana" dia manambara fiholahan-dàlana, izany hoe rehefa mandao azy ny olona dia tsy ho tazana intsony. Nampiasaina mialoha io teny io ny "hadiva ho diavolana". Samy entina maneho fiovan-tsehatra tazana izy ireo na ny marimarina kokoa angaha dia fitrangan'ny seho manaraka ho avy. Amin’ny sarimihetsika sy tantara andampihazo dia hita maso izany. Ny tena marina dia miditra amin’ny dingana manaraka ireto olon-droa miroso amin’ny fitiavana ireto amin’ny fotoana anateran-dratovolahy an-drazazavavy any amin’ny fonenany.

RAKI-TSARY

Ny nahitako
Azy farany,
Nanakoako
Ny anarany
Tao an-tsofiko
Ela tao ...
Zary nofiko
Izy izao !

Efapolo
Taona lasa
Ny tontolo
Io mandatsa !
Raki-tsary
Maromaro
No manjary
Voatsiaro.

Tovovavy
Iray bikana
Indro avy
Nigagana
Volo kanto
Voamboatra
Sy milanto
Tsara loatra !
Izato bika
Sy tarehy
Mampihiaka
Mafy hoe :

"Iza moa
Ianao
No dia soa
Tahak'izao
Sy tomady
Fianteherana
No sady
Fanaperana ? "

Anio anefa
Dia FOANA
Izay efa
Fa ireo taona
Efapolo
No nandoto
Ireo volo
Misafoto
Mampihataka
Borosy
He misasaka
Ny fotsy !
Mangoraka

Aho fa aoka !
Miroraka
Ny saoka
Mikentrona
Tarehy
Botrefona
Fandeha !

Ary izaho
Moa no loza !
Mitalaho
Mitavoza
Sy sola
Efa koaka
No tola
Mampitsoaka
Tsy hahajery
Izay fitaratra
Fa miery
Raha miharatra;
He mihena
Hoza-pe
Mivembena
Raha mandeha !

Dia misaotra
ry Nahary
Nanamboatra
Raki-tsary
Voaraikitra
Ao an-tsaina ;
Mety hanaikitra
Ny aina
Ho afero
Saingy ilaina
Mba ho vero,
… Mampisaina !

Toetra RAJA
06 janoary 2005

OROKA

Atolotro

Ny molotro

Ho tantely

Miely

Hankao

Anatinao;

Hitety

Izay mety

Mafampàna

Ahitàna

Lalan-drà

Mba hizaha

Ka hanoro

An’izay mangoro

Vitsika

Ary hibitsika

Ireo rindra

Hafa indrindra.

Atolotro

Ny molotro

Hifoka

Sy higoka

Ny ramy

Sy ny mamy

Avy ao

Anatinao;

Hisangisangy

Hamangy

Ao an-doha

Ao am-po

Ao anatiko

Tsy tantiko !

Ny molotra

Atolotra

No santatra

Mamantatra

Ny saha :

Fa fanahy

No antsoina

Mba hanohina...

Satria

Ny fitia

Dia ny FO

Iray tsy roa.

Toetra RAJA

23 martsa 1996

______________________________________________

LANJAM-PITIA

Iry lasa iry
Olona iray
Milanja fitia
Tsisy mpandray !

Sady mibaby
Fola-damosina
Be mpanaraby
Hila hitrosona !

Kaody fijoro
Osa dia osa,
Fo torotoro
Maty voafosa !

Ela ny ela,
Nilefitra ihany,
Sisa tavela
... Raraka an-tany !

Lalana mody
Atao anton-dia,
Aza manody
Ny lanjam-pitia !

Toetra RAJA
15 jolay 2007

DOBO MANGA ROA
Tany an-toerana
Nombako
Niserana
No nahitako
Dobo manga
Roa miery
Naharanga
Ny fijery.
Na fihinin'
Ny zozoro
Hodidininy
Tsy atoro
Dia tsikaritra
Ihany
Nahafinaritra
Aok'izany :
Voaloko
Kanto ery
Mampifoko
Foko tia
Sady vita
Nanahary
Tsy fahita
Amin'ny sary
Ao an-tsaha
Meva ery
Tena maha
Te ho tia !
Miramiram-
Pahadiovana
Andosiram-
Pahalovana.
Satry hatrany
Ho bikaina
Ny hatsarany
Mampisaina !
(...)
Dia ny masonao
Baliaka
Tsilalao
Manjopiaka
Dia ny masonao
Topazana
Satry atao
Fiantsampazana
Mahatamana
Ny fijery
Misy mana
Soa miery
Any an-tany
Lavitr'olona
"Ny androany
Tsy fitolona"
Tena tsotra
Fitadiavana ;
Mipololotra
Ny fitiavana.
Hivavahana
Tokoa
Iatahan-
Java-do :
Dia ny lobo-
Lobom-po
Misetra dobo
Manga roa !
Toetra RAJA
18 janoary 2008

TONONKALO

RAKIBOLANA

GAZETY

ANDALAN-TENY

Andalan-teny
Tongatonga
Ho azy teny
No nanonga ;

Ka nanjary
Voakaly
Voarary
Hampifaly !

Nokoloina
Ary indrindra
Nolokoina
Mba hirindra,

Hierinerina
An-kavoana
Averimberina
Eny foana.

25 jolay 2007

DINITRA POETA

Dinitra
Poeta
No rihitra
Irafetan'
Ny kolo
Manoloana
Ny tolom-
Pandrosoana !

... Hitete
Tsy hiato,
Na hoe
Vy sy vato,
Hampiray
Hanova bika
An'ilay
Tanintsika.

(...)

Areniko
Ny tany
Amin’ny teniko
Tsy ambany !

19 jona 2005

andalan-teny tongatonga ho azy teny no nanonga