Sanctvs Petrvs Apostolvs Birzebbvgae Patronvs

Birżebbuġa

Kitba ta' Christ Bonnici

Xieraq li biex nibdew l-informazzjoni dwar il-festa titulari tal-Parroċċa tagħna, billi nagħtu ħarsa ħafifa lejn Birżebbuġa. B’ hekk, għażiż/a qarrej/ja tkun taf dwar is-subborg li dwaru qed nitħaddtu. 

Hekk kif wieħed ikun riesaq lejn in-naħa ta’ isfel ta’ Malta, jilmaħ subborg, subborg antik, u għani fiċ-ċivilta`. Biżżejjed insemmu li fil-konfini ta’ Birżebbuġa, konna niltaqgħu ma’ Villa Rumana, bosta Fortifikazzjonijiet, Tempju ta’ Melqart, Borġ in-Nadur, u Għar Dalam. Minħabba li jekk nagħtu informazzjoni fuq kull forma ta’ ċiviltà fl-imgħoddi li nsibu f’ raħalna, nieħdu sit sħiħ, u minħabba li dan is-sit, kif diġa aċċennajna, hu marbut partikolarment mal-festa u l-armar tal-festa tagħna, ma aħniex ser nidħlu fid-dettal dwar dawn. Inkiteb bosta dwar dawn l-opri hekk interessanti li nsibu f’ raħalna. Però, minn hawn, inħeġġu lilkom qarrejja biex jekk għadkom qatt ma żortu dawn il-postijiet, ikun għaqli li żżuruhom malajr kemm jista’ jkun, ħalli lkoll nammiraw il-patrimonju Malti.

Konna qed naċċennaw lejn is-subborg li jokkupa parti sewwa min-naħa ta’ isfel ta’ Malta. Birżebbuġa tinsab bogħod mill-belt kwazi għaxar kilometri, u għandha bosta mkejjen. Fost l-oħrajn, insibu Kalafrana, il-Batterija ta’ Pinto, Wied il-Buni, il-Bajja ta’ San Ġorġ, Bingħisa, u fuq kollox il-famuża Bajja s-Sabiħa.

Qegħdin ngħidu li teżisti evidenza, li Birżebbuġa kienet diġa abitata fi żmien l-imgħoddi. Madankollu, kien għad fadal ferm biex raħalna jinqata’ mill-Parroċċi Matriċi bħala parroċċa għalih. Dan minħabba li Birżebbuġa kienet abitata partikolarment fis-sajf. Kienet mitqiesa bħala post fejn wieħed jinżel għall-mistrieħ, fil-villeġġjatura tas-sajf, kif ukoll bosta sajjieda li minħabba l-baħar kienu jqattgħu ħafna ħin, partikolarment fis-sajf jipprattikaw id-delizzju tagħhom, fil-bosta bajjiet li jeżistu f’ Birżebbuġa.

Insibu bosta kitbiet li juru kemm Birżebbuġa kienet art tal-mistrieħ. Fosthom insibu l-għanja li tgħid hekk:

Birżebbuġa nieħdok naħslek
Kalafrana nixxuttak

Insibu wkoll il-poeżija Birżebbuġa ta’ Luigi Rosato, li nkitbet fis-Seklu Dsatax.

Sa mill-1463, Birżebbuġa kienet taħt il-ġurisdizzjoni tal-Parroċċa ta’ Bir Miftuħ, li meta minn din il-parroċċa bdew jinqatgħu l-parroċċi l-oħra, bħal ngħidu aħna ż-Żurrieq, iż-Żejtun, u Ħal Għaxaq, partijiet differenti minn Birżebbuġa bdew jappartjenu lil dawn il-parroċċi.

Beda mbagħad is-Seklu Għoxrin. Ir-rata tal-popolazzjoni bdiet tiżdied, u għalkemm bosta mir-residenti kienu jiġu minn paroċċi oħra, xtaqu li jkollhom ir-residenza tagħhom b’ mod permanenti f’ dan is-subborg. Il-popolazzjoni kompliet tikber, u hekk kif tlestiet il-kappella tad-Duluri, Birżebbuġa saret paroċċa. Id-data memorabbli hi nhar id-9 ta’ Settembru 1913. Id-digriet li Birżebbuġa saret parroċċa awtonoma, inqara fil-Parroċċi nhar is-16 ta’ Settembru 1913. B’ hekk, Birżebbuġa saret indipendenti minn parroċċi oħra.

Veduta ta' Birzebbuġa minn fuq għall-ħabta tat-tmeninijiet (1980s).  Innuttaw l-ambejnt tal-Bajja s-Sabiħa kemm hu differenti minn tal-lum.  Fl-istampa jidher ukoll id-digriet li bih l-Isqof Pietru Pace għamel lil Birzebbuġa parroċċa awtonoma fid-9 ta' Settembru 1913, bil-Madonna tad-Duluri tkun l-ewwel Titular ta' Birzebbuġa.

Kif oriġina l-isem?

Mhux l-iskop ta’ dan is-sit li jidħol f’ irqaqat ta’ toponomastika. Imma l-isem jista’ jkollu żewġ derivazzjonijiet. Hawn min jgħid li raħalna hu Burżebbuġa. Din il-kelma tfisser art taż-żebbuġ. It-tipografija turina li fuq din l-art kien jikber iż-żebbuġ. Jiġifieri din setgħet kienet ir-raġuni ta’ dan l-isem, li għad hawn min isostnieh.

Raġuni għall-isem kif tgħidu l-maġġoranza tar-residenti, u kif inhu mniżżel fir-reġistru elettorali, u għalhekk ser nimxu ma’ dan l-isem, Birżebbuġa tfisser Bir taż-Żebbuġ. Dan minħabba li fi Bliet u Rħula Maltin, paġna 91, insibu miktub hekk:

Fil-Bajja ta’ San Ġorġ, madwar l-1800, kienu għadhom jidhru minn wiċċ il-baħar ‘il fuq xi vaski taż-żejt imħaffrin fil-blat li kienu jservu għall-għasir taż-żebbuġ. Dawn kien jinżamm fihom iż-żejt.

L-Arma ta’ Birżebbuġa.

Għalkemm raħal antik, iżda li żviluppa dan l-aħħar, f’ Birżebbuġa nbidlet għal bosta drabi l-arma tal-lokal. Il-kulur tar-raħal baqa’ dejjem l-ikħal b’ faxx abjad u aħmar.

L-arma oriġinali u li nsibuha fuq bosta bnadar u standardi f’ Birżebbuġa hi din:

Skud maqsum fi tnejn, ta’ fuq fidda u ta’ isfel ikħal bħall-baħar. Fil-parti ta’ fuq tidher xtajta bi dwejra u siġra fuqha. Ma’ din l-arma hem mil-motto tal-lokal li bil-Latin jaqra hekk:

Pax Salvsqve Omnibvs

U li jfisser:

Paċi u Saħħa lil kulħadd.

Hekk kif twaqqaf l-ewwel Kunsill Lokali, fl-1994, l-istemma saret tarka bi sfond iswed bl-imfietaħ ta’ San Pietru fin-nofs. Din l-istemma saret bħala rispett lejn il-Patrun tal-lokal.

Ġara li s-Sur Michael Balzia lemaħ l-ewwel stemma ta’ Birżebbuġa fis-saqaf tal-Knisja Parrokkjali tal-Gudja, u b’ Notifikazzjoni Legali Numru 28 ta’ l-1 ta’ Marzu 1996, ġiet addottata din l-arma tal-lokal:

Skud abjad bi speċi ta’ ittra V fin-nofs, filwaqt li fuq din is-simbolu hemm fergħa taż-żebbuġ. L-istemma hi fuq sfond abjad, u l-kulur tas-simbolu V u l-fergħa żebbuġa hi kaħla.

Fuq, fuq, din kienet l-istorja ta’ kif twaqqfet il-parroċċa tagħna. Jeżistu aktar artikli f’ dan is-sit li juru l-iżvilupp tal-Parroċċa, il-Knisja, u bosta affarijiet oħra konnessi ma’ Birżebbuġa. Nittamaw li ladarba jinqraw dawn l-artikli, tinftiehem iktar l-istorja ta’ Birżebbuġa li fiċ-ċentru tal-ħajja tagħha hemm il-Festa Titulari ta’ l-Appostlu Missierna San Pietru.

San Pietru Appostlu

kitba ta' Christ Bonnici

Tv Es Pastor Ovivm, Princeps Apostolorvm,

Tibi Traditae Svnt, Claves Regni Caelorvm.

Int ir-ragħaj tan-ngħaġ, il-Prinċep ta’ l-Appostli,

Kristu tak l-Imfietaħ tas-Saltna tas-Smewwiet”.

Dan hu l-kliem wisq għall-qalbna ta’ l-Antifona Immortali li nisimgħuha kemm nisimgħuha dejjem tħallina bil-għatx biex nisimgħuha iktar u iktar. Iżda San Pietru kien biss ir-Ragħaj tan-Ngħaġ u l-Prinċep ta’ l-Appostli?

Jekk inħarsu lejn il-ħajja ta’ dan il-figura ewlenija fir-Reliġjon Kristjana Kattolika, naraw li dan ma kienx imma sar kap ta’ l-ewwel Kommunitajiet Insara f’ Ġerusalemm. Pietru, twieled bħala Xmun. Kien Iħaddan ir-Reliġjon Godajka, dik ir-Reliġjon li kienu u għadhom iħaddnu l-Lhud. Xmun twieled f’ Bethsaida, post fuq ix-Xatt tal-Punent tax-Xmara Ġordan. Ħuh kien Sant’ Andrija, li wkoll kien Appostlu. Xmun imbagħad mar joqgħod fuq ix-Xatt tax-Xmara tal-Galileja fejn sar sajjied. Stejjer fit-Testment il-Ġdid juru li kien bniedem ġeneruż, beżżiegħ, dejjem jitkellem f’ isem sħabu u impulsiv. Nafu fiċ-ċert li kien miżżewweġ. Iżda Sidna Ġesu’ Kristu kellu skop ieħor għal Xmun….dik li ma jkunx biss sajjied tal-baħar: “Imxu warajja, u nagħmilkom sajjieda tal-bnedmin”. (Mark 1:7).

The Calling of Saint Peter by Hans Suess Kulmbach Galleria degli Uffizi, Firenze.

Il-Ħajja ta’ Appostlu.

Fil-Bibbja, Xmun hu mpinġi bħala ħabib intimu ta’ Ġesu’, kif ukoll tas-segwaċi tiegħu. Fil-fatt, ħafna drabi naraw li Ġesu’ kien jieħu miegħu lil Xmun, Ġakbu, u Ġwanni. Jekk inħarsu lejn l-episodji tat-Trasfigurazzjoni fuq il-Muntanja Tabor u l-Agunija ta’ Sidna Ġesù Kristu fl-Ort tal-Ġetsemani naraw dan il-fatt: l-imħabba speċjali li Ġesù kellu lejn Pietru:

“Imbagħad Ġesu’ flimkien mad-dixxipli tiegħu wasal f’ qasam, jgħidulu l-Ġetsemani, u qal lid-dixxipli: ‘Oqogħdu bilqegħda hawn sakemm immur hemmhekk nitlob’. U ħa miegħu lil Pietru u ż-żewġ ulied ta’ Żebedew, …” (Mattew 26:36/37)

L-imħabba reċiproka li Xmun kellu għal Ġesu’ Kristu, ġieli wkoll swietu ta’ deni personali. Saħansitra darba minnhom fl-ewwel taħbira tal-Passjoni u l-Qawmien, Pietru beda jlum lil Ġesu’, sforz l-imħabba tiegħu lejH. Għal dan, Kristu sejjaħħlu “Xitan”. Jekk inħarsu lejn il-fidi ta’ Pietru, naraw li din kienet waħda enormi. “Mulej, jekk hu int, ordnali li niġi ħdejk fuq l-ilma”. Iżda l-biża’ u d-dubju ma ħallewhx jasal u Kristu ċanfru sew: “Ja bniedem ta’ fidi żgħira, għaliex iddubitajt” (Mattew 14:28/31).

Meta naraw dan kollu jseħħ fl-Appostlu Patrun tagħna, mingħajr ma rridu, nagħmlu kuraġġ. L-Appostlu Missierna San Pietru jurina li aħna bħalu msejħin għall-qdusija. Bħalma hu wasal biex sar qaddis, u fih seħħet transizzjoni enormi minn qabel ma niżel fuqu l-Ispirtu s-Santu għal dak li ġara wara, ninnutaw kemm aħna lkoll li tant niżbaljaw u niċħdu tant lill-Mulej, bħal Pietru wkoll naqilgħu l-maħfra, ladarba jiddispjaċina ta’ dak li nagħmlu.

Għalhekk, mhux ta’ b’ xejn, il-Birżebbuġjani uliedek, iħarsu lejk Missier, u jitolbuk tieqaf magħhom f’ kull mument tal-ħajja tagħhom. Partikolarment fil-mumenti deludenti! Għinna, Missier! Għinna! Ħalli bħalek nirċievu l-maħfra u l-imħabba ta’ Sidna Ġesù Kristu.

Punt importanti fil-ħajja ta’ Xmun Pietru, kif ukoll fl-istorja kollha tal-Knisja Kattolika hu meta jekk naqraw sew l-Evanġelju skond San Mattew, Kapitlu 16, Versi 13 – 20) naraw li Sidna Ġesu’ Kristu ried jibni fuq is-sod, u għalhekk, lil dak li kien Xmun Bin Ġona, bidillu ismu… minn Xmun Bin Ġona, sejjaħħlu Kefa, (Pietru) li tfisser Blata.

Kif nafu, f’ dan l-episodju, Ġesù, jgħidilna San Mattew, meta wasal fl-inħawi ta’ Ċesarea ta’ Filippu staqsa lid-dixxipli dwar min jaħsbu li hu n-nies. Għall-mistoqsija diretta ta’ x’ jaħsbu l-Appostli fuq Ġesù, min jitkellem? Ħadd ħlief is-Sajjied Xmun. Sajjied, jagħmel l-istqarrija ta’ l-aqwa Teologu: Int il-Messija l-Iben ta’ Alla l-Ħaj. Tant kemm ħa gost b’ din l-istqarrija, il-Mulej intebah li fi Xmun kienet qed isseħħ il-bidla. Ma għadux dak il-bniedem li ma jaf jagħmel xejn ħlief jaqla’ l-għixien tiegħu bis-sajd! Imma tant qed jitwaħħad ma’ l-Imgħallem, tant qed jafda u jemmen dak li jitgħallem mingħandu, li bil-għajnuna tal-Missier Alla, għaraf verament min kien Ġesù. U fuq din l-istqarrija ta’ l-aqwa Teologu, li ħarġet minn fomm ta’ bniedem mill-aktar ordinarju, Kristu  għamlu l-ewwel Kap tal-Knisja… ”U jiena ngħidlek ‘Inti Pietru (Blata) u fuq din il-Blata, jiena nibni l-Knisja Tiegħi. Lilek nagħtik l-Imfietaħ tas-Saltna tas-Smewwiet, u kull ma torbot fuq l-Art ikun marbut fis-Smewwiet u kull ma tħoll fuq l-Art ikun maħlul fis-Smewwiet’.”

Tant kemm Ġesù għażel Mexxej għaqli, li antiċipa li matul iż-żminijiet, ser iqumu l-irwiefen u jħabbtuha. Fil-fatt, kif ser naraw iktar ‘il quddiem, Pietru kien wieħed li baqa’ sod quddiem ir-riefnu tal-Martirju. Bħalu għamlu bosta mill-Appostli u l-Martri. Imma, kif qal Ġesù lil Pietru: Is-Setgħat ta’ l-Infern ma jgħelbuhiex.

Pietru ħass li hu midneb u Sidu ma kien fih l-ebda dnub. Ħass ukoll li ma kienx dehen għalih li Sidu jaqa’ għal dak il-livell. Imma dan kien biss il-ħsieb uman ta’ Pietru, u l-ħsieb tar-rispett u l-imħabba u l-fiduċja li kellu fil-Mulej Ġesù. Inħarsu lejn l-avveniment ta’ Ħamis ix-Xirka meta Ġesu’ ried jaħsillu saqajh: “’Ma jkun qatt li inti taħsilli saqajja!’ Wieġbu Ġesu’ ‘Jekk ma naħsillekx saqajk, ma jkollokx x’ taqsam miegħi’. Qallu Xmun Pietru ‘Mulej, mhux saqajja biss, imma jdejja u rasi wkoll’.” (Ġwanni 13:8/9)

Jekk inħarsu lejn il-Patrun tagħna fil-waqtiet solenni tal-Passjoni, insibu li beża’. Mill-Appostli kull ma kien għad fadal ma’ Kristu kien biss San Ġwann l-Evanġelista. Iżda l-ewwel wieħed li ra l-qabar vojt u daħal fih meta Kristu Irxoxta kien appuntu Xmun: “Mbagħad wasal warajh Xmun Pietru, daħal fil-qabar, u ra l-faxex ta’ l-għażel imqegħda hemm, u l-maktur li kien madwar rasu; dan ma kienx mal-faxex, imma mitwi u mqiegħed f’ post għalih”. Wara dan, Pietru flimkien ma’ l-Appostli imbeżża’ mil-Lhud ingħalqu fiċ-Ċenaklu. U dan dam sa’ Għid il-Ħamsin. Dakinhar, Pietru, li qabel kien beżżiegħ, ħareġ bħala bniedem trasformat. Pietru sari l-bniedem ta’ Ġesù. Ħareġ jippriedka u jgħallem, u kull min semgħu baqa’ mistagħġeb. Beda jinftiehem b’ kull lingwa. X’ miraklu dak, meta bil-lingwi li nftiehem, bil-għajnuna tal-Mulej ikkovertew għadd ta’ nies!

Pietru ħalla Ġerusalemm u sar Missjunarju. Laħaq l-Ewwel Isqof ta’ Antijokja tas-Sirja, kif ukoll l-Ewwel Isqof ta’ Ruma, jiġifieri hu fatt ċert li kien ukoll l-Ewwel Papa. Pietru hu msejjaħ ukoll bħala l-Appostlu tal-Lhud. Jingħad li kien medjatur bejn il-Lhud li kien jitkellmu l-Aramajk (Konservattivi) immexxija minn San Ġakbu u dawk li kienu jitkellmu l-Grieg (Liberali) immexxija minn San Pawl.

Saint Peter by William Holman Hunt, Private Collection.

L-Arresti, il-Ħelsien (Titular) u l-Martirju

Kif ħabbarlu Kristu qabel tela’ lejn is-Sema, wara li staqsih għal tliet darbiet jekk Iħobbux, u fdalu f’ idejh li jirgħa n-Ngħaġ u l-Ħrief, jiġifieri kkonfermalu s-setgħa tiegħu ta’ Kap tal-Knisja, ħabbarlu kif kellu jagħti ħajtu għaliH: “ ‘ Tassew tassew ngħidlek, meta kont żagħżugħ, kont titħażżem waħdek u tmur fejn trid; imma meta tixjieħ, int tiftaħ idejk u ħaddieħor iħażżmek u jieħdok fejn ma tkunx trid’ !” (Ġwanni 21:18)

Lejn nofs l-Ewwel Seklu, is-Sultan Erodi nieda persekuzzjoni ħarxa kontra l-Insara. L-ewwel qata’ ras Ġakbu ħu Ġwanni, u mbagħad biex jikkuntenta lil-Lhud, arresta lil Xmun Pietru wkoll. Iżda t-talb tal-Knisja nstema’! Il-Mulej bagħat l-Anġlu tiegħu u fil-Lejl stess li fih, Erodi kellu joħroġ lil Pietru biex tinqatalu s-sentenza, l-Anġlu ħelsu. Hu daqsxejn rakkont twil biex nirrakkontawh hawnhekk, imma nistgħu nħarsu lejn il-Ktieb ta’ l-Atti ta’ l-Appostli, Kapitlu 12, Versi minn 1 sa 19. Għal dan l-avveniment hi ddedikata l-Parroċċa tagħna ta’ Birżebbuġa. Għal dan il-għan, il-Poplu kollu ta’ Birżebbuġa nhar l-Ewwel Ħadd ta’ Awissu u matul il-ġimgħat ta’ qabel, jingħaqad biex jiċċelebra bil-kbir, f’ Tempju u f’ raħal imżejna mill-isbaħ!

Iżda Pietru ma kellux idum barra. It-tradizzjoni tgħid li reġa nqabad u ttieħed fil-ħabs ta’ Ruma wara li l-ewwel darba kien arrestat f’ Ġerusalemm. Din id-darba, twettqet il-Profezija li qallu Ġesù, u Pietru miet Martri għal Kristu. B’ dan il-Martirju, issiġilla l-imħabba infinita li kellu għal Ġesù, liema mħabba ħarġet fid-dieher anke kif ressquh għall-Martirju. Pietru, il-Patrun tagħna, ħasad il-Palma tal-Glorja msallab rasu ‘l isfel. Għalhekk, l-imħabba u s-sottomissjoni li hu kellu lejn is-Salib tal-Mulej. It-tradizzjoni tisħaq li min]abba li ma ħassx li jkun dehen għalih li jmut l-istess mewt ta’ Kristu Sidu, u għalhekk hu kien Pietru li għażel li jissallab b’ dak il-mod. Pietru, ġie msallab u mhux qatgħulu rasu bħal San Pawl minħabba li San Pawl kien ċittadin Ruman, iżda Pietru baqa’ jħaddan ċittadinanza Lhudija. Pietru miet barra l-ħitan ta’ Ruma, dejjem skond it-tradizzjoni, fis-Sena 64 Wara Kristu.. San Pietru jinsab midfun taħt l-Altar Maġġur tal-Bażilika ddedikata lilu (Il-Vatikan). Unur enormi għalina l-Birżebbuġjani hu dak ta’ meta jibda l-Ministeru Petrin is-Suċċessur Tiegħu l-Papa. L-ewwelnett, il-pussess tal-Papa jissejjaħ bħala l-bidu tal-Ministeru Petrin, u l-ewwel viżta li jagħmel qabel ma tibda ċ-ċelebrazzjoni li fiha jingħata l-Pallivm u ċ-ċurkett tas-Sajjied, (simbolu ieħor ta’ San Pietru) tkun appuntu fuq il-qabar ta’ San Pietru.

Qabel is-snin ta’ l-1950, ma kinux ċerti dwar dan il-qabar, għaliex kienet biss tradizzjoni li tgħid li San Pietru jinsab midfun hemmhekk, minħabba li miet fl-istess post. Il-qabar kellu miktub fuqu PETRVS, li bil-Latin tfisser PIETRU. U wara xi studju li sar, il-qabar sar magħruf li kien awtentiku.

The Calling of Saint Peter and Saint Andrew by Caravaggio, Royal Collection Department, London.

Iż-Żewġ Ittri Attribwiti Lilu.

Fil-Bibbja, fit-Testment il-Ġdid, insibu żewġ ittri attribwiti lil San Pietru. L-Ewwel Ittra nkitbet minn San Pietru f’ Ruma għall-ħabta tas-Sena 64 Wara Kristu. Kitibha lill-Insara ta’ l-Asja Minuri biex isaħħaħhom fil-fidi u jurihom kif għandhom jgħixu f’ soċjeta’ fil-Maġġoranza tagħha pagana. Uħud jidhrilhom li din l-Ittra nkitbet minn awtur anonimu għall-ħabta tas-Snin 90/91 Wara Kristu. Matul din l-Ittra, San Pietru jisħaq fuq id-dmir tan-Nisrani li jagħti eżempju tajjeb biex jiġbed lill-Pagani għall-Konverżjoni.

Min-naħa l-oħra, dwar it-Tieni Ittra hemm dubju serju jekk inkitbitx minn San Pietru jew awtur anonimu lejn l-aħħar ta’ l-Ewwel Seklu Wara Kristu. Ir-raġuni hi li l-istil u s-suġġett huma differenti minn dawk ta’ l-Ewwel Ittra. Jidher li fi żmien min kitibha, l-Insara ma kinux għadhom jaħsbu li Kristu kellu jerġa’ jiġi ma jdumx. L-Ittra hi indirizzata lill-Insara kollha bla ebda ħjiel ta’ xi post partikolari. Ħsieb l-awtur hu li jsaħħaħ il-fidi ta’ l-Insara, l-aktar dwar it-Tieni Miġja ta’ Ġesu’ Kristu, iwiddibhom dwar it-tagħlim ħażin, u jfakkarhom fil-periklu li jifhmu ħażin l-iskrittura, l-aktar il-kitba ta’ Pawlu.

Saint Peter by Jusepe de Ribera, Galleria Doria Pamphilj, Roma

Festi Liturġiċi matul is-sena

Nistgħu ngħidu li wara l-Madonna u San Ġużepp, l-iktar Qaddisin li għandhom jiem iddedikati għalihom, huma San Pietru u San Pawl.

L-ewwel Festa insibuha nhar it-22 ta’ Frar. Sal-Konċilju Vatikan II, kienet issir festa oħra tal-Kattedra ta’ San Pietru Appostlu. Din kienet taħbat fit-18 ta’ Jannar. Dakinhar, il-Knisja kienet tiċċelebra l-Ħatra ta’ Xmun Pietru bħala l-Ewwel Isqof ta’ Ruma, u fit-22 ta’ Frar kienet issir il-Festa tal-Kattedra ta’ San Pietru f’ Antijokja. Fil-fatt, għalhekk is-silta ta’ l-Evanġelju: “U meta wasal fl-inħawi ta’ Ċesarea ta’ Filippu…” Illum dawn iż-żewġ festi ngħaqdu f’ waħda, għaliex hu l-fatt li la l-Knisja titmexxa mill-Vatikan, għalhekk il-Papa jgħix f’ Ruma, hu fatt li l-ħatra ta’ Isqof ta’ Ruma hi l-ħatra ta’ l-Ewwel Papa li Kristu tah f’ Ċesarea ta’ Filippu.

Festa oħra hi nhar id-29 ta’ Ġunju. Flimkien ma’ San Pawl, infakkru s-Solennita’ tal-Martirju ta’ dawn iż-żewġ Kolonni tal-Knisja, popolarment magħrufa bħala L-Imnarja. Il-lessema Latina “Luminaria” hi derivazzjoni tan-Nom “Lumen” (3rd Declention) u tfisser “Dawl”.

Il-Parroċċa ta’ Birżebbuġa tiċċelebra t-Titular tagħha fl-Ewwel Ħadd ta’ Awissu minħabba li l-Festa tal-Ħelsien mill-Ħabs ta’ San Pietru Appostlu taħbat nhar l-1 ta’ Awissu.

Għalhekk, hu bix-xieraq li l-Grupp li ifforma riċentament, dak ta’ l-armar, jieħu dan l-isem hekk sabiħ… l-isem li jfakkar il-Jum Liturġiku tal-Festa Titulari tal-Birżebbuġjani. Il-jum li hu magħruf bħala l-isbaħ jum matul il-mixja tas-sena kollha.

Mhux ta’ b’ xejn, għalhekk, quddiem il-kobor ta’ dan il-figura ewlenija fl-Istorja, ilkoll ningħaqdu flimkien. U quddiem din l-Istatwa Maestuża, mhux xogħol il-bniedem, imma xogħol mistiku, li Alla nqeda b’ Fernand Stuflesser, biex tinħadem f’ Bolzano, fis-sena 1959, ilkoll flimkien ningħaqdu quddiemha bl-akbar qima u ħeġġa: hekk kif il-qalb tagħna l-Birżebbuġjani, ma tiflaħx iżżomm iktar fiha. Hekk kif qalbna tingħasar u mill-qalb ma nkunux nistgħu nżommu dik l-għajta faċli, iżda sabiħa, u aktar kemm nirrepetuha, aktar nixtiequ nibqgħu ntennuha: dik l-għajta immortali:  VIVA SAN PIETRU!!

U ppermettuli li nagħmel tiegħi żewġ strofi li kien għalaq it-tlitt ijiem tat-Tridu bihom fil-festa titulari 2003, il-Predikatur ċelebri Żurrieqi: Fr. John Curmi: żewġ strofi meqjusin fi kliemhom, li bla dubju ta’ xejn jagħtu ġieħ lill-Kbir Appostlu Patrun Singolari tagħna:

Pietru Mqaddes żomm raħalna
sod u qawwi f' dat-twemmin
ħa jmexxina t-tagħlim tiegħek
flimkien miegħek magħqudin.

Int ir-Ragħaj ta' Birżebbuġa
lejn Ġesu` miegħek mexjin
b' dawk l-Imfietah int iftħilna
Bieb il-Ġenna tal-henjin.

U l-aħħar stanza minn qalbna lkoll toħroġ:

Minn miegħek, qatt ma nitilqu
Bil-barka tiegħek, o Missier nitbierku
Hekk kif minn qalbna toħroġ l-għajta:
VIVA L-KBIR PATRUN SAN PIETRU!