AVVENT 2009
Ħsieb għall-Avvent minn Cheryl Anne Vella.
Dan l-aħħar bosta semgħu bil-famuża sena 2012 meta xi persuni isostnu li hija s-sena meta se
tintemm id-dinja. Hemm uħud li huma xettiċi u ma jemmnux li vera. Oħrajn li jaħsbu li vera.
Però meta wieħed isemmi l-aħħar tad-dinja hija ħaġa ovja li tisma’ lil min jgħid : “Maaa x’biża’!!!”
X’se jiġri fl-aħħar tad-dinja? Fil-ktieb ta’ l-Apokalissi insibu li fl-aħħar tad-dinja Ġesù reġa ġej!
Xi jfisser dan għan-nisrani li tassew iħaddan it-tagħlim ta’ Ġesù? Ifisser li fl-aħħar in-nisrani se
jingħaqad mal-Maħbub tiegħu. In-nisrani huwa bħal dik l-għarusa li qed tistenna b’ħerqa lill-għarus
jiġi jimliha bil-“bewsiet ta’ fommu” (Għan ). In-nisrani huwa bħal dik il-mara li qed tistenna ħerqana
u b’fedeltà lill-maħbub tagħha jirritorna lura minn xi missjoni barra l-pajjiż.
Mela altru li mhix okkażjoni ta’ biża’!
Dan l-element ta’ għerusija bejn Alla u l-bniedem tinsab mal-firxa tal-kotba kollha li jinsabu fil-Bibbja.
Anke fl-Apokalissi, insibu li fl-aħħar tad-dinja Ġesù ġej jiltaqa’ ma’ l-Għarusa tiegħU u jseħħ it-Tieġ
tal-Ħaruf. Min hi l-Għarusa ta’ Ġesù? Biex nispjegaw din il-biċċa jeħtieġ li mmur lura lejn il-kotba
profetiċi fit-Testment il-Qadim fejn Alla jseħħah lil Israel, jiġifieri lill-Poplu l-magħżul tiegħU,
l-Għarusa tiegħU. Fl-ittri ta’ San Pawl naraw paralellismu fejn San Pawl jirreferi għall-Knisja bħala
l-Għarusa ta’ Ġesù. Il-Knisja fil-fatt hija Israel il-ġdida. Min jagħmel il-Knisja? Il-Knisja hija magħmula
minni u minnek. Allura aħna wkoll imsejħin biex inkunu għarajjes ta’ Ġesù. Din li aħna lkoll imsejħin
inkunu għarajjes hija verità li toħroġ fis-simboliżmu li nsibu fil-Vanġelu skond san Ġwann.
La aħna msejħin inkunu għarajjes ta’ Ġesù, fl-aħħar tad-dinja Ġesù ħerqan biex jiġi jiltaqa’ magħna.
Aħna qegħdin nistennewH, lilU li qalilna li ġej bħal ħalliel meta l-inqas mistenni? Kif se jsibna?
NistennewH bl-imsiebaħ tal-fidi mixgħulin jew boloh u aljenati għaliex issottovalutajna kelmtU u
abbużajna mill-ħniena tiegħU?
Minkejja li l-aħħar tad-dinja huwa żmien ta’ ferħ kbir fejn l-għarusa terġa’ tiltaqa’ ma’ l-Għarus tagħha
wara tant stennija, miskin għalih dak jinstab mhux ippreparat. Miskin għalih dak il-biered li jissejjaħ
nisrani ta’ l-isem għaliex fl-Apokalissi hemm miktub li dawn “jinbeżqu” – ikunu riġettati kompletament.
L-aħħar tad-dinja huwa l-mument tal-ġudizzju universali, fejn issir is-selezzjoni bejn il-qamħ u s-sikrana.
Inti u jiena kemm aħna ċerti li aħna qamħ u mhux sikrana? Noqogħdu attenti li jekk aħna ċerti li aħna
qamħ, iċ-ċertezza tagħna ma tkunx gidba tax-xitan biex inħossuna komdi. Dan għaliex dejjem hemm
fhiex nistgħu nikbru u nirranġaw fir-relazzjoni tagħna mal-Maħbub tagħna Ġesù,
li dejjem fiH aktar x’tiskopri.
Fejn irrid nasal? Ħafna għandhom l-impressjoni li l-Avvent huwa preparament għall-Milied.
Però fuq dan għandhom żball. L-Avvent huwa proprju ż-żmien fejn il-Knisja tfakkarna li għandna
nitħejjew għat-tieni miġja ta’ Ġesù.
Huwa żmien ta’ ġabra fejn aħna bħala għarajjes, imħeġġin neżaminaw ir-relazzjoni tagħna ma’
l-Għarus li daqt ġej jiltaqa’ magħna.
Huwa żmien ta’ stennija fejn nitolbu lil Ġesù biex ma jdumx ma jerġa’ jiġi.
FATIMA SANCTUARY
