حُـرِّية إلأحْـلاَم

 

سَمَحُولْنَـا بِ الأحْلام فِى إليَـقَظَـه قَبل إلنُوم

نِـبُـص نِتْـأمِّـل فِى مَوْكِـب إلسُلْطَـان

وعْيُـونَّـا تِتْخَـيِّـل ـ مَع إن دَه أوهَام ـ

كَأنُّـه مَوْكِـبْنَا وإحْنَا إلِّلِى رَاكْبِـين فِيـه

إلسَيَّـارَات أنْواع  بُـودْرَه  وَرَاهَا عِيُـون

عَدَّدْهَا قُـول خَمْسِـين ، مَـليَانَه بِالبَنزِين

طَايْرَه مَاهِـيش مَاشْيَـه عَلى أرْض مَغْسُولَه

مَرْشُـوشَه بإلأزْهَار وِالوَرْد وِالرَيَـاحِـين

 وبعد ما نعدِّى بيرشوا زفت وطين

**

شَبَاب مِن إلمَسَاكِين مَزرُوعَه عَ إلجَنْبَين

جَايِّـين  مِن إلأَرْيَـاف  وقِبْـلى  لِلْتَجْنِـيد

لَقُـوا فَرْق فِى العِيشَه بَين هِنَا وهنَـاك

هِنَا شَافُـوا الزِينَه ، مُولِد حفيد فرعون

  بقْصُورُه وِمَعَابْـدُه وهنَاك بِـيُوت بِالطِـين

ومَيَّـاه مَخْـلُوطَه بِفَـاسِد إلمَجَارِيـر

مِن قِلِّـة إلخَدَمِات بِيْعَـانُـوا مِ إلإمْسَاك

وإلأدْهَـى جَايبِـنْهُم يحَارَبُوا فِى ألإخْوَان

ومُرَاسْلَه وحْرَاسَه مِشْ خِدْمَـة لِلأوْطَـان

**

فِيـه طَقْـم رِجَّـالَه إلوَاحِد بِطُول رَمْسِيس

وإلعَرْض عرض الفيل ، مِرِبِّـين عَضَلات

مَفْتُـوله مِن إلأطْرَاف لْحَد شَعْر إلْرَاس

وعِرُوق خطوط  مَوَاسِـير بِتْبَـان مِن إلتَرَابِـيس

     يتْفَاهْمُـوا بإلنَظَرَات  ويضربوا  ب ليزرات 

بيرِاقْبُـوا كُل ألنَاس  مِ  إلشَعْـب  لِلْحُـرَّاس

خَايفِـين لَحَـد يطُول  رَقَـبِة " أبُونا الهول "

مَاشْـيين مِحَـاوْطِـينُه فِى دَايرَه مَقْـفُـولَه

ولا حَاجَـه تِوصَلْ لُه حَتَّـى وَلا إلْـدِبَّـانْ

**

إلْسَـكَه مَفْتُـوحَه لا زَحْمَه ولا إشَارَات

عَرَبِـيَّـه مَرْكُونَه بِتْـشِدَّهِا إلأوْنَـاش

وإكيد بتِتْـخَـرَّب وِصَاحِبْهَا يتْأدِّب 

سَـابْهَا يعَطَّـلْنَا ؟ وِلْلا مِفَـخَّـخْهَـا ؟

كَان حَطَّـهَا فِى جِرَاج بَدَل مَا يرْعِبْـنَا

فيه صَـفْ مُوتْسِـيكلات قُـدَّامْنَا وِوَرَانَـا

مِتْسَـلَّحَه بِهَاوْنَـات وِرَشَّـاشَات آلِـى

سِرِاينْهَـا بِتْسَـوَّطْ عَمَـال عَلى بَـطَّـال

ولا صفارات إنذار  فى حرب ع الأبواب

**   

 كُل إلْرُتَـب زِنْهَار وإلْلِـبْس مِتْـنَـشِّـى

سَابُـوا مَكَـاتِـبْهُم وإلقَهْوَه والتَكْييف

إلْحَـر يسْـلُـقْهُم  أو بَرْد يلْسَـعْـهُم

 يعاينوا كل رصيف  ،  مِن أوِّل إمْـبَارِح

بـيأَمِّـنُوا الطُـرُقَات لِحَـد مَا نْـرَوَّح

وبِيشْـتِـمُوا فِى إلسِـر كُل إللى جَاى يمُر

عَلَـشَان مِعَطَّـلْهُم ع إلفَاضِى وإلمَلْـيَـان

وإللى مَاهُوش عًاجْـبُه وشَـكْـلُه مِتْـزَمَّـر

مِن نَفْـسُه يتْـقَـاعِـد بَـدَلْ مَا يتْـفَـوَّر

**

قَـنَّـاصَه فِى إلعَالِى وإلضَرب طَـوَّالِـى

لَـو شَكُّـوا فِى واحِـد أو حَـدْ مِـدَّارى

وِاقِـفْ واخِد سَاتِـر ، مَحْصُور وبيفَضِّى

ويَـا ويلُـه لَو تَجْرَم أو حَتَّـى يسْتَـفْـهِم

على آيه بِـيتْـبَهْـدِل ؟  أهْلُـه هَا يسْتِـلْمُوه

مِن مَشْـرَحِة زيِـنْهُـم ، مَنْخُـل وِمِتْخَـرَّم

فى تابـوت ومِتبَرشِم  وجَنَـازتُه كُـتِّيمِى

لا صوان ولا معزا ولا نعى ولا قهوه

ويدِّفِـنُ سِراً فى مَقَـابر الصَدَقَـه

**

هِنَاك فِـيه نَاس تَانْيَه مَحْبُوسَه فِى إلْطُرًقَـات

مُنْتَـظِرَه مَوْكِـبْنَـا يعَـدِّى  بَعْـد سَاعَات

هُمَّـا وَرَاهُم آيـه ؟  كُل إلْبَـلَد قَـافْـلَـه

لا طَبيب ولا عْيَـاده ،  المَرضَى يسْـتَـنُّوا

يتْـوانْسُوا فِى إلأتُوبِـيس ، يدَّفْـوا فِى إلزَحْمَه

وإللى وَرَاه أشْغَال ، رَايحْ يشُـوف شُغلُـه

يصْـبُر عَلى رِزْقُـه ، إلدُنْيَا مِشْ طَايْـرَه

وإللا هَا يْـلالِـى لَو حَطُّـه فِى دْمَـاغُـه

هَا يشُوف مَـرَار حَنْضَل عُمْرُه مَا دَاقْ زَيُّـه

**

إلرَمْلَـه مَنْخُـولَه وإلعَجَمِـى بالزُوفَـه

مَفْرُوش لِحَد إلبَاب ، إلرِجْل تِغْطَـس فِيه

وِنَهَـار مِن إلأنْـوَار ومُوسيقَى أوبْـرَالى

بتِـرسِم إلعَظَـمَه عَلى جَـو دِى إلحَفَـلَه

وإسْتَـقْبِـلتنَا وفُود مِن  كُـل جِنْسِـيَّـه 

فِى مَلابِس إلسَهْـرَه وِبَرْفَـانَات سَاحْرَه

بيقَـدِّمُوا إحْترَامَات وتشَـكُـرَات وِرِيَـاء

وِهَدَايَـا م إلْغَالْيَـه مَالْهَاش ولا منَاسبَه

يَـاوِرْ بِيَـاخُدْهَـا  وِعلى طول  يأمِّـمْهـا 

**

حَوالَينَا مِـيت جَرْسُون بِصَوانِى م إلفَضَّـه

شَايْلِـين كُؤوس كُوكْتَيل ، ويسْكِى وشَمْبَانْيَا

تشْـرَب يعَبُّـوا لك ، قَـرْبَـع  وِخُد غَيَـرُه

وِبَعْـد مَا تْبَـنْجَـر  وتْقُـول كِدَه كفَايـه

تدْخُـل عَلى إلسُفْرَه ، طَويلَه ييجِى كِـيلُوين

عَمْرَانه بالأصْنَاف أغْلَبهَا مَا أعْرَفْهَـاش

إلأكل كِمِـيَّـات تِـكَـفِّـى لِلأُلُـفَات 

 وَاصِـل  بِطَـيَّـاره ، لازِم يكُـون طَـازَه

وكُلُّـه كُلُّـه بَلاش ، إلخُرْدَه مَا دَفَعْـنَاش

**

وقفت وأنا مذهول ، دا كل أكلى ألفول

معلش !  عَـدِّيـها  ...ونسمع إللى إتقال

    أشعار  بتتغنى  فى  عظمته   وحلاوته     

   ويقول له أنا نفسى ، يقول له ، تَصدَّقـنا 

 وجنابه يتملل ويسأل إلتانى " تفيده " فين هىَّ

يرد بألراحة ، حرمنا تعبانة ، ألوضع أزِّمهـا

يأمر  بطيارة فى إلتـو لأروبا للست وإلعيله 

ومصروفات جارية على نفقة الدولة

 ما هى ثروة قومية

وإحنا  يا حول ألله بنخبز إلجِـلَّـه

**  

إلْنَـاس فِى كُل مَـكَان إتْعَزَمُـوا فِى خَيَالْهُم

يَاكلُوا ويتْبِسْطُوا ويأكِّـلُوا عِـيالْهُم

 إلأكـل  بِزْيـادَه ، أَصْنَاف فُـوق إلْعَـاده

 وِكُـلُّـه مِتْـرَمِّـى ، إبْـقُوا خُـدُوه معَاكُم

دَا  كُـلُّه فِى إلأحْلام أو قِصَّـه فِى رْوَايَه

نِعِـيشْهَا فِى خَيَالنَا ، مَع مَوكَب إلسُلْطَـان

وكَأنُّـه مَوكِبنَا وإحنَا إللى رَاكْبين فْيه

نِفْضَل كِـده عَلى طُول عَايشَـين بِنِـتْبَهْدِل

وِلْحَـد مَا نْوَدَّع ، وإحْنَا بِنِتْخَـيِّـل

 

---

إلأكْل إلْمُستَوْرَد

 

لَو طَعم إلعَيش إلأيَام دِى

زَىّ إلعَيش إللى إنا عَارفُه

وأكَلتُه زَمَان ، أيام والدى

كُنْت أكْلُه  حَافْ

كَان طَعْمُه جِنَان

أو  يبْقَى غمُوسِى

مِش وكَام بَصَلَه

 حَبِة دُقَّه

يِمْرُوُا عَلَينا بصِحَه وعَافْيَه

 

 إلعيش فى بلدنا  إلأيام دى

زى إلأكل إلمُسْتَورَد دِلوَقتِى

بَاعْتُه غَرِيمْنَا

 يشفى غليله

  ويمرِضــنَا

 

إلْبِذرَه  إلواصْله لنا

مَحْقُونَه

  بحَاجَات  جوَّاها مَدْفُوُنَه

تقعد فى ألأرض يومِين

 وِإلْزَرْع يفُور   

  زَى إلمَسْحُور  

إلثَمَرَه  بسُرعَه بيجْنُـوها

  عَلى طول يبيعُوها

 لو يستنُّـوا ،  يشيلوه شايخ

شَكْلُـه زَاهِى ،  طَعْمَه مَاسِـخ 

 صُورَه ، مَنْظَر

 معمول له دِيكُور

إلفَاكْهَّه .... خُضَار

  مِحتَاجه سُـكَّـر

والخُضْرَه عَلَيق شبـه إلبرسيم

 مَصْبُوغَ  أخْضَر

 

فَين إلشَمَّام أبُو رِيحَه

 تبَان مِن عَاشِر جَار

وللا إلشِيلْيَان ،  حـلو مِرَمِّـل

 يجْرَح فِى إلزُوُر

 

   جابُـوا  فَرَاوْلَه ، نوع م إلفاكهة

تخينة وجامدة 

دى خِيَارَه حَمْرَا

قَلْبَها أبْيَض أُخْتْ إلفِجْلَه

تِنْفَع تَخْلِيل أو لِلْسَلَطَه

 

حَتَّى اللحْمَه

 بَقَرِى ، جَامُوسِى ، بَطَّـة ، فَرْخَه

 كلها مضروبة ،  ومعلوفه

بِ طِحِين إلعَضْم وبُودْرِة دَم

عَلفَه مُرِيبَة  ، سمًّوها فِيتَامِيِن

لَحم   مفَتِّـل  مِتْعَبِّـى دهون  

                          وساعات مجنون 

               أصْل إلبَلَدِى إلأصْلى إلمِتْرَبِى

 غَالِى

سِعْرُه تَمَلْلِى فِى إلعَالِى

 بنشوفُه  فى ألإحلام

ربِّـنا يوعِدنا بعَشرَه جرَام

إدعُو معَايَا  نلاقيها  فى ألأجزاخانات 

بعد  ما قفلوا  وبـاعوا  ألجمعيات 

إقروا ألفَتحَه لِلِّـى عَمَلها

  صَحِيح أمْوَات

لكن أبطَال ، مَشَاهَـير

جابوا كميات ، ومفيش خناقات      

كان فيه تَوفِـير

للى ماعَندُوش

 مِسكِـين  وفَـقِـير

وحتى إلناس إياها بتسترزق

كانت بتبيع نص إلمخزون

لمطاعم إلفول وقهاوى إلسوق

وتهادى إلبيه 

      مش زى  إلأسره إلرابعه إلفقريه     

إولاد دراكولا ، إلحانوتيه

   بيجيبوا إلأكل قليل

         وإلشعب كتير ، يتختنقوا عليه     

سيبينوه  لينا ، بيعَـيِّـنا

 والناس إيَّاها فى زّمَانَّـا

بتبيع كل إلمخزون

أسعار من نـــار

ــــــــــــــ

الشارع مترشق أسود

          

الشارع مترشق اسود
متخطط أزرق
مش بحر عميق
ولا زفت طريق
ولا عزا منصوب   
دى ملابس سود
لبساها جنود
وسلاح وخوذات
مع شوم ودروع
ميَّـات ، ميَّـات
لأ .. دول ألوفات
و كتيبة كلاب
واقفين بالصف
بولدوج وولف
واقفين جاهزين
ينهشوا
جعانين
والخط ألآزرق
صف طويل
م ألعربيات
ع ألجنبين
مليانه تيران
التور ، طنين
لو ريح إيده عليك
تتفك إتنين
عملت غشيم
وسألت فيه إيه ؟
قالوا لى دى حرب
ما بين ألبيه
ومعارضين
وأوامر جات من فوق
نعمل كام طوق
حوالين ألناس
يمشوا بالذوق
أو نضربهم
وإن طالت ألعاركة شويَّـه
بنخطفهم

هتافات .. هتافات
دستور باطل
ورئيس
صورة وعاطل
بيقولوا
يسقط حسنى مبارك
العدل ما هوش موجود
وسرور جاهل

***
إلراجل خايف وبيدفع
واحنا بنقبض وبنمنع
كـل ألهتافات
نجهض كلمات
بتقول الحق
وطالبة الحق
وعدل وحريَّـة
حريِّـة آيه ؟
أنا نفسى محبوس جوَّا ألبدلة
من غيرها أشحت فى إلسكة
خلينا نرد على سؤالك
موضوعنا : تآمين ألسلطة
نحبس كام واحد ، ما يضرش
ويموت كام واحد ، ما يهِمِّـش
ألراجل خايف على نفسه
واحنا قبضنا وبنساعده
**
إيه يعنى ألظلم
دلوقتى دا عِـلم
له مستشارين
قاعده تففن
فى عذاب ألناس
وازاى بتخلي ألواحد يتجنن
تعذيب بالنار
خلع ضوافر
وغيره كتير
ما تسيبش آثار
وإن سابت
عين عورة
إيد مكسورة
أو مبتورة
عندنا شهادات
جاهزة على بياض
نطلب تعويض
إزعاج سلطات

ــــــــــــــــــ

 

إلمِقْـيَــــاسْ

إلمِقيَاس كان فى إلروضه
يقِيس إلمّيَّه وفياضَانها
آيه أحجمهَا
نِعْرَف زَادِت نِقْصِت ، راحِت عَ إلبَحْر
هِرْبِت مِنا وطِفْشِت
ولْلا إتبَاعِت بَعْد ما زَاغِت مِ إلتِرعَه
لْوِسْطْ إلأرْض
راحِت بِالعَرْض
عَلى بِير مَسحُور
تَحْت إلارض
خَزَان بِالطَول والعَرض
على خَط إلشَرق
عَنْد إلخَنازِير
يِشْرَبوا مِنُّه ويسْقُوا رحَالْهُم
يتْهَنُّوا
يعِيشُوا إلعِيشَه ويغَنُّوا
ــــ
فِيِه مقْيَاس جُوَّا ألأوضَه
يِعِد عَلِنا خِمْسَانَّا
لَحظَات نومنا
ده لو نِمنا
يعِد إلنُقَط إلتالفَه إلمَخْزُونَه
تَحْت قَفَانا
إلمَسْمُومَه بِغَمْ إلدُنيا
وحاَجَات إليُوم إلمَعْدُومَه
يِعِد نُقَطنـا إلمَوبُوءه
ومَاليَانه أموات
ما تجيِبْش إولاَد
ولا ينْفَع لِيها أى علاَج
كُل ما يِكْتَر عّدد إلاموات
يِفْشَخْ بُقُّه صَاحِب إلعَداد
ضَحَكَات ضَحكَات
حّدِد نَسْل إلْسِتَات
****
وكمان فيه مِقْياس مدسوس
مَخْصُوص
بِيعِد عَلينا خِناقَتنا ، صَرَاخَتنا
يسمَع شَكْوِتنا ، وأعْذَرنا
لأولادنا
يِرصُد حَسْرِتنا ، وخِيبيتنَا
وإيدينا إلفاضْيَه إلمَّدودَه
بِنْقُول لِلَّه
صَاحِب إلعَداد ؟؟ فَرْحَان
شَقْلَبَه تَنْطِيط عَلى بَلاوينا
وإلداهيَه لو شَاف بَسْمَه
أو رَصَدوا عَلينا كَام ضِحْكَه
أو كِلمَه :
نِعمِل لَمَّه
نِتْلَم نِنَفِس عَن رُوحْنا
بَعْد صَلاَة يُوم إلجُمعَه
تِبْقَى مُصِيبَه ونَكْبَه فُوق رُوسْنا
مِن غيَر تَهويِش
تكْييل فى إلمليان
لَمَّا نقُول جَاى
وِيْخَلُّوا سَواد إلليل كُل حَياتْنا
عَلَشان تِتحَرَّم ضِحْكِتنا أو لَمِّتنا
مِنْهم لِلَّه ، بَـكُّـونـا
مِن كُتر ما نِزْلِت دَمعِتنا
حَفرِت مَجَاريها عَلى خدُودّنا
مِنهُم لِلَّه إللى بَاعُونا

ــــــــــــــــ

مكسوف لك

أنا مكسوف لك وإنت بتحضُـن

إبن إلجذمَه حفيد بن جوريون

واقف تضحك ، وبتتبسم

بتقدم له فروض الطاعه ؟

طالب عَطْـفُه ورضاه وواسطه

عاوزه يوصى الوكر إلإسود

يخف الضغط عليك وتأبِّـد

ما أنت واخدها بحكم مؤبد

شكلك مزرى وانت مِطاطى

وانت بتضحك ويَّـا عدوك

طاطى ووطى وغطِّـى عليهم

بوس فى إيديهم ، إعمل عينهم

قول بلسانهم وإياك تِنْـكِر

إنت عميلهم ومراسلتهم

لمَّـا يعوزوا طلباتهم

تجرى وترمح ، بتجيبها لهم

ليه تتوسط على فايدتهم

وبتتكلم زى ما أمرك رأس ألحيه

إلإرهابى زعيم المافيا

وبتنحاز له ، لأ وتجامل

ضد مصالح الشعب العربى

كان أشرف لك نصر أصحابك

إولاد دينك ، أهل عروبتك

وللا نسيت مجازرهم لينا

ناسى إبادة الجند إلأسرى

فاكر إن يهودى بيحبك

ولا ها يحبك مهما ها تعمل

__________________

 

ألظروف ألتى يمر بها ألمصرى من خلل وتداعى فى حياته وفى مواجهة الفقر والعوز والحاجة وألإستغلال وسوء ألمعيشة ، جعلتنى أتقمص دور ألبخيل واكتب فى سطور بسيطة ما تخيلته فى مواجهة هذه ألآزمات المتلاحقة وألتى أمر بها طوال يومى ، كغيرى ، ولم أجد إلا دور ألبخيل ، ألذى يهيىء نفسه للحرمان والتقشف ألشديد

للهروب من أزمتة ألمادية 

ـــــــــــــــــــــــــــــــــــــــــــــــــــــــــــــــــــــــ
 
1ـ فى مواجهة ألتليفون 
 
تليفونى دا عامل قلق * بالذات لو حد جاى لنا 
يعمل مكالمة وأنا أتحرق * فى كل ثانيه منها 
خللونى شيلتُه فى ألدولاب * وقلت ضايع منِّـا 
وبأخاف أرد لو ضرب * ليحسبوها علىَّ أنـا 
 
2 ـ بخصوص ألزباله 
 
زبال عجيب ، طمَّـاع قوى * عاوز إلزباله يلِمَّـها 
وأتنين جنيه !! دى مهزَلة * واجب عليه يدفع لنا 
ما أنا هنا وفاضى لها * لا عندى شغله ولا مشغله 
وأشوف فى حاجه وسطها * أبيعها وأكسب مِنَّها 
 
3 ـ ألحلاقة 
 
حلاقه زيرو ، وحِلْلِّينِـى * لما ها يطول شعرهم  
ولا تيجى قشره ولا جرب * ولا صداع ولا جَرَب 
وحتى لو جالهم قُراع * ألقَرعَة جاهزه عندهم 
ويوفروا مَايَّـه وصابون * وفلوس حلاقة طول ألسَنَة  
 
4 ـ عداد ألمياه 
 
مـايِّة آيـه إللى بتمن * وفاتورة شهرى وحسابات 
دى ألشقَّة زحمة وضيَّقه * مش ناقصه تانى عدادات 
يا إمَّـا يـاخـدوا مٍِـنِّـنا * جـنيه ونص فى ألسنه 
يا أعمل طُلُمبه ونِترحِم * ولا تنقطع ولا ميكروبات 
 
5 ـ ألقهوة 
 
ألبُـن غَـالى وله ضَرر * والمِـيزانيَّـة مَِِـنَـيَّـلَـه 
وآيه إللى فيه ها تِشْرَبُه * دى شَفْطَه واحدة تـخَلَّـصُه 
وإن كان لا بُـد أو مَـزاج * وكَيـف يومـاتى بتشرَبُه 
أُقصُد صـوان وفيه عَـزَا * قَهْـوة ببَـلاش مِتْوَفَّـره 
 
6 ـ تنظيم ألنسل 
 
عيالى كتروا ، وها أتخنق * مابقتش عارف إسمهم 
بيناموا عشرة ع ألسرير * وإلأرض شايله زيُّهُم 
قَسِّمت نومهم مجموعات * وألصاحى ينزل يشتَغَل 
وألِم أنا كُل ألإيــراد * يمكن تخَلِّـف أمُهُم 
 
7 ـ سواق مصعد 
 
صاحب عمارة جنبنا * بخيل ويعرف سِـلوِنَـا 
مصعد عمارتُه مِعَطَّـلُه * إدِّيلُه حِسْبَـه وأجَّـرُه 
إنت بنفسك شَغَّـلُه * كُل إللى يركب ، دَفَّـعـُه 
وألدفع فورى ، بألنفر * فى إلليل أُجرَه مضاعفه 
 
8 ـ تصديـر 
 
إعلان فرِنسى جيه لِنَـا * طالب ضَفَادِع مِنِّــنا  
ب إتنين فِرَنك ألضُفدَعَه * وتكون تخينَـه مِرَبرَبَه 
شوربتها غاليه عندهم * فُرصَه وجاتنا من إلسما  
دا إلغيط بيشْغِـى مِنَّها * ورد لهم ل 100 سَـنه 
 
ألحلقة ألثانية من نبيل ألبخيـــل 
 
شعار ألبخيــل : 
أنا مش بخيل أنا كدة * إلحرص عندى موهبة 
مفيش رصيد تحت ألبلاط * ولا خردة توحد ربنا 
ما هو ألغلا سبب ألبلاء * وحكومة نايمة ، مطَنِّـشة 
ويادوب فيه عيش * من غير غموس بأوفَّـرُه 
 
1 ـ المعدة 
ألخبرة عندى فى ألطبيخ * متجرَّبة تلاتين سنة 
لو أكل حامض حَبِّـشُه * بالشطة ، وإغليه ، سَبِّـكُه 
قّعَّـد عيالك بعد جوع * وأقعد معاهم ، شَطَّـبُه 
ما تخافش أبداً من ألمغص * دى ألمعدة تهضم إلزَلَـط 
 
2 ـ ألأحذيـة 
لـزومـها آيـه إلأحـذية * ومعاها يلزم جوزين شراب 
غير ألرُباط ، وكمان دهان * وفـرشة سودا للهباب 
شهرين تلاتة بتنقطع * تصليح بكام ؟ أهو داه خراب 
خُد إلمفيد ، شبشب رخيص * وللفسح ، قبقاب خشب  
 
3 ـ أل CTA 
أتوبيس مكيَّـف يعنى آيـه * إلجــو فُـــل عـندنــا 
فى ألصيف ، حر مش قوى * فى ألبرد ، شمس ملهلبة 
دا يركَبُـه إبن إلذوات * إللى يخـاف مـن إلهـــوا 
لكن عيالنــا مِحَصَّـنه * تاخدها مَـشى ل دُنجُـلَه 
 
4 ـ ألسجائر 
ألكحَّـه جات لك م إلغـلا * إللى إلسجاير وصلتُـه 
وعشان تِخِف مِنَّـها * دّخَّـن سجايـر بـلطَجَـه 
لمَّـا صحابك يتهروا * مِنَّـك شحاتة و سَـفْـلـقَه 
روح لِلدخاخنى وإشترى * فَرْط أو بافره ولفها 
 
5 ـ ألعلاج بالخرزانة 
أى واحد بتشتكى * عفريت لابسها فى جسمها 
وعاوزه زار يطَلَّعُه * مع طاقم كوديه يفَقَّـروا 
خرزانة حلوة ملهلبة * والعلقة تعمل معجِزة 
تخلليها تصرُخ بالقوى * عفاريتى طلعوا من سنة 
 
6 ـ غذاء 
وألله جميلة فى عصرنا * أكل رخيص جابوه لنا  
إشى بالنخاع وده ببيض * وباللمون وفيه بروتين 
فرصة ندوقها فى ألغدا * خدلك إزازه ورغفين 
أكلات جديدة للعيال * شامبو يكَفى إسبوعيـن 
 
7 ـ كلاب 
فى كوريا لحمة مُفَضَّـلة * أنا قلت أكسب منَّـها 
بياكلوا إلكلاب ويمصمصوا * حتى ضوافر رجلـها 
وأوام عملت مزرعة * ما هى إلكــلاب مِتوفَّــرة 
وبعت ليهم عينات * وحالتى راجت بعدهــا 
 
8 ـ فبراير 
فبراير شهر محتَرَم * عارف حالتنا وغُلبنـا 
نفسى تكون كل ألشهور * زَيُّـه أو أقصر من كده 
أقَلُّـه ينفع قَبْضِنـا * يومين تلاته مع ألغـلا 
وفيها آيه لو زوِّدوا * 10 شهور وسط ألسنة 

يتبع

تطبيع

                        

شكيت من أدبى عاقبونى            الدول الفاجره  أدانونى

خدوا كل سلاحنا وعزلونا           وبك وقاحه حاصرونا

تطبيع ازاى ؟ دول ناهبينى         واهى أرض بلادى احتلوها

فى عز الضهر وسارقينها          والخير  واخدينه وخاربينها

حتى من  زرعى  حرمونى           وبيوت ومصانع  هدوها

والصلا فى القدس ومنعوها        راسمين على نهب اللى باقى لى

تطبيع مع مين ما تفهمنى ؟          مع مجرم حرب يهددنى

ويجرف أرضى يجوعنى            وبتهمه الباطله يسجنا

أو مع سفاح   بيقتلنا                 وكلاب مسعوره عقرتنى

على ايه نتطبع ؟ مش فاهم         على خيمه وملجأ نسكنهم

ونلف شوارع نتسول                القوت والاكل لأولادنا

ونسيب الاسرى ولا نسأل          وأبناءنا  تتاف أخلاقهم

بتقافه مغشوشه ومفضوحه        نتطبع ! نمشى على هواهم ؟

ما تغوروا فى داهيه وسيبونا      نجرى على حالنا بطريقتنا

وحدودنا الفاصله وياكم             تتحرم حتى على كلابنا

واللى يعديها ويجيلكم        خللوه عندكوا  مش عاوزينه

 

ودعاء لله امطار تنزل              على كل الارض وتغسلها

مسجد  وكنيسه تطهرها           من كل نجاسه سيبتوها

 

........................................

 

حرب ع الاسلام

يا موحدين بالله * دى حرب ع الاسلام * متعمده وقاصدين

دول جاهروا بالعدوان* واحنا يا حول الله  * لسه ولا فاهمين

 دى تكتكة اولاد * المسخ والخنازير * ملعوب من الملاعين

بقى الدمار والسلب* مشروع وكله مباح* والقتل له نياشين

ناقصنا ايه ينداس* كرامه وللا أرواح؟* على ايه يا ناس صلبرين

على خراب الدار    * والقتل فى الاطفال       * وحياه ولا المساجين

أو معجزه م الله     *  يبدل الضعفاء           *  وتيجى ناس تانيين

وللا ده ضعف وخوف * على القصور والمال * والسلطه يا مساكين ؟

يا خساره  ع الاعراب * نسيتوا حق الله       *  ونسيتوا نصر الدين

مش حجة الارهاب * والقاعده والابراج        *  ولا خلع عم حسين

دى حرب ع الاسلام* وهايضربونا كتير       *  ما هم العرب نايمين

امتى الجهاد بالروح * بالدم بالاموال ؟         *  ونبقى معتصمين  

امتى يجينا أذان   * ب حى على الكفاح ؟      *  واحنا نرد آمين 

نقسم بعهد الله    * وقلوبنا فيها أصرار        * نرفع راية حطين

نطلع نهد جبال    * نرجف قلوب آكلين        * السحت والمرابين

بالنيه والاخلاص * يعلا تانى الاسلام         * ع الخونه والضالين 

 

 

 

تولع أمريكا    انا مالى امريكا تتدمر  او تتفجر تولع  فيها الف حيقه تقضى عليها انا مالى اذا كانت خايفه وبتدور على ناس كارهينها وقاصده اذاها ويدوسوا كرامتها وابراجها العاليه ها تتكسر ************ تولع أمريكا ، يهدوها ،انا ايه ذنبى ما يهدوها يتساوى عاليها بواطيها ويذلوها ، ما يذلوها ربنا يجحمهم ، يرحم ناسهم أو ينقذهم مش بادينا ، مكتوب نافذ غصب عنهم كل اللى ف ايدى ندعى لهم ، يهدى ولادهم *********** لكن تتدخل فى حياتنا وتوجهنا ، أهو ده مالى مجانينها تألف كام كلمه ، تمسك فيها وتروجها وتقول تخاريفها وتمشينا زى ما عاوزه ، تخرب حالى والقوه السافله ورا منها بتهددنا وتقتلنا أهو ده مالنا وصلاح حالنا بندافع عنه بحياتنا ********** واذا منت الوقتى مانيش قادر ، عندى مشاكل وسلاحى على أدى ومش عارف أجمع غيره واخواتى موجوعه أو عاجزه ، ويمكن خايفه بكره هانتلم ونتوحد على عهد الله ونناصره  وسلاحكوا لا هايشفع ولا ينفع ، الله اكبر ها تدمركم

 

بُـكْــرَه

كُل يُوم بُـكْـرَه

هُوَّ بُكْرَه مَا بيخْلَـصش

قُـلْتُ لنَا كَـام بُكْـرَه

كِـتِير مَا يتْعَـدُّوش

إنْتُوا مَا زهِقْـتُـوش

بِتْقُولُوا وِبْتِنْسُوا

لَكِـن إحْنَا مَا بْنِنْسَـاش

عَـدِّينْهَا بِالْوَاحْـدَه

اليُوم عَنْـدُكُـم مَمْدُود

وبُكْـرَه لِسَّـه بْعِـيد

ويُوم مَا ييجِى بُكْـره

تِـرجـع تِقُـول بُـكْرَه

إلْعُـمْر كَام بُكْـرَه

إلعِلْم عَنْـد الله

ضَامِن تِعِـيش بُـكرَه ؟

علشان تقول بُكـره

طَـب لو ما جاش بُكـرَه

إزاى ها أطول حَقِّـى ؟

ها تسِدُّه فى إلآخرة

وللا أخده م ألورثة

ــــــــــــــــــــــــــــــــــــــــــــــــــــ

 محـو ألأُمِّـيـة

قول م إلأخر ليه تتعبنى

انت عاوز آيه فهمنى

قلت لى مره : انت متنبل

جاهل ، أُمِّـى

إمشى إتعلم

إتعلمت وخدت شهاده

وعرفت أقرا وبأكتب وأحسب

قلت لى تانى : عقلك صَـدَّى

ولازم ينضف

روح إتثقف

شديت حيلى ، عرفت إلتايهه

من جغرافيا للغه لسياسه

ولبسى أفرنجى ، وأكلى بشوكه

وشفت أفلام فى إلدش خطيرة

قلت : إتطور عيش إلموضه

جيبت أغانى جديده رقيعه

حفظت إللزمه

مشيت ع إلواحده

فى إيدى إلخلوى وراكب إلموجه

دخلت إلنت وشفت إلخَيـبَه

ــــ

جاى بتقول على وعى سياسى

روح إتأنـدِل

دانت مدهول

نفخَـه وفَشـخه

لكن ع ألفاضى

جيت بريَـالتَـك ، وعالجناها

كنت تِـتَهْـتَـه ، فَـوِّتـنَـاها

وإلملاعين عملوك شُخشـيخَه

دا ألمَفعُـوص فى إلكَـفر بيفهم

لو وَدُّوه أمريكا ، يديرها

وها يتواضع مش يتمنظر

ولا يعمل لنا طيار ولا دكتور

وإذا كان قصدك وعى سياسى

إنى أغمض عن بلاويكم

وأجرى أهلل مع تهـبـيـلكم

وأبقى مغمض على تزويركم

تبقى شهادتك ورقة أونطة

ونوديك محو إلأُمِّـيَّـه

**********

---

بيدعوا عليك

بتجيلك إلأخبار ؟ وقدرت تفهمها
وللا قالوا لك ، دول بيدعوا لك
دول بيدعوا عليك ، دعاوى ليل ونهار
أمطار على دماغك أول ما تيجى سيرتك
دُعَا يوَدِّى إلنار ، مرهون بأعمالك
دى إلناس بتترحم على زمن ولَّى
إلأشيه فيه معدن ، مش زمن " نَـانِّـى "
بقي الجنيه مليم وحتى ولا يسوى
فلاحنا كان مرتاح فرحان بمحصوله
وجاموسه بتمده بالجبنه والألبان
وتعاونه فى عمله ، دلوقتى جالها جنان
ما عدش عنده طيور ، خايف يموت م إلدور
وزمان لَقُـوا أرباح ، مش شركه مديونه
إدارتها خربانه ، إنت إللى جايبهـا
قَوِّتها وسَانِدهَا ، راسمين على بيعهــا
تاجرتوا فى ديوننا ، إللى انتوا سالفنها
وإنتوا إللى صرفينها ، وما وصلش لينا فايده
إلناس بتترحم ، فين كرامتنا ؟
بعد ما كان لنا جاه وراسنا مرفوعه
مرغتوا عزتنا وسمعتنا فى الطينه
شحتوا لقمتنا ، مسحتوا كل نبيل
مسختوا كل جميل
بتفهم ألأخبار ، ولسه مستنى
غيرك دا كان ولِّـى ولا عمره يستنى
وهُوَّ من نفسه ، يكسر فى راسه قُلَّـه
***********

 سَــاعْدُونِــى
سِلاَح عَدُّوى مِن مالِى * عمل لُه دَانَه وطيَّارَه
يِضرَب اخُويا ويصِيبُه * باعِت له إلمُوت فى دَبَابه
إلعَيب ما حَدِش واعَّانى * أو جَهل مِنى ومِشْ قَاصْدى
بَدَل عِتَابنا سَاعْدُونى * خَلُّونى أكَفَّر عَن ذَنْبِى
نِلِم مالنا نِشوف حَالنَا * ومَفِيش غَريب يِدخُل بينا
بِإلذات عَدوِّى إلأمريكى * وإبن إلحَرام إلصَهيُونى
وَقْفَه ونِضْرَب مَصَالِحهُم * نِسْحَب فلُوسْنا ، ها يِتْعَروا
تِقفِل مصَانِع تَسليحْهُم * تِتْشَل إيدهُم يِتْذَلُّوا
ولا غَاز ونَفطْ ح يوصَلهُم * يحُطُّوا مَيَّه فى مَكَنْهُم
نِقْطَع عرُوق ونْسَيَّحْهَا * وبينا وبينهُم حَدْ ألله 

ــــــــــــــــــــــ

زَفِــة زَارْ

 

بخُور وِزَفِّة زَار

بالطَبله والمُزمار

حَلقَات ، طَابور تَفْقِير

 على شَعْوذَه وتَدجِيل

و إلنَاس  مِن إلمسَاكِين

بيخافوا  مِن إلعَفْريت

مَاشيين وَرَا خُدَام  إلجِن بِالقَرابِين

   ورَايَات عَلَيها تصَاوير

رِسوم  مِلُـوك إلجـان

وإكْوام مِن إلقَراطِسْ

 مَليانَه قُولِة آه

بالعَهْد لِلْعَفريت

سَماح يَاسى إلعفريت

خَـرَّج لنا إلمحبوس

  من قُمْـقُـم إلمتاعيس 

   أخْرُج مِن إلمَلمُوسْ

وإبعد عَـنِّـنا ألملاعين

 إصحابك إلشياطين

ـــــــــــــــــــــــــــــــــــــــــــــــــــــــــــــــــــــــــــــــــــ

مش كفايه كفايه واحده

مش كفايه كفايه واحده
اكتبوا مليون كفايه ، اصرخوا ملايين كفايه
قد تشريدنا ف بلدنا ، قد جوعنا وعجزنا
قد كل ثانيه اتحبس فيها بريىء ، اتظلم فيها ضعيف
قد كل لحظة خوف ورعب عاشها واحد مننا
دخلت لبيت فى الفجر ، ومهما كان هو السبب
قد كل اسره فيها عاطل فيها بائس ، فيها يائس
قد كل المحرومين ، المنداسين ، المفجوعين
فى امالهم فى حياتهم ، فى نفسهم
قد كل قرش اتصرف من غير رضانا وعلمنا
اتسرق ، اتنهب ، ضاع علينا راح لغيرنا ، غصب عننا
قد اللى ضاع من وقتنا ، واللى راح من جهدنا
من لحمنا ودمنا ، نرجى السراب ، على مفيش
قد الرشاوى والمحسوبيه ، قد الدعاوى الباطله
قد كل حبة رمل من ارض مصر ، اشتراها ، داس عليها الاجنبى
قد كل كلمه زايفه ، وصوره فاسده غشوا بيها الناس الطيبه

ـــــــــــــــــــــــــــــــــــــــــــــــــــــــــــــــــــــــــــــــــــــــــــــ

حرية ألتعبير وإبداء ألرأى ، لتفصح عما  تحبه أوما تكرهه ، أصبحت من الممنوعات ، من الجرائم التى يحاسب عليها القانون ألمفصل وألمكيف     لصالح الحكام لتكميم أفواه ألناس ومعاقبتهم على آرائهم  والزج بهم فى السجون وإستحداث  التهُم لمن تسوِّل له نفسه إعلان الحقائق أو ألمطالبة

بالعدل والحق  أوحتى مجرد التعبير عما بداخله  .

لا نملك إلا أن ندعو ألله  وألإستعاذه به عز وجل من شر حاكم ظالم ومن قَهْـر الرجال وأن يقينا شرور من لا يخاف الله ، وندعوه أن يلهمنا الصبر والقناعه والتحمُّـل والرضى بما أبتلينا  ، وإنا لله وإنا إليه راجعون .

 

أحْسَن  أسْكُــت

 

أنا لَو أقُول  رأيِى بِرَاحْتِى

قُلت إلحَق وِآيَه ينَاسْبنى

وَلْلا أخْتَار واحِد يعْجِبنى

عَارِف إنُّه يِشُوف مَصلحْتى

فِكْرَك يَعْنى هَا أقْدَر أروَّح ؟

دا أنا ها أتسَاق وأتشاط وأتسَوَّح

وهَا أنام واقِف جُوَّا إلمَحْبِسْ

   وِإلتَعْذِيب ها يكون  على أصلُـه

    كأنى سجين فى جوانتانمو 

كل جيرانِى وعيلتى وأهْلى

ها يلمُوهُم ، نَفْخْ  فى عَلقَه

وإللى يروح  بعد إلفسحه

ها يمشى يـلوِّش

ولسانه يقفِـش  

مَحْضَر رَسمى ها  ألاقِيه بإسمِى

عَلَيه بَصَمَاتى وتَوقِيع إيدى

 وفيش تشبيهى بيثبت جُـرمى

وشهُود ياما  بتشَهَد ضِدِّى

 يقسموا إنِّى

    عميـل ، إرهابى      

 بِتَمويل خارجِى

 وإللى أنا كاتبُه خَواطِر عِيشتى

يأخدُوه ضِدِّى  

 بالتَخْفِيف قوِى قَوِى تأبيدَه

وأحمِد رَبِّى ماقَالوشْ إنى

جاسوس على بلدى 

  وكان نتيجتهَا إعْدَام فَوْرى

يبقى  إلأحْسَن أسْكُت ،  وأكتِـم

واخَلَّـى لِسانى فِى بُقِى وأخْرَس

تِعْمَر تِخْرَب ، هِىَّ بَلَدهُم

وإحنا ضُيَوفهُم

مش حَقِنا ولا نِتْنَفِس

دِيه طَريقِتهُم

لو مِش عَاجْبَك

هَاجِر ، إرحَل غَيَّـر بلدك

وإوعَى تفَكَّر يُوم تِتْكَلِّم

******

 

 

الوابور
قطر الباجور قشاش
مش ماشى طوالى
فى كل حته جراج
فى الواسطه والقبه
بيعبى ما يونش
من كدابين زفه
لناس ماهيش فاهمه
سواقه متعافى
وصوته صوت عالى
وحبتين تهويش
بالردح والتلطيش
بقى الوابور ملكه
ويقاول الركاب
ع الاجره والاتعاب

ـــــــــــــــــ

 

 

بُكْرَه يِمْنَعُوا إلصَلاَة

 ***************

 

رَسَمُوا طَرِيقنَا فى إلحَيَاه ، مَلُوه ثَقَافَه مِش لِنَا

غَسَلُوا عُقُولْنَا كَام سَنَه ، وإلفِتْنَه دَخَلِت قَلبِنَا

صَبَحْ كَلاَمْنَا مِن إلشِمَال ، وفْرِحنَا كِتِير بِالعَوْلَمَه

أَخْلاَقْ ، عَادَات إتْغَيَّرِت وإلدُنْيَا بَاتِتْ هَمِّنَا

****

شَايْفِيِّن نِفَاق وكَدَّابِين ونَاس تِمُوت فِى إلمَسْخَرَه

وعِرفُوا أيه إلدِيسْكُوهَات ، وبيِشْرَبُوا فِى صِحِّتُه

وجُونِلَّه مَيكُرُو مِخَرَمَّه وبَدْلَه جِينْز مشَجَّرَه

كُلُّه مُبَاح ، خَمْرَه وفُجُور وإلبَنْك رِبْحُه مِن إلرِبَا

****

نَسُّونَا إيه فَضْل إلجِهَاد فِى سَبِيل الله وعِزُّتُه

وحَدِّدُوا لِينَا إلأيَات فِى إلكِتَاب إلمَدْرَسِى

إلأهْل تَاهُوا ، إتْوَحِّشُوا ، بَقِينَا نَاكُل بَعضِنَا

وكُلُّه نَايِم فِى إلعَسَل ،أَخِرْ سُطَل ولا هِنَا

****

وادِى إلنَتِيجَه يا مُسْلِمِين بَدَأ إليَهُود يبَرْطَعُوا

بَنُوا إلجِدَار وحَصَّنُوه وإلقُدْس ضَاعِت مِنِّنَا

وإلصَهيُونيَّه إتْمَرَدِت ، كَشِّينَا إحْنا فِى جِلْدِنا

وإلغَرْبْ حَرَّم إلحِجَاب ، وِبُكْرَه يمْنَعُوا إلصَلاه

****

مِين يَا نَاس يرْضَى إلهَوَان ، ويَوالِى كَفَرَه ومُلْحِدِين

يهَاجْمُوا دِيِنَّا ويعْتِدُوا عَلى الشِعُوب إلمُسِْلمَه

لمَّا نِعُود ومُخْلِصِين لكِتَاب الله وسُنِّتُه

ونْعِزْ دِينَّا ونِنْصُرُه ، ينْصُرنَا عَلَيهُم رَبِنَّا

******************

يا نِشْرَب ، يا نِسْتَحَمَّى

 

مِنْ قَبل خُوفُو  ومَصْر هِىَّ

وناسها  عايشه فى خير ونِعمه

لكن فاقَعْـنا أَهل الفَتَاكَه

طِلعوا ب  إشاعه، مِلَفَقِينْهَا

تخدِم غَرَضهُـم ، بيقولوا فيها :

إلنيل مِزَفِت مِن كُتر طِينه والبلهارسيا 

 ومِش مِكَفى يا إما نِشرَب يا نِستَحَمَّى

وسَابُوها تِخْرَب ، لا  حَدْ نَضَف

 ولا حَدْ حَلِل  ولا حَدْ كَرَر 

عَلشَان يبِيِعُوا  مَيِّة أبَارنا

 يتَاجرُوا فِيهَا ويخَصخَصُوها

وإلغُرَبَا ييجوا  يعبُّـوهَالْنَا

 والمَصْرِى يِدْفَع والمَخفِى يِكْسَب 

وحَبَّه حَبَّه تَمَن إلإزَازَه

ها يغلَى أَكتَر مِن لِتر  خَمره

ويبقى أَرخَص لَو سَطل بِيرَه

علشان نِبَلَّع ، ودمَاغنَا تِلسَع

والضِحْك يعلَى  ونُكَتنَا تِكتَر

عَلَى خِيبِتنَا وعَلَى مْصِيبِتنَا

يرْحَمْ جُدُودّنا ، شِرْبُوها خَامَه

مِنْ غِير لا شَبَّه ولا  رَوَّقُوها

وعَاشُوا أَكْتَر وبْصِّحَه أَجْمَد

مِن الزمَان دَه أَبُو زِيَتْ نَبَاتِى

ـــــــــــــــــ

حِكَـايِـة أم طارق

 

عَـند أم طَارِق تَلاتَـه طَـارِق

طَبعــاً  وَلِيـدْهَـا

وجُـوز البُنَيَّـه والوَاد حَفِيدْهَا

والسِت دِيَّة صَاحْبِة مَشَاكِـل

دَايمَاً تِنَادى وصُوتْهَا عَالِى :

يَــا  وَاد  يَـا  طَـارِق

حَفِيدهَا ينْطَـق :  نَعَـم يَا سِتِّـى

تقُوُل : مِـشِ إنْـتَ

فَين إلْمِزَفِّـتْ خَالَك ، نَادِى لُه

****

بِنْـت أُمْ طَارِق تِنَادِى : طَارِق

يرُد جُوزْهَـا :  فِيه آيه يَـا لُوزَه

تقُـول مِشْ إنْتَ ، بَنَادِى اخُويَـا

طَارِق ينَادِى : إسْمَـع يَـا طَارِق

يـرُد طَارِق إبْن أُم طَارِق

آيْـوَه يَا عَمِّـى

 يقُول :  مِشْ إنْتَ ، أنَا عَاوِز  إبْنِى

وعَشَان أُم طَارِق حَمَا شِدِيدَ

وبِرَّاوِيَّـه ، عَاشْقَه  إلمَصَايبْ

قَالِت ل لُوزَه :

يَا تخَلَّـلِى جُوزِك يغَيَّـر اسمُه

وإسْم إبْنُـه ، كِفَـايَه وَاحِد

بإسْم طَارق

يَا تِبْـرِى أهْلُـه وِسِيبِيه يطَلَّـقْ

الْبِنْت لُوزَه بِتْحِب جُوزْهَـا

قَالِـت يَا أُمِّـى : قُـولِى لُـه إنْتِـى

أخَافْ لَيَاخُد عَلى خَاطْرُه مِنِّـى

قَالِـت اُمْ طَارِق : بِتْصَدَّرِينِـى

مِشْ هُوَّ جُوزِك ؟ عَنِّـك مَا قُـلْتِـى

ومِن النَهَارْدَه مَمْنُوع عَلَيكِـى

تِيجِى تزُورُينِى ومْعَاكِـى جُوزِك

خَلِّـيه فِى بَيتُه ،  يُقْعُد مَع  أبْنُـه

تِجِيلِـى وَحْدِك وِبَلاش طَوَارْقِـك

ومِن يُومِيها والبِنْت لُوزَه

قَاعْدَه فِى حَبْسَـه

خَايفَه اُم طَارِق

وعَشَان أُم طَارِق قَادْرَه وعَافِيَّـه

بَعَتِـتْ فَوَاحِش لِلْبِنْت لَوزَه

يهَزَّأوُهَـا ويرْدَحُوا لْهَـا

وعْيَال صِيَاعَـه سَرَقُوا غَسِيلْهَا

وِمَرَّه كَـسَرُوا شَبَابِيك أوضِتْهَا

لَو عَـدَّا واحِد أو جَات جَارِتْهَا

بِسُرْعَه تِبْـكِى وتُقْـعُـد تِوَلْـوِل :

   فَينِـك يَا كِـبْدِى ؟ فَينِـك يَا بِـنْتِى ؟  

جُوزِك حَارِيمْنِى أشُوف ضَنَـايَـا

وبَعـد سَاعَه تِبْعَـت عِصَابَـه

يكَسَّرُولْهَـا فِى عَفْش بَيتْهَـا

وضَرَبُـوا جُوزْهَا ، فَتَحُوا دِمَاغُه

وسَرَقُوا سَاعْتُه وعَجَلِة إبْنُه

تَاخُد اُم طَارِق كُل الحَاجَات دِى

وتْقُول دِى مِلْكِـى ، مَا دَام لِبِنْتِـى

حَاجَه مِن رِيحِتْهَا تْهَوِّن عَلَـيَّـا

وأنَا أوْلَى مِنْهُم  " جُوز بِنْتِـى وإبْنُـه " 

 شَـرْع أُم طَارِق  ،  إلْبَظْـرَامِيطَـه

  هَىَّ إللى تِخْرِب  وتِجْرِى تِشْكِـى

تَاخُد مَا تِـدِّى وِتْقُـول : دَا حَـقَّـى

قَانُونْهَا مَاشِى ف كُـل إلأزِقَّـه

عَلى أى  رَاجِـل قَبْـل إلوِلِـيَّـه

 والعَـافْيَه سَهْلَـه عَند أُم طَارِق

لِسَانْهَـا مَبْرَد وإيدَيهَا طَايلَـه

  ومعَاهَا صايَّـع يِشْرَب ويِضْرَب

ياخُـدْ بَرَاءه " مَاهُوُشْ فِى وِعْـيُّـه "

**********

      القمه ليه  ؟  

 

القمه ليه يا محترم  ؟  *   دا مفيش وِفَـاق ولا  إتْـفَـاق 

    ولا حتى بيع  ولا شرا

أَخَويَّـه بَس على الورق  * لكن الحقيقه فى القلوب     

  إنتوا عبيد إلمَصْلَحه

عمر التاريخ ما بيتنسى *  هاتوا مَرَّه واحده مؤتمر   

   جَات مِنُّـه فايده أو رَجَا

كل مره فيه بيان      *  صندوق لِـدعم إلمِظْلومِين  

  فاضِى مَافِـيهش خَرْدَلَـه 

وتحذيرات رَفض وشَجَب  *  وتهديدات مَالهَاش أثَـر 

  دايماً نِشُوفهَا مُضْحِـكَه

عَمَلتُـوا آيه لإسرائيل     *    غير إلخُضُـوع و بْنِنْدِبِـح  

    والله دِى حَاجَه مُخْجِـلَه

 إحنا السَبَب فى كُل دَا     *       لَـمَّا ظَلَمْنا نَفْسِـنَا     

 سَلَّـطْ عَلِينَا رَبَّــنَا

أهل إلخِيَانَه وإلفَسَاد      *  بَقَينَا  أُمَّـه  مَلْطَشَـه     

  والخُوف مَلَى لْنَـا قَلْبِنَـا

خُفنِا إلقِتَال مِن ضَعْفِنَا    *  خَفْنَا  إتِهَام المُعْتَـدى    

  قُـلْنَـا السَلام مِن غُـلْبِـنَا

مَلْعُـون أَبُـوه دَاعِى السَلام * وابُو طَاقِيَّـه إلمُغْتَصِب      

 والأمرِيكَـانِى الرَاعَيَـه

مَا تصَلُّـوا بِينَا عَلى النَبِى * دِينَّـا أمَانَه وأرضِنا      

  مَالنَا ونَاسْنَا وعَرْضِنَـا

والمُوت طَايلْنَـا كُلِّـنَا    *   نِمُوت فِطِيـسْ وِمَذْلُـولِـين 

  وَلْلا بكَرَامَه وتَضْحَيَـه

 بَلا عَولَمَه بَلا مَسْخَـرَه  *   وشُوفُـوا حَل يفُـكِّـنَا     

   مِن إلمَهَانَه  والبَـلا

إنسُوا  المَنَاصِب وإلثرَوَات   *  ومَرَّه واحْدَه نِـتِّـحِد    

  يحكُـمْنَا شَرْع رَبِّــنَا

بَدَل مَا تِبكُـوا وتِندَمُوا   *  مِن سَخْـط كُل إلمسلمين  

 أو  إحتِلال إلأجنَبِـى

   ــــــــــــــــــــــــ

 

مَـــدِّدْ

 مَـدِّدْ  ، إفْـرِد رِجلَـك رَيَّـح

أقعُد وإسْنِـد ، رَحْـرَح

البيت بيتك ، إنت فى مِلكَـك

إرمِـى زبَـالتك وإحنَا بنِـمسَح

آيـه إللى مضَايقَـك ، رُوح إتفَسَّح

نَغْـنَغ نَفسك حَبَّـه وإفْـرَح

حَاطِـطْ لَيه إيدَك عَلى قَـلبَـك

خايف وإنتَ  لوَحْدَك  ؟ أُصرُخ  

نَادِى  أصحَابك  يقعُدوا جَنْبَـك

إنت شايفهم ؟ خايفيين زَيَّـك

لتقوم عاصفه فى لحظه وتكسح

لما بتفتح مش ها تخللى

ها تشيل كله ، فوقك ، تحتك

وما ينفعش معاها تطاطى

**********

    كُرْسى  إلوِزَارَه 

كُرسى إلوِزاره  دَاق إلمـراره        بيقول ويصرُخ سيبونى فاضى

ما هّوْ ياما جَانى أصْحاب مَعالى       وِهِىَّ  هِىَّ  نَفـس إلرِوايـه

فِيه ناس بِترحَل ويَّا  إللى ماشى       وِناس بِتْكْبر تَبـع  إلسعـاده

وعَشان جَنابُه  بيجدِّدونـــى         وِيحُطوا لَزْقَه مِ  إلأمْريكانـى

يقْعُد  مِرَحْرح ، يقول ونسمـع :         من بكره نزرع وبعده نِصْنـع

وإلأكل يرخَص وإلشَعب يِلْقــَى        عَصِير جَوافه ومَانْجَه  طَازَه

ولكـُل عِيلـَه فِيلَّلا بجِنَينَـه  !!       وإلصحبَه تِمْدَح ، ( تِشْرح وتِعرِب

وِدَاه يِصَــوَّر وغَيرُه يكْتِب :          كِنْز إلمَغـاره عَلَى إيدُه قَرَّبْ

شهُور تِعـَدِّى وسنيـن بتِهْرَب         لا عَمَلنا إبـره وَلا كَلْنا فِجْله

حَتَّى إلزِباله خّدْهـا إلخَواجــه        وإلعِيشَه غِليِّت خَلِّيتْنـى أفْرْقَع

مِن إللى شايفُه ، مِش عاوِز أفهَم       سيبوها ماشْيَه بِالبَركَه أرْحَمْ

*********************** 

 

سـألتُـوا ؟

 

سألتوا لَيه شبابنا مِش لاقى هِنا رَاحتُه

نِفْسُه يلاقِى نَفْسُه ، يعمِل لُه مُستَقبَـل

وِتِبْقَى لُه عَيْلَـه ، عَيِّـل يشِيل إسْمُه

ها يجِيب مِنِين شَقَّـه وإلعَفْش وإلشَبكه؟

شهاده ع الحِيطِه ، وإلخِبرَه ولا تِسوى

قَاعدين بدون شُغْلَـه صِيَاعَه أو قَهوَه

وأكيد ها  يتعَلِّـم يا البَانجُو يا الخَمرَه

مِن زَهَقُه ها يبَرْشِم ، ويا خُوفْنَا لو شَمْشِم

وعرفتوا كام واحد إتسَلِّـف ، إدَّاين

بَس عَشَان يمْشِى مِن بَلَدُه ويغَامِر

سَفَرُه  مَاهُوش شَرْعِى ومِنهُم كِتِير غِرْقُوا

كِتِير رَاحُوا ورِجْعُوا ، رَحَلُوه إلخَوَاجَات

عَلى مَصْر مِتْكلبِش ، وحَتَّى لو عَانُوا

بيحَاولُوا مِن تَانِى ، يتمَنُّـوا لَو هَاجْرُوا

 

سَألتُوا لَيه إلأطفَال سَرحَانه فى الشَارع

نَايمَه وعِريَانَه ، مِنْهُم بِيتشَدُّوا

ع إلسِرقَه والإجرَام ، وفي حَاجَات أفظَع

سَألتُوا لَيه بِيشْحَت ؟ وحَرَامِى لَيه يسْرَق ؟

ولَيه رَاحِت تِسْرَح ؟ وبيَاخْدُوا لَيه رَشْوَه ؟

بالذُوق وبالعَافيه ، ولَيه عَامِل فِرْدَه  ؟

ويقْطَعُوا إلسِكَّـه ، والمُخْتَلِـس مِن آيه ؟

بِيْحِبُّـوا فى سجُونْكُم ، وللا دى عَادَاتْنَا

وسَألتُوا لَيه إتْبَلِّـد إحْسَاسْنَا وضحكنا

  طَنِّشْـنَا مِن ضِيقنا واليَأس وقَرَفْنَا

إلقَهْرَه خَنَقِتْنَا ، وخَنَقِت إلكِلمَه

دِلوَقتِى لا هَاتِسمَع كَلام بِحِنِّـيَه

ولا  ذُوق ولا رِقَّـه ولا بَسمَه م إلصَافْيَه

كَلامْنَا عَن إلمَاده وِسَبْ وِشْتِيمَه

********

 

مِيِتْ عِصَابَه

غَطُّوا عِينَا بِمِيت عِصَابَه     لاَجْل مَا نشُوف إلْلِى جَارى

إللى ماصِصْ خَيْر بَلَدْنا       وإللى طَافِش بِالمَصَارى

إللى هَابِش وإللى عَبَّىَ         وإللى خَبَّىَ كِتِير وجَارى

وإللى فاتِح سُوق بَلدْنا       لِلْمِسَرْطِن وإلتَقاَوِى

إلزرع منها فاكهه  مَاسْخَه         والخُضَار  وارِمْ   وغَا لى

 وإللى باعُوا تُرَاث بَلدنا     م إلمَصَانِع   والصَحَارِى

            لِلشَواطِىء واللأرَاضِى     وإللى  خايف م المُعَارضَه     

وإللى حَابِس ناس بَرِيئَه    وإللى بَانى قُصُوره بَرَّه

وإللى حَوِّش وإللى كَوِّش    وإللى شِبْعُوا وجَوَعُونا

وإللى بَارِك فُوق نَفَسْنَا      بالطَوَارِىء  والسِياسَه

وإللى نَاوِى يِعِيد تَاريِخْنَا      لِلْمَمَالِكْ  بِالوْرَاثَه

*********************************

 

كِفَايه كِفايه

كِفايه ، كِفَايه ما عَدْش معَايَـا ** صَبْر أستَنَّـى لسـِت سْنيـن
عَشان تتحقَقْ حاجَه فى مُنايـا ** زَى إلنـاس إلبَنِـى آدْميــن
ألاقى حياتـى ، أعيش بِكَرامتى ** نِفْسـى أرتاح قَبـل إلتأبيـن
عَذَبنـا إليومى وَرانـا ورانـا ** دوخَه عَلى حَاجَه مِن إلتمْوين
إيدي مِش طَايله ولا فيِه شُغْله ** وِزَيِّى كتيـر ملاييـن ضايعيِّن
فِيـِه خَير جَانـا ولَّلاَ فرِحْنـا ؟ ** دا كُلُّـه غَلـا وكَلاَم تسْكيـن
إنتُم طَقـْم إلحِزْب إلحاكِــم ** فىعِزْ وسُلْطَه وجَاه عَايشيين
وِقْصُور يَامَه وكام سيَّــاره ** كَلُّـه عـَدَّى فُـوق إلملايين
وإحنـا وِلاَد إلبَطـَه إلسُـودا ** بُؤس ومَرضَى وفَقـْر سِنين
إمتى تِسيبـوا إلشَعْب لِحالـه ** ياريت دِلْوَقتى ، بنِدْعى آمين
********

إرمـى زبالتك

  
مَـدِّدْ ، إفْـرِد رِجلَـك

 رَحْـرَح
أقعُد وإسْنِـد

 رَيَّـح
البيت بيتك

 إنت فى مِلكَـك
وسَّـخ وإرمِـى زبَـالتك
إحنَا بنِـمسَح
آيـه إللى مضَايقَـك ؟

رُوح إتفَسَّح
شتِّـى وصَيِّـف ، لِف إلدنيا
نَغْـنَغ نَفسك حَبَّـه  وإفْـرَح
حَاطِـطْ لَيه إيدَك عَلى  خَدَّك
فيه آيـه شاغلك ؟

 آيه بيهمَّـك ؟
خايف وإنتَ لوَحْدَك

 أُصرُخ
نَادِى إلصُحْبَـه  يقعُدوا جَنْبَـك

بُـص عَليهُـم

 

 بُـص فى عينهُـم
خايفيين زَيَّـك
لتقُـوم قُومَـه فى لحظه وتكسح
ما هى لَمَّـا بتفتح

 مش بتخللى
ها تِقْسِـم وِسْطَـك

 إنت وهُـمَّـا وأهلك
وما ينفعش معاها تطاطى
أو تتمسكن ، ولا  تستموِت

ولا   ها يفيدك  كُترِة  مالك

ولا ها يغـيتَـك  كُـتر  ديُـولك  
ولا  أعوانك

 كلُّـه ها يجرى
وغَصْبِـن عنك  قاعِـد مرزى
فى  إلزنزانه  زى القُنْفِـد  

  وإنت مقرفص
  مِـش ها تفلفص

  وها تتخوذق  وها تتفلق  
  وتدوق حاجة من ظُلمَـك وغَباوتَـك  
إبقى أطَّـمن ما انتش وحدك
كل عصابتك  كَلَبُوش زيَّـك

 

 

أمر  غريب 

الجينز  زماره بصابونه بادخله

واخاف ليتفتق ، الحركه بمسطره

بلوزتى  الاستوماك لحد سرتى

بفتحه مأوره  تهوى معدتى

معروفه فى كل مول بالشيشه والمحمول

وكل اصحابى رجاله تهوى الليل

نشرب ونتعشى ما ادفعش ولا مليم

والليله تتقضى بيروحونى على طول

ولما  أقوم  م  النوم بالاقى  أمر غريب

صديرتى مفكوكه والبنطلون  مقلوب

 

**********************

معادلة

معاك  سلاح  ، أسمعك          وأعمل حسابى فى  الكلام

لأغلط  معاك  وأنرفزك          وتبقى  ليلتى  مطينه

 

ولو  مفيش  ها أشتمك         وان قلت   بم   انفضك

كبير  صغير أضربه          واللى يحوش  ها  أشرحه

        *****

العبرى عبى الطيارت         بدل  الرصاص  جاب  صاروخ

والعربى نازل فى حكايات    ملخصه ، تفهم  تدوخ

 

معادله  سهله يا  مسلمين      ياللى كلامكم  فيه حكم

وغنا  وحكاوى عن السلام     ومفيش معانا  غير  حجر

ــــــــــــــــ

على أيه تِبَحْلَق

 

 دى مِش لِيَاقَه ، دِى حَاجَه تُخْنُق

  أنا لابسَه مَاكسِى ، عَلى أيه تِبَحْلَق 

 صَحِيح دَا  مَاكْسِى لَكِن  مِلَزَّق

   مِن فُوق مِفَتَّح وتَحْت ضَيَّق

   وكُلُّه  كُلُّه  قُمَاش رُقَيَّق

   بَأشُوف أيه تَحْتُه وإزَاى مِزَوَّق 

مِن تَحْتُه عَادى طَقْم إلبِكِينِى

   دَانْتِيلا أصْلِى ولُونُه وَرْدِى

  أنَا قَصْدِى تَحْتُه !! تَحْت إلْلِى تَحْتُه !! 

 دِى واشْمَه  ورْدَه  ومصَمِّماها أنا بِنَفْسى

 ممكن أعَاين إلرسم نَفسه على طَبيعته

 بَدَل مَا أبحلق وعنيَّا تِتْعَب ؟ 

 ما هُو رَسم واضح ألوانه زاهيه

ألورده باينه

وليها ريحه ، بارفان باريسى 

 خلِّينى أقرب ورِّينى أكتر وشَمِّمينى   !!!!! 

 كِدَه ها تضايقنى

 مش واخده راحتى

ما تسيبنى واقفه  أقعد وأمدد

وليه تراقبنى ؟

 وحَبَّه حَبَّه  تيجنى جانبى و ها تشم ريحته

 

ـــــــــــــــــ