Ang talon ng Maria Cristina ay ang pinakamalaking mana ng Iligan at isa sa tanyag na tanawin dito sa Pilipinas. Ito ay itinuturing na pinakamarilag sa dalawampung talon na matatagpuan sa “City of Majestic Waterfalls”- Iligan City. Nasa taas na 320 talampakan at 9.3 kilometro ang layo mula sa lungsod. Nagmumula ang tubig nito sa Lawa ng Lanao na matatagpuan sa Marawi City at dumadaloy patungong Agus. Sa katunayan, siyamnapung bahagdan ng tubig nito ay ginagamit sa pagsuplay ng enerhiya sa hydroelectric power plant, ngunit nananatiling mapang-akit ang lagaslas nito.
Ang talon ng Maria Cristina ay nakapagdulot ng kaunlaran at nakadagdag ng kita kahit na ito’y kilala o tanyag na tanawin sa lungsod na nakapagbighani sa lokal at dayuhang turista. Ito rin ay nagamit bilang tagapagtustos ng kuryente sa walumpung porsyentong kabuuang pangangailangan sa Rehiyon ng Mindanao. Nakapagpadali sa urbanisasyon ng lugsod ang pagpapatayo ng planta nito noong 1952. Hindi mabilang ang mga industriyang napatayo at maraming tao ang nakipagsundo para mapa-angat ang ekonomiya ng lungsod ng Iligan. Kaya ang Talon ng Maria Cristina ay kilala bilang "Mother of Industry" at “Fountainhead of Progress” .
