Dawchhau

1

Krista Pahnona Rohpahapa

August 12, 2006

Chahrasala Krista liata pahnina ta kha mania a chhitupa nata keimo hmapata su to liata ano pahnona ro a patheisatupa Khazohpa lana chata alyna bi y maw sy! Pachha haipazy liata nata leidia haipazy liana chata Khazohpa chata Krista ro pahapa cha tloh pi ta. (II. Kawr. 2:14-15).

Hlano Roman sawhkha abeino ta adyupa chariahzy a pahnina daihti mai liata cha pahnina kyhchhi rohnahpa atao lyma tyh. Talaili rohnapa cho liata a tyupa pheisai beipa cha hmiala ta si lyma ta, chatawhna chata a pheisaizy sahlao zy cha pazi ei ta, cha hnola na chata parotheipa atotupazy nata biehneitupazy ama pazi tyh. He tawhna he ta pheisai chakhypazy ta ama patupa chariahzy cha ama khipi chhoh la ama vaw chhi tyh. Kyhchhi arona via thei nawpata Rawma khipi chhoh liana cha ropahapazy rao eita, chyhsa tota cha rohpahapa atheipa maita cha kyhchhi cha “pahnina kyhchhi” a cha tahpata pahno theipa a cha.

Lyuchapa Pawla ta he yzi he a thei lyma. He pahnitupazy hawhta Krizypazy ama cha awpa a cha atah. Pawla reizi ta cha Khazohpa ta Zisu Krista zawzi ta keimo chhao ano pahnona rohpahapa cha awpata raopa eima cha a tah. Eima sina mai liata, eima chakaona mai liata, eima yna mai liata he pahnina rohpahapa he a tobi lyma awpa a cha. Ngiapaleipazy ta cha pahnina rohpahapa vata Khazohpa ronana ama pahnothei hra aw.

Chyhsazy ta he pahnina rohpahapa ama hneina heta Krista Zisu ama hrona liata liasa a y haw tahpa a palasa. Chyhsazy ama thailei chana hrona tawhta Krista ropahapa padisa sawhr’aw pahe tovyuh rohnapa eima hneipa cha a cha. Nama na hrona tawh heta Khazohpa cha rai ahrialyma tahpa he eima noto hro liata athei lyma chyu ei su vei. Ano Krista zawzi vata ano pahnona rohpahnapa ha nama yna su to mai liata cha chyu mu vei.

 

2

Ngiapatuhpa eima hnona

(13. 8. 2006)

“A ngiachhi rairipata thapasana hneipata tlao y ula, Khazohpa ta Krista liata a cha ngiathaipa haw ei ta, a ngiathai rairi te u,” (Ephesi Mozy 4:32).

Ephisimozy hnohta paphaopa cha he Krizypazy ta kheihawhta pakha nata pakha azaona liata eima hro aw tahpa chhopasiana a cha. Eima pilyuna to liata nophana paluasa awpa a cha zi mania a chho. Ngiachhie thaina cha kyhpachana eima nohto hro liata eima paluasana tloa chata keimo pohkha khohna hlata chyhsa hropa yh papeisa viana chhao a cha hra.

Chyhsa hropazy eima ngiachhiena theina cha ama hrona liata amo hawhta paloh eima phaona tawhta apuapa a cha. Eima viasapa anopo no ta keimo chhao ano hawhta nopo pata eima tyh hra (I Kaw. 12:26). Ngiapatuhpa hropazy ama lyna liata chhao eima ly hra. Eima ngiachhiena he eima kiahpa liata eima vaihzy hnota eima daona palohphao paluasana chhao a cha hra.

Chyhsa hropa hnohta eima ngiathaina cha keimo chhao a ngiathaipa eima cha hrapa vata a cha. Khei hawpa daihti liata ma cha Khazohpa tawhta maniah a ngiathaina my tyh pita chyhsa hropa hnohta a ngiathai awpata rairu ngasapa hawhta a cha tyh. He hawhpa daihti liata eima thei lyma awpata a phapa cha Khazohpa ta kei chhao eina ngiathai hra tahpa he pacha lyma awpa a cha. Keimo pokha khona dei pacha leipata eima topa a ngiachhiena a thei lyma awpa a byuh.

Abeipa Zisu ta hmo no-ahpa nama taopa vata tlyma, Bihrai botlah hlupi nama pahnona ta tlyma vata khizaw ta ama cha pahno aw tah leipa ta “kyh nama pachana liata tlao ama cha pahno aw a tah (I Zawhana 13: 35). Na chakaolapenawzy nata ady thei leipata na y ma? Khazohpa hnohta ngiachhie theina, zawngia theina nata kyhpachana thlahpa ahia awpa a byuh. Cha thlahpa chata na hrona zydua bie a cha hnei tita chyhsa hropazy chata na hrona he byhna hlupi a vaw cha aw. AMEN.

  

3

Nama Maniah Na Ypa Lei Khiahtala

“Ano (Mawsi) ta ahnoh (Khazohpa) ta namae maniah na ypa leipa khiahtala he su tawhta (rapathohpa) maniah puakhei khae y,” (Puasaina 33:35).
           Khi tlyna khizaw liata eima y chhoh heta cha rietheina nata hro pahana, nopona nata alyna, hneirohna nata sipasana, thlazona nata thlalohna, thina nata hrona, hezy ry liana heta y lyma chy awpata eima cha.  Kheihawhpa daihti liama cha eima lyna daihtitaezy eima to hrapa hawhta nopona chhao maniah azi lyma tyh hra. Hla a taotuhpa ta “nopona ei tyhpa hry ta, thlazopa ta ei yno chhao,” a tahpa hawhna tlai khata.

           Rahtaipa ama ngia awpa daihti lia na kha Khazohpa ta Izarelmo hnohta valyuchapa za tuapa ei ta ama dyupa chariah zydua cha ama pahni lyma. Pho hropa pheisaizy ta avaw dua kha thei khao va ei. Khipipa kheihhawpa chhao rai ta Izarelmo vaw si n’awpa lathloh liata pakha thei vei. Rahtaihpa ta a hneipa hneirohna chata amo cha aly kawpata a vawdy thla ha ei. "Ma" ta ama sa tyhpa zydua kha ama mo ta hmo aw ei ta, ama hria tyh leipazy cha ama kuzy ta hria ba awpata a vaw ha thlah ha ei. Chahrasala chazy hryta hmo sakha ama ngiahpa a y. Cha cha Khazohpa ama hnohta a y awpa he a cha. Reingialeina vata Khazohpa ta ama hnohta pahra khokhao vei. Cha kyh cha chhithaetuhpa Mawsi ta liasa ano-avah haw. Chavata Khazohpa hnohta he ta a reih, “Nama keimo hnohta na pahra leipa khiatacha cha Rahtaihpa lana cha maniah chhitha kha y” a tah haw.

                  Tanoh apaipathlapa Marapa zydua ta he chhithatuhpa Mawsi bie reipa he alae awpa apha ngasapa ta ei pahno. Khazohpa leipata nama pahra nawpa liata hneiroh kaw pata nama y thei thlyu aw. Chyhsa hropazy hawhta nama thai thei thla hra aw. Anodeikua cha zydua cha Khazohpa leipata hlaotlona y thai vei. A pahana y leipata angiana chhao y ngiathai hra vei. Mara reih sakha ta reipa cha mawsala “anoh-ahah” y thai vei.  Pachyunosapa ta y thai vei. Khazohpa a ypa leipa vata a cha. Chhithaetuhpa Mawsi ta cha kyh cha liahsa ano-avah. “Abeipa! chae hawhpa namae maniah na ypa leina la chaela kho thai ma pi,” a tah haw. Apaipathlapa unaw-sitaeno zydua sai u, nama hneina, thaina, sohna zy liata Khazohpa ypana chhaota tlao charei achhuah chyu mu vei. Hneina zy, thaina zy, sohna zy he Khazohpa ronana chata tlao cha mawh sy. Khazohpa ta cha areitupa nama zydua hnohta ano ypana byhna cha chapi chyu maw ei sy.

 

4

Krista Chakaotupazy 

(August 19, 2006, Sat).

Rei awpa Bihrai

“Cha hawna hra chata namo chhaota nama hnota bipipa zydua nama tao khai tita, ‘Sei phahnai leipa ei cha, ei tao awpa rai na ei tao,’ tah te u’ tah ta.” (Lk. 17:10)

He bie he Abeipa Zisu ta apachupazy hnohta a reipa a cha. Chakaotupa ta a chakaopa zibeipa khohpa tao awpa a cha zi a rei papuana a cha. Ahyrai chakaotupa cha abeipa khohzi hawhta tao awpa a cha. Chakaotupa ta a zibeipa tuah beih vei. Chakaotupa ta abeipa hnohta khapa rai he tao tua awpa a cha tahpata bie pie bei hra leipata chahawhna hra chata khei hawpa daihti liatahe rai he hria awpa a cha tahpa chhao bie pie thei hra vei. Chakaotupa rai cha bie pipa zi awpa he a cha. A beipa ta chakaotupa hnohta atao awpazy achhoh tyh. Zibeipa ta chakaotupa hnohta hmochhielina hia bei hra vei. Zi beipa cha hmochhielina a hneipa a cha awpa a cha. Chakaotupa rai cha a zibeipa achhuahna patlo thei nawpata abaotupa a cha.

Keimozy he chakaotupazy eima cha. Khazohpa cha Zi beipa a cha. Keimo cha abokaliepa lata eima pacha tyh. Keimo ta Khazohpa rai pataosa awpata eima chhuah tyh. Chata cha leipata ano Khazohpa achhuahna cha keimo chakaotupazy hma pata ano ta apatlo aw. Cha cha ano rohna chata tlao a cha aw. Keimo rai cha ano awna patlo awpa rai he a cha. Ano ta eima tao awpa zydua thlahpa pathaihpa hma pata maniah a pahnosa lai lyma aw.

Khizaw ta bie hneina zy, tovyuh phapa zy lata a pasi awpata kha maniah a chatei lyma. Chahrasala Khazohpa ta chakaotupa duahmo liata na y awpata maniah a khoh. Ano chakaotupa chata cha ano khohpa tao awpa dei leipata cha tao hropa y vei. Khazopa ta ano rei angia awpa deita a khoh. Ano ta nama na hro chhoh zydua chata achhuahna ahnei lyma thla haw. Nama ta na chhohkha chata tlyma., awnanopa chata tlyma, na rai vata tlyma, ma na sapa zydua kha ano pahnona chhoh liata a y awpata a khoh. Ano cha byhna hnaw chatlo ta. Eima hrona zydua ano liata naopa eima cha pa vata chakaotupa rai cha eima hroh chhoh zydua liata tao lyma ei su vei.   

 

5

Thlachhana cha Khazohpa Agenda Pahnona a cha

(Sep 5, 2006)

Rei Awpa Bihrai

“Mydi ta, a pava hla ta, thyu ta rapathopa su lata sit a, cha liana chata  thlachha ta,” (Mark 1:35)

Apachupazy ta my tato ta Abeipa Zisu ama hmotheina tyhna su cha a thlachhana su liata a cha tahpa phasi ta ama pahno. Ama byuhna maita Abeipa Zisu ama tlua tyhna su chhao ano deita ta thla achha tyhna su a cha tyh. Zuda-Iskri ta Abeipa Zisu apatu sa eina su chhao kha Abeipa Zisu thla achhah tyhna su liata a cha.

Abeipa Zisu ta peimaopa bie chhuahna ahnei awpa daihti maita thla achha lyma. Khizaw pachana, pahnona, duahmo ta ano reipasaopa achana maita Khazopa paw hnohta thla a chha lyma (Matt. 4). Pachupazy atly awpa daihti liata za na chhohkha thla achha lyma (Lk. 6:12). He liata Khazohpa saw chapawpa hmata he tluta thla achha khiahtacha khatluta Khazopa khohpa hawhta eima duah, tao, pacha thei nawpata ngiapatuhpazy thla eima chha lyma awpata abyuh tahpa maniah a chho.

Abeipa Zisu he zawpi ta ama pahly lyma. Chavata sidiahna su ano chata a byuh. Cha liana chata Khazopa (paw) khohpa achhoh-ahia tyh. Ano hrona liata zawpi ta amo khohpa taopa awpata ama reipasao lyma tyh. Apachuzy chhao tlaita Abeipa Zisu he zawpizy yna su liata a y awpata ama khoh hra (Mk. 1:37). Zawpi chhaota Abeipa Zisu he lakho rohnahpa pakho awpa ama khoh hra (Zhn. 6:15). Sata chhaota ano anao awpata Abeipa Zisu a reipasao lyma hra. Abeipa Zisu ta ano chakaona raihria cha chyhsazy ano ama pachonosa awpa rai cha leipata Khazohpa (paw) khohpa pi patlo awpa deita a cha tahpa pakhata ta anoavah haw. A thlachhana liata Khazohpa agenda siapa a vawla haw (Lk. 6:13).

Thlachhana hnohta hmono-ahpa taona vaw pazi ta (Zhn.11:41-42), runana liata chhao riaphana a pie (Lk. 22:41-42); thlachhana ta riethei taotheina a pahneisa (Lk. 23: 46). Pachhahtupa sina lathloh liata si hr’awpata eima chhuah awpa chata Khazohpa liata a pahnih ei sila, eima hrona agenda pha ngasapazy eima pahnovia lai lyma awpa a cha.

 

6

Eima Tlaelana tawhta

September 9, 2006

Rei awpa Biehrai

Saimaw ta a hnohta “Hyutupa y, hriapasa ngaitapata a zoza khidei ta hria pita khapahma patu ma pi! Chahrasala na bie hawhta saozy cha ei vaw heih aw na” tahpata achhy ta (Lk.5:5)

Abeipa Zisu ta Pity hnohta ataopa hawhta ahy hmata eima tlaelana liata mania taokhei thei tla aw va ei. Abeipa Zisu cha eima tloleinazy a pahnolei mania a chapa ta eima tlaelana tawhta eima chakao tyhpa rai kha apha viapata tao chanei heih awpata thae mania apatlo tyh. Eima tlaelana hry tawhta pahnina mania apietuhpa a cha.  

Pity cha za nachhohkha ngah patu thei leipata a y. Nga chyhpatae chhao patu thei vei. Nga patuna liata athai kawpa chahrasala  he za he cha khapa nga hmata patu thei khao vei. He daihti liata Abeipa Zisu ta Pity hnohta “Pity na pacha a parohsa kha! rai hropa hria lava chi” tah vei.

Chahlata cha ti akathu viapa la sao vaw heih awpata bie apie. Pity khatluta areisi tly! Abeipa Zisu cha tyuchhazy ataotupa chata tilih chhoh liata nga yzi apahno leipa chyhsa cha thla vei ma? Chahawhpa chyhsa ta nga patuna liata expert kawpa Pity hnota “khala kha na sao vaw tyh” tahpa cha Pity chata kho achhithai vei.

Pity palo chha leipata sao avaw heihna he eima tlaelana daihti liata eima paloruhpa panano lei awpata maniah a pachu. Eima chakao tyhpa liata eima tlaelana avaw y nata rai chakaona hropa thlai saipazi awpa he eima paloh liata a y tyh. Cha hlata cha eima chakaona cho liata eima palohphao saipazi awpa abyuh hri. Abeipa Zisu ta ano chhaota eima tiama via awpa maniah a khoh. Ano thatlona ala ta tiama via awpa mania akhoh.            

 Tlaelana alaopa na vawtyh khiahtala chatawhta Abeipa apahnihna lathloh achhi awpata Khazohpa ta a cha mokha lyma tahpa athei awpa a byuh. Abeipa ta eima tlaelana he ano eima hnia viana lata pachasa thei ta ano chhaota khizaw eima pahnina lathloh liata maniah achhi thei tyh hra. Eima tlaelana cha eima pahnina viana lata tlao cha mawh sy. Amen.                                   

 

                                                                                                              7

Leidia Rai Vei

 

Rei awpa Biehrai

“Zisu cha a yna su a vaw tlo nata, ua ta, a hnohta “Zakia, za cho parah te; atano na o liata ei tlo awpa a cha” tah ta (Lk. 19:5)

Akawh ngaitaepa eima pahrana khizaw liana heta “keila khapahma cha khao vana” tahpata palohphao eima hnei nawpa anao ngaita kaw. Eima yna khizaw hra chata chyhsazy hrona he mania cha-ipata y heih ta (II Kawr. 4:8), chahrasala cha zydua hry tawhtapa cha Abeipa ta eima mo pakha chyu hrona he anano kawpa lathloh tawhta kyh maniah a pacha kaw chyu.

Abeipa Zisu cha a chakaona raihria pangyuh cheingei awpata nata kraws cha apu awpa  chakaona zy vata Jerusalem la cha a vaw pangai lyma. Ano a pahlypa zawpi zy vata chyhsa chyhpa Zakia cha achy viapachaipa hawhta a pa y sa. Chavata Zakia chata cha Abeipa Zisu hmo thei nawpata thoko akia awpa a vaw byuh haw ba. Chatluta moh pathahpa Abeipa Zisu cha amo ta a hmo haw khiahtala a paloh atlah thlyu nata pangiasa achhih. Chahrasala Abeipa Zisu cha Zakia yna thokopa cha apha nata aduah hata Zakia yna la cha thlai mo hmia avaw pasaih haw. Cha daihti liata la chyhsa chyhpa Zakia cha achyh leipa hawhta zawpi ta ama vaw hmo haw. Ano chhaota zawpi akiapa liata ama chabypa kha liahsa ano-avah haw hra. Cha noh liana chata Zakia cha Abeipa Zisu vata ahrona avaw nano syulyuh haw.

Abeipa Zisu ta eima pohkha chyu ta maniah azaona he anano kaw chyu tah awpa a cha. Hnohla ta eima hrona nohzy a pahno. Hmiala ta eima hro nawpa chhao a pahno hra. Ano cha eima hrona mania a pahnotuhpa tlao a cha. Tahma nama chhao zawpi hry ta Abeipa bie a naethli nga hrapa na cha thei aw. Chyhsa hropazy ama thei leipa nama deita ta na theipa Khazopa bie a y thei. Nama hawhta zawpi ama thei leipa chhaota papei sa awpa cha vei. Nama na hrona liata acha hriapa Khazohpa bie kha nama hrona chata tlao a cha. Chahawhta chyhsa hropazy hawhta Khazohpa bie na pahno kaw leipa chhaota ngiachhie awpa cha hra vei. Khazohpa ta eima chana chyuta bie paru maniah a chhoh chyupa vata. Ano baona a ngiapazy hnohta Khazohpa ta amo nata amo duahmo chyu liata anano kawpata azao lyma thla ha ei. Zakia cha Abeipa Zisu apohpa zychha eimo ta eihmo pachhi khiahla atahna liata ahrona zydua a vawthlai haw. Abeipa eima tyhna pasia lyma awpata achhuah chyu ei su vei. 

 

8

Khazohpa A Chathei Thlana

10.9.2006

Rei awpa Bihrai

 

Jerusalem lata vaw la “Khazohpa ta a chathei thla eina, nama kypachanazy kha pathie lyma heih mu vei tahpata va chho ma ei tah ta (Jer. 2:2)

Khazohpa hnohta na palohphao y kaw leipata nata thlachhana chhao azaopa ta na chha hoh leina daihtizy a y thei aw. Chahrasala ano kyhpachana cha a ikawpata na chata a y lyma thla haw. Keimo la ano eima my thei aw. Ano deikua maniah my bei vei. Maniah athei lyma.

 A chyhsa Judah mo ta ano cha ama paehla hawpa vata Abeipa cha paloh apasa. Chavata a chyhsazy hnohta a kyhpachana a paluasa. Ano kyh ama vawpacha awpata nonai kawpata ahrua lyma ei. Abeipa ta khatluta Judah mo cha ano kyh ama pacha tahpa apahno. Myuh ta avah thiepa kyh apacha kawpa hawh tlai ta a cha. A kypachana ry liata a chhithana daihtizy kha athei lyma. Chavata Khazohpa ta Judah mo kyh apachana zy kha aphuah lyma haw. Abeipa a vawchhitha lainazy kha athei eisala ano la ama vaw kua awpata abeiseih lyma ei.

Na paloh na vai leipa khiahtacha Abeipa Zisu kyh na pachana thatlo thai aw vei. Ano ta achahnia khohna, nama hnohta acharei khohna daihtizy a y tyh aw. Krizypa hrona liata eima vaw pahana kha nathei tyh ma? Krista rai chakaona liata na vawpi pasai tuana nohzy kha nathei tyh khao tly ma? Na hrona liata ano a cha ypana vata na hro apahana zy kha alei haw ma? Krista vata eima hrona alyna kha eima thei thla lyma awpa a cha.  

Khazohpa cha anano bei vei. Krizyna palohphao na vawhnei tua nota na lyna chapi pa Khazohpa kha na hnohta a y lyma. Ano kyh na pachana atha atlo kaw leipa khiahtala ano la kua haw hei ma ei. Ano ta na lyna hmiatuapa hawhta achazao lyma thla ha aw. Abeipa rohna tlao cha maw sy.

 

 

9

Apokhanana Hmotaotheina

Rei Awpa Biehrai

“Ama zydua ta pokha ama chana awpata ei paw y, na keima liata nay pa nata kei nama liata ei ypa hawhna hrata heta, amo chhao keimo liata ama yna awpata na ta kei eina tua chi tahpa khizaw ta ama zo thei nawpata,”

(Zhn. 17:21)

A leidia haipa khizaw pachha nawpata Khazohpa cha bie ta ngiapatuhpazy apokha awpa abyuh tahpa ta maniah achho (Zhn. 13:20; Matt. 25:40). Khazohpa ta nopi novah hmaokha ta y awpata maniah a piepa he ano khohpa paloh aphaopa sawzy hnei awpa nata cha hawtizy cha ano rai chakaona liata baotuhpa lata ama cha thei nawpa he a cha thei hra (Mal. 2:14-15). Chahawhta Awnanopa he ano pohpa a cha hra. Chavata Awnanopa hryta a-ichiana zy, ahraona zy (II Kawr. 12: 12) a y lyma khiahtacha ama kiahpa khizaw liata pachhana thatihpha phua theipa cha aw vei.

Abeipa Zisu ta ano ama khaipa hla ta ano azituhpazy ama pokha awpata thla achhapa ei. Apachupazy tha ala eisala ngiapana liata aipata ama dua lyma awpata a pachu ei. Pakha nata pakha kyhpacha na chota ama pokha awpata bie a pie ei. Abeipa Zisu ta chyhsa hropazy kyhpacha thei leipata cha thlahpa liata ama hro thei lei awpa a chazi a pahnopasia.

Khazohpa he khatlu ta kyh eima pacha tahpa eima pahno khoh khiatacha chyhsa hropazy khatlu ta kyh eima pacha tahpa liata ahno tyh. Eima palohrupa liata a y tyhpa cha, “Abeipa nama nata keima likaw cha buana y vei, ei paloh tlokhu ta kyh ei cha pacha thei.

Chahrasala ei viasapa nata keima likaw liata kypachana y thei vei,” tahpa a cha tyh. Khazohpa ta maniah achhy awpa cha “cha tala chathai aw vei, na vaih kyh na pacha tua leipata keima kyh na pacha thei aw va chi,” maniah a tah thla awpa a cha (Zhn. 13:34-35). Eima vaih kyh eima pacha thei leipa acha khiahtacha Krista kyhpachana he eima kiahpa liata paluasa thei awpa cha vei. Khazohpa ta maniah a mokhahpa cha eima zydua ta apokhana eima hnei awpa he tlao a cha. Amen.

 

10

Ahyma Na Hnaw?

Biehrai Rei Awpa

“Pity cha a hei ta, Zisu ta pachupa ky a pachapa …Pity ta ano cha hmo ta Zisu hnohta Abeipa he chysa he kheita ma cha aw? tah ta,”  (Zhn. 21: 20-21)

Abeipa Zisu ta ano a chakaona raihria nata riethei pasa atao nawpa kyh zydua he Pity hnohta asia kawpata achho haw (verse: 18-19). Chahrasala Pity ta kyh a pacha kawpa Abeipa Zisu riethei atao awpa cha pasai rai vei. Tahma ano chhao riethei taona lathloh achhi awpa chhao he anga leina a hnei thei hra.

Chavata Abeipa Zisu ta a hnawpa achhy awpa hlata a kiapa liata pachupazy hnohta hmohmia apasai  ta Zisu ta kyh a pacha kawpa Zawhana kha thlai a vaw hmo. Chatanata “Abeipa! he chyhsa he zaw? thlai a tah. Achhapa cha Pity ta hmiala riethei atao awpa kha apahno chhilie ta ano hawhta Zawhana atao hra aw ma tahpa kha apahno khoh thlyu aw. Pity pachana he keimo chhao eima tyh hrapa cha a cha. He hawhpa daihti liata eima chakaola penawzy nata apakho khohna chota bie rei awpa he anao kawpa tlai cha a cha.

Abeipa chakaotupazy hnohta atlo tyhpa reipasaona lai kawpazy cha he zy he a cha.  Khazohpa ta khazia ei viasapa he o lai kawpa apie tly? Khazohpa ta ei viasapa saw patlapa ta khazia keima sawzy tla leipata ama y tly?. Khazia ei viasa he chyhsazy liata hlaotlo kawpata y thei ta khazia keima cha mohnao kawpata ei cha tly? Khazia Abeipa ta ei chakaolapa chhaikhazy ama khih liata y eita kei cha ahlapi liata eina pa y sa tly? tahpata eima tah thei hra.

Abeipa Zisu ta Pity nata Zawhana zy hnohta chakaona anano pata apie ei. Ama si nawpa lathloh chhao a panano haw ei. Ama pano hrona he keimo ngiapana thae mania apatlo chyupa a cha khai. Abeipa Zisu ta chakaotupa a zibeipa la amoh leipa maih ama si nawpa lathloh aruna kyh apachu ei. Na chhao khapa liata hmohmia na pasai tly? Khazohpa hnohta apahni awpa hlata na kiapa liata na chakaola penaw hrona saipazi pata ma na hro thla aw? Abeipa ta eima si nawpa lathloh ananopa ta mania rao khai haw tloh ta.

 

 

11

China Thlahpa Chavei

Biehrai Rei Awpa

“Khazohpa ta china Thlahpa mania pie leipata hmotaotheina nata kyhpacha ta nata palohrupa sia ngaitapa hneina Thlahpa tlao maniah pie tlo ta,” (II Timothy. 1:7).

Krizypazy hrona liata chi awpata Khazohpa ta maniah achhohpa sakha cha Khazohpa deita a cha (II Kawr. 5:10-11; Heb. 10:31). Chyhsazy china he Abeipata tawhta cha vei. Krizypa chhaikhazy cha Khazohpa hlata chyhsapazy ama chi via tyh. Cha chyhsa ama china chata Khazohpa palysa thei va ei. Khazohpa alyna tlua cha pata chyhsa hropa ama palysa pa vata a cha.

Timawthy cha thyutliapa cha ta apizi ta chyhsa chyhpa a cha thlyu aw. Apoaraoh chhao alai kawpa cha thlyu aw vei (I Tim. 5:13). A sayapa Pawla chhao kha atahma nata atahma ama patu lymapa a pahno. Ano chhao a sayapa hawhta patu awpa a cha hra aw tahpa pachana a hnei thei. Chavata a sayapa Pawla ta ano hnohta cha china cha Khazohpa tawhta avypa chavei a tah.

China cha eima raihria maniah chalihsa ta Khazohpa bie eima pahno hawpazy chhao kha zo kawleipa hawhta hiahrina maniah a pahneisa tyh. Eima hrona liata rietheina alyupa eima tlo hla via cha eima ngiapana chhao eima zo thei. Chahrasala cha hawhpa rietheina eima vaw tlo haw nata cha Khazohpa biezy liata alohleina maniah eima hnei tyh. China ahlu via cha pahnoleipa tawhta a vy. Hmiala khapama maniah a y kha tahpa pahno ma pi. Keimo sasyh pachanazy ta eima paloh maniah apabuapaba sa tyh hra.

He hawhpa daihti liata pachana dopa hnei awpa abyuh. Cha hawhpa pahnona dopa thei nawpa chata Khazohpa ta Thlahpa Pathaihpa maniah pieta keimo sahpa pahnona chhao maniah abao lyma tyh. Khazohpa Thlahpa Pathaipa a yna liata china y bei vei. China ta sei ta maniah hnei khoh ta Abeipa Zisu ta cha china tawhta maniah a papua haw. Khazohpa ta china photo tawhtapa maniah chhihthata ano reingiana chota eima duahmo hmeiseihpa liata ano ngana chota eima dua lyma thei nawpata Thlahpa Pathaihpa hma pata mania abao lyma. China cha Khazohpa tawhtapa cha vei. pahnietuhpa ta raopa eima cha.

 

 

12

A Hroh Thlahpa Khazohpa Bie

Biehrai Rei Awpa

“Ama chata ‘Lapi liata bi mania a chho nota Khazohpa cha bizy mania a chhopasia vei ma kha? a tah ei ta,” (Lk. 24:32).

Paloh hmeiseihpata ano atluatuhpazy hnohta Abeipa Zisu a pahlao lyma tyh ei. Emasa lapi liata asi haipa chyhsa pano penaw cha Jerusalem liata ama theipa thatihzy nata hmo yzi zy ama no-ah kaw ta cha thatih cha pachiah lymana chota ama si lyma. He chyhsa zy he asohpazy cha aw eita amo daihti liata hmo yzi zy apahnopasia thai kawpa chysazy ama cha nata alyu. Chahrasala Abeipa Zisu thi ta athyuheina kyh liata cha ama no vah thai khao vei. Zisu cha Messiah a cha tahpa cha zo thla eita chahrasala kraws liata vawthi ta athyuheih tahpa thatih deikua ama no-ah kawpata pahnopasia awpata ama khoh pasa ngaita.

Khazohpa ta palohpathai kawpata ano atluatuhpazy palohphao cha a pahno. Abeipa Zisu cha amo hnota vaw pangaipata a vaw si lyma hra. Khazohpa bie ta ano yzi nawpa kyh arei chhilipazy kha ama hnohta chho lyma ta chavata ama pathipaloh a vaw pahy haw. Abeipa Zisu bie areina daihti liata cha ama paloh liata mei hawhta aka nga kaw ei. Abeipa Zisu bie reipa nata ama pahnopa Bihraizy cha palyu lyma eita Khazohpa bie hmeiseih a cha pata ama no avah haw. Ama lohleina zydua alei haw. Chavata ara chaima eita ama hmopa thatih cha ama viasazy hnohta ama chho lyma.

Khazohpa la kyh nata azaopata palohpathai kawpata na pahno khoh vianazy ay khiahta cha Thlahpa Pathaipa ta Biehrai hmapata a cha chho lyma aw. Chyhsapa duahmo tawta paloh chha kawpazy chahraeisala Khazohpa bie ta ama no a pavah sa haw ei. Thlahpa Pathaipa baona ta na pahno khohpazy na no avaw vah khiahta cha cha na no-vahna cha chyhsa hropazy chho hrawpata na paloh ta a khoh hraw aw. Khazohpa bie cha hrohta Khazohpa paloh hmeiseihta atluatuhpazy chata tanoh chhao rai ahria lyma. Abeipa hnohta rohnana y mawh sy! Amen

 

 

13

Abeipa Zisu Tluana

11.9.2006

Rei Awpa Biehrai

“Ano cha ama hmo nata a hnohta, “Chysa zydua ta ama cha tlua mata, tah ei ta,” (Mk. 1:36).

Pity he pachupazy hry ta ahru chaipa, apaloh apachhoh chaipa, pathiraona anao chaipa, apalo achahra chaipa ta ala (Matt. 16:22; 17:4; 26: 33). Abeipa Zisu he atlua lymapa chyhsa a cha. Kraws liata ama khai awpa daihti lia chhao kha ahla pita Abeipa Zisu hnoh cha apazi lyma. Abeipa Zisu athyu haw heina tahpa thatih athei pata nata thla yna su la cha thlai ara (Lk.24: 12). Abeipa Zisu la vaw awpata thluahruapata ti chola azaw pathla (Zhn. 21:7). Abeipa Zisu hawhta ti cho liata thlai a si hra (Matt. 14: 29).

Pity he ataopa nata areipa zydua he ado kawpata cha tyh leipata a y. Chahrasala Abeipa Zisu cha pahlei leipata azitu phapa cha a cha. Chavata pachupazy hryta Abeipa Zisu hnoh zina liata nga achhi chaipa lata tlao a cha haw.

Ano deita ta Abeipa Zisu atyh tyh vei. Chyhsa hropazy chhaota atyh tyh. Ano hawhta Abeipa Zisu atluatuh hropazy chhaota atyh tyh. Chyhsa hropazy ta nama he kheihawhpa chana tawhta e ama cha pahno? Nahlao akhopa tama ama cha pahno? Biehneina akhopa ta ma ama cha pahno? Alyna atluapa tama ama cha pahno? Abeipa Zisu atluapata ama cha pahno ma? Abeipa ta bie maniah ataipa cha “Nama paloh tlokhuhta eina tluana daihti liata eina hmo aw ei chi.” (Jer.29:13) a tah.

Abeipa Zisu atyh awpata tano nachhuah tla ma? Palo hmeiseihpata natlua pachhi tla ma? Chyhsa hropazy chhao nama Abeipa na tlua lymapa vata Abeipa Zisu la ahnia viapa ama y tla ma? Na palohtlo khu ta ano khohpasana na hnei khiahtacha ano na hmo thla aw. Abeipa Thlapa chata “Thlapa nata myuthi chata, “A vy te, tah ei ta, a theipa maita, ‘a vy te’ tah ei se. A da phipa mai a vy se; a khopa maita hrona ti he a saipata lah se.” (Bip. 22: 17).

 

14

Ngiapana Leipata Cha

Rei Awpa Bihrai

“Khapa rai ngiapana leipata taopa cha moleina cha tloh ta,” (Rom. 14: 23b)

Hebrai chabu a rohtupa ta ngiapana leipata cha Abeipa palysa theipa cha vei tahpa phasi ta maniah a chho (Heb. 11:6). Khazohpa eima hnohta hmo sakha kha a patlosa nata ano angiapa awpa nata ano nata azaona siapa hnei awpata maniah a beiseih lyma tyh. He he khapa yzi a hnei? Khapa vata tah khiah cha eima hrona liata abyupazy ano pahno ta ano ta cha eima byupazy cha maniah pie awpata akhohpa vata a cha (Phl. 4: 19).

Khazohpa ta eima chieleinazy maniah pahno ta cha eima chieleinazy taw na chata ano nga awpata apahni awpa maniah akhoh (Phl. 4:6). Chavata keimo deita eima ypa chhaota thlazo lei awpata ano ta bie maniah atai haw (Ryhpa. 31:6). Eima hrona liata runana hlupi maniah chado hrasala nopo lei awpata nata alohleina hnei lei awpata bie maniah pi ta chahawhta ano kyhpachana cha tlyzaw ta eima hnohta a y lyma tahpa maniah a chho (Jer. 31:3).

Khei hawpa daiti liama cha ngiapana a ipa ahneiipa eima lyu tyh! Khazohpata bie maniah a taihpa pahno hra ei sila eima noto hro liata eima tyhpazy vata alohleina ta maniah a khu tyh. Paloh azaw-avawna ta maniha pahni ta “keila a lohthai vana” eima tah tyh. Khazohpa keimo chata maniah ataopa thei khao leipa tluta eima pacha tyh. Eima kiahpa liata chyhsazy hnohta baona cha thlai eima hia pathao haw tyh.

He hawhpa daihti liata eima rei thaipa cha “Khazohpa eina bao aw tahpa cha ei pahno thla tarua na, anodeikua keima ei taotheina chhoh eitao chy awpa a cha” tahpa a cha. He liata chyhsapa taotheina abochha viana palohphao hnei leipata a pha. “Ngiapana leipata cha Abeipa palysa awpa chathei vei” (Heb. 11:6).

 

15

Khazohpa nata Atyhna

12.9.2006

Rei Awpa Bihrai

“Chahrasala thyu la, a dua te; he nah mo hmopazy nata na hnohta ei luana awpa hmozy chhao, cha chakaona chata nata pahnotupata cha tao awpata na hnota ei vaw lua hi,” (Hmt. 26:16 )

Ano liata chakaona na vaw hnei hla tawhta Khazohpa ta nama hrona liata rai ahriapathao lyma haw. Na vawpi hlata Abeipa ta a cha pahno. Nama hrona liata Abeipa ta rai hria awpata a khoh (Jer. 1:5; Hla. 139:13). Pawla amaska hawka liata a vaw pipathi hlata Abeipa Zisu ta a pahno haw. Pawla rai ronahpa a chakao awpa chhao a pahno haw. Chahrasala Abeipa Zisu cha Pawla pipathina liata ngala kha ahnoh ta a vaw luah (Hmt. 9:15). Khazohpa ano chata achhuahna apahnopasia leipa vata Krizypazy adyuna lata adaihti zydua a vaw hma haw Khazohpa ta Pawla hrona hma khoh hrasala ano (Pawla) ta Abeipa ao a nathli thei nawpa daihti a ha thla haw.

Khazohpa ta keimo khohna tawhta ano raihria eima chakao awpa nata pangoh awpata khona mania hnei vei. Ano khohpa raihria chakao awpata keimo mania hrua ta, kemo hmapata cha ano khohpa rai pangyuh awpata rai tlao ahria. Keimo cha ano maniah a awna lia dei cha ano ao nathlina chota chakao awpa a cha.

Khazohpa ta khapa pacha kaw leipata ano ngala achhy awpata maniah aw beih vei. Maniah azao hra vei. Bihrai thai chakhy nawpata tlyma deita maniah aw hra vei. Chahlata Khazohpa ta keimo tawhta ano chata eima hria theina maniah a pahno chhilie haw. Ano rai ahria ngalana su liata chakao hrapata keimo cha awpa eima cha.

Ano atyh awpata tano nama ma? Ano raihria liata chakao awpata na khoh khiahtacha nama khohna la rai chaleipata ano rai ahria ngalana su liata chakao awpa a cha. Chatita “Khapama eitao aw Abeipa” na tah thei hra aw.

                                                                   "Abeipa rohnana cha mawh sy" Amen.....(elipaw)