Dawchhau

Rev. Vako Autobiography

Moh:     Rev. Vako

Pinoh:   January 6, 1962 (document zy liata June 1, 1962)

Lapino moh:     Dawsu (Ngopaw)

Nopawzy:         Htp Chakao nata Pino Temai

No pakia no:     May 9, 1991

Ordination: Pro. 18 April, 1990 by Rev. Raha (late) Sabypi Khithieh;

Ordination: 12 March, 1991 by Rev. K. Teitu (late) at Satu khih

Hawtizy: Eli (21. 8. 92), Lili Si (15.2.95) nata Va Pawpi (24.12.2000)

Pho: Teikhu

Khi:  Sabyhpi  

Chakaona su:  Lorrain Theological College in Yangon

 

Degrees:       B.Th (MIT: 1990), M. Div (MIT: 1999), M. Th (Hanil: 2004).

 

Address:

No 265 A, Khin Oo Lane,   10  Block, Hlaingthazar Township, Yangon City, Myanmar:  Nearest phone: 244390: Korea phone 82-010-2200- 1962  

               

Hla khochaipa: "Zisu Kyh Na Pacha Eily Ngaita"

Hla aphipa: Hla a phipa hlu kaw taruata khasia leipata tahma y tla khao vei.

 

Chabu a rohpa: Dawchhau Theology: Towards a life-Based Theology,  2006.

Roh haipa chabu:  “A Ngiachhiena Liata” In His Grace tahpa a cha, 2009

 

Articles

1. Marapa ama tahpa cha!,

2. Chyhsa Sohpa ama tahpa cha,

3. Thaina a chuhaipa Mara Thyutliazy,

4. Marapa nata Mara rah

5. Marapa thokha palohruhpa maniah a pahni kaw chypazy,

6. Pawpi Kheita eima tly aw?

 7. Mara Tla liata a pawpa Pawpi zy, 

8. September 11 Saipazi Heihna,

9. Chyhsa sohpa ama tahpa cha. 

10. Sipasapazy Zyna: Mara Awnanopa saipazina

12. Centenary Khohla Mara Thyutlia

11. Zahia tah cha Tanoh Mokhao ta,.

13. A glimpse Study of Lorrain Theology

14. The Study of the Growth of Korean Churches

15. A Brief History of our Missionaries

16. The Progress of Myanmar Christian Contextual Theologies in today.

18. A Brief history of Mara Evangelical Church

19. Thawngthabia le Nunphun

20. Ahodah Apal? 

 

 

Vako Nopawzy

Khazohpa ta ano a pahno maleipa St. Chakao he ano chyhsa cha awpata vaw pachhuahno haw ta, a vaw satlia nata Ano Khazohpa cha thlai a vaw ngiapa haw ta. St Chakao he unawh 6 nata sitaeno pakha a vaw hneipa acha. Apaw he Khithau chata ano cha Ai Chi a vaw cha. Apaw Khithau he sipasa kawpa achapa vata ano chhao cha avaw chu thei leipata a y. Alapi no chhao he ano Ai-Chie reipa hawhta chaleipata ano hawhta sipasapa Ls. Temai (Liemei zuano) a vaw hia. Abeipa ngiachhina vata a satliana tawhta pupa lata avaw lie ta chatawhta awnanopa liata hyutuhpa taita chakaona a vaw hnei.

Ls.Temai nata ko no ama vaw hnei tawhta sachano utheipa vaw hnei ei ta amo cha Haiva a cha. Chatawhta panona saw chano hnei heihta Paw-u (Paw te) tahpata amo ama bie. Paw u he a laisa hawpata 1975 py chari achu haina daihti liata TB pasana ta a paha haw. Chatawhta keima he vaw ei vaw pi. Keima tawhta Pheido, Paichho, Ko-u nata Tatano (Naonao) zy ama vaw cha. Chavata Vako (tahma Elipaw) he unawh papali nata sitaeno pano a hneipa a cha. Abeipa ta ama zydua he vaw khasia eita a utheipa Haiva na tah leipata cha tano taita atlapa ta ama y chyu.

 

Vako School A Vaw Kia Pathao

Vako he dyhchhiepa ochhoh tawhta a pihpa a chapa hleikho ta ochakiochapa liata a ypa a cha. Chyhsa no-uriah achi kawpa chata a sapa ko 9 apha tawhta Primary a pathaopa a cha. Achy viana daihti liata cha a viasazy hry liata a ypa chhao ta chano zy he a viasa via tyh ta arichazy hry liata hmiakai kawpa chyhsa cha vei.  Sunday school zy, hla achuna zy, bie achuna zy lachha deikua a pahasa kaw. Solfa pa he Mc. Toke (Locheipaw) liata achu ta athai kaw. Primary liata chool a kia chhoh zydua liata sakhana liata y lyma ta chahrasala athai kawpata la chahlei vei. Chavata 1982 na liata pyhraw he a vaw failed haw. A ngia achhi hmeiseih. Ary la hawhta school a vaw kiana ko zy a cha:

 

1972 Primary pychhaih 

1976 Primary pypali,

1979 Py chari,

1981 pyhraw ta a vaw chu lai.

1983 liata pyhraw a passed.

1985-1990 he B.Th achu.

1991 liata noh a pakiah.

1995-1999 he M.Div achu.

2003-2004 he M. Th achu.

2006-2007 he Th.M achu heih.

Khazohpa Rai chakaona a vawthao       

Noh kha za ta ei vaw theipa thatih cha ei ma tlyma a cha tahpa hawhta a vaw cha. Pyhraw ezana result vaw puana daihti chata ado va tlyma 17 July, 1983 za liata ei palyusa. Pyhraw passed napa cha radio tawhta theipa chata eily zi reitheipa cha vei. Py chaki ei chuno ta evangelist rai hria ba awpata achhuah nata chahrasala ei ko tlo leipa sakha nata ei paw siehnai na khokhei leina vata tahma pyhraw ei vaw passed pa cha ei paloh liata seminary la azu awpata khacha a vaw la lyma ta.

       He daihti he seminary la si awpata admission pahyna daihtizy a cha khaoleipa vata Bia ryureina zy ei chu khona tlokhei lai awpata cha heih ta, chavata a pahapa tluta Tisi khih (tahma Elino) khih liata Private Middle School liata head ta ei vaw chakao. Ei naw! Tisi liata ei vaw y chhoh he cha chhona liata ei rie athei hmeiseipa ta ei pahno. Keima chhao he chyhsa nokhihpa cha nata ei hrozi chhao ei kaolapa y thai hra va ei. Chavata ei sanawhzy liata ahlu via cha ei vaw y thla tyh.

       Cha ko vaw chha ta 1984 na vaw pha haw ta. He ko general Assembly chata Bihrai achu awpata naw pasai ta ei vaw ly kaw. Bihrai achu awpata ei thyu my ta ei paw ta “Ei saw y, na pahnopa hawhta nano nata keima hecha Bihrai na chu chhoh zydua liata cha mohoh thei aw leipa pita, Khazohpa ta nama chabaotuh awpa viasa phapazy chaw tuapa lyma mawh sy” tahpata bie eina chho. Ei paw ei na chhopa hawh tlai ta, Bihrai ei chu chhoh zydua viasazy ta na bao lyma eita ei vaw si pha kaw. Chavata 1984-85 na liata B.Th ko khana a vaw chu nata 1990 liata ei vaw patlo. Ei chu chhoh zydua liata panona liata thaina lata ei vaw y lyma hra. Abeipa ei reih thai ngasa. Ei vaw patlo tawhta pastor Sita paw yna (Leika bia) liata buakha khy chy ma ei na tah eita ei nawtae asi hnaipa Ko-U nata khy pita noza zakha za y pita cha daihti liata Hyutuhpa Letla O liata eima y tyh. Awnanopazy kyh maniah pacha kaw eita ei ly ngasa. 1990 na April liata a cha. Khih la azu pita pastor Sitapaw ta Leika la cha khy heihta, keima he su ruapa Tisi khih lata si awpata bie ei na pie heih ei. Chavata saya ei cha tuana khih lacha May thla chhana liata si heih nata he liata ko no laita ei vaw y. Chavata Elino chhao he he daihti liata ei mo nata na dyh viapa a chapa vata ei pao Ngofamapaw ta na vahiapa ta ko 1991 na May 19 noh liata ava suana hry ta eima pakiah. He a pakiah noh he Abeipa Vala kiahno nata asu thai ta Pro. Victor Ve-U (cha daihti) tha bie maniah a pachu. Ko 1992 na liata B.D achu heih awpata hia nata Assembly nopawzy ta naw pasaih heih eita chahrasala Elino (Dawhdaw) he naw pina daihti ahnia haw ta ei ngia eina chhipa nata phaosa zy aryh leina vata MIT liata first year kia awpa a chapa chhaota kia leipata ei kaw si haw.

     Fao daihti cha ta ti zy alai kawpa chhaota ei lapino yna su Tisi cha vaw tlo heih nata Pletwa liata biatuhpa ta y awpata ei na rao ei. Chavata Pletwa lacha August thla liata zu nata no za zakha ei vaw y. He daihti liata Rili paw (M. Vahnei) he Sabypi liata biatuhpa ta sopa chata ama ochhohno (Khaiche, late) he Pletwa liata chakaona a hneipa a chapa vata keima Pletwa su aruapa pabie awpata ei natuapa ei he Rili paw zu hri awpata paryhpa a cha. Pletwa tawhta ei kaw si tawhta Sabypi Biatuhpa ta cha nata Dawlei bia chhao aruapa vata ko kha chho ei tlypa tyh lyma hra. Chatawhta achu heih awpata khopasana ei hnei heihpa vata Aru Assembly (1995) liata hia heih nata na pasai eita he ko tlai he ei nawtae Ko-u nata Yangon la pangai awpata eima za si haw. MIT liata pre-class kia awpata achapa vata saya Khalei paw o liata 1995 June-August taita eima y. Chatawta Rev. Laima ta ano school liata baopa pata ei na chhopa vata ano yna Chinchia (Thabigun) la eima paly haw. He ko December liata Elino zy dy awpata khih la Ko-U nata khy heih pita Krisma he khih liata hmapata Krisma myla ta thlai Yangon pangai awpata eima zydua ta eima zathao haw.

     Lathloh liata Elino a za pasapa lyma pa chhaota Abeipa ngiachhina vata atla ngasapa ta Yangon cha January first week, 1996 na liata eima zapha haw. Eima y nawpa chhao arypao khai thla ta alypa a cha ngasa. Elino zy chhao ta Yangon liata kotho y heih pita keima (1999) B.D ei patlo nata khih la eima zydua ta kaw si pita chahrasala he ko General Assembly ta Hakha liata local padua awpata ei tlo hmata maniah ama rao chili hawpa vata Matupi tawhta eima hmodahzy cha eima utah Ngohmopa motor ta Hakha la thlai paphaosa hawhpa a cha. Khih he April second week liata tlo pita Tisi liata noza zakha nata Sabypi liata noza zano y pita sao mania tla kha va na atah hawpa vata Hakha lacha May thla 17 noh nozy aduahno ta eima thyu. Lapi liata pasapa lyma heih pita chahrasala Hakha cha May thla 23 noh Zapi noh ta eima tlo. Hakha liata utheizy maniah aly kaw ei ta eima rietheina zydua a leikhai haw.

     Hakha liata 1999 tawhta Abeipa ngiachhina vata vaw y lyma pita awnanopazy deichhyna eima vaw to pha lyma. Hekha liata ei vaw y chhoh he (General Secretary, Hakha Council of Churches term kha) ei vaw chakao hra. 2002 liata M.Th achu awpata hia nata Assembly ta ary a tahpa vata 2003 na August 27 noh he Korea rah Hanil Seminary, Jeonju khih liata ei vaw tlo. Abeipa baona vata 2004 na August 20 noh he M.Th palo tla ngasana chota patlopa ta Viarah la ei vawtlo pakhaw haw. Chatawhta LTC liata lecturer ta chakao nata  Abeipa ryhraona va lilaw heihta 2005 na February liata Korea rah Methodist Seminary tawhta hruana ei vaw hmopa vata he ko March 1 noh ta Korea, Seoul khihpi liata achu heih awpata ei vaw tlo. Tahma taih he he liata ei vaw y chy thla haw.