ANTSIVA - Vehivavy Malagasy - Femme Malgache - MADAGASCAR
Mpitandrina - Mpampianatra sy Mpanoratra - Pasteure - Enseignante et Ecrivain Membre Havatsa-UPEM France - Membre Association des auteurs indépendants

Ô ILE EMERGEANT AU MILIEU DE L'OCEAN !

Tu es loin de nous, mais aussi tout près
Car loin des yeux ne signifie pas toujours loin du coeur.
Ile émergeant au milieu de l'océan, héritage venant du Zanahary (Créateur).
Tu n'es ni objet d'échange, ni à vendre, et quand tu as un malaise, nous le ressentons aussi.

Six mois durant, tu as enduré les souffrances.
Evénements douloureux, obscurité profonde.
Tu étais mise de côté, chavirée durement ;
Les ondes t'ont balançée, mais tu restais debout.

Ton coeur qui a été blessé, on l'entend encore battre et chanter :
"La justice, mais non les choses illicites ;
La sacralité ainsi que la transparence..."

Les sombres nuages couvrant l'Ile Rouge se sont dissipés.
Le monde entier perçoit la souveraineté nationale.
Un raphia prometteur..., héritage de toute la génération.

Antsiva, 03 avril 2003

RY NOSINTANY ANIVON-DRIAKA

Lavitra anay ianao kanefa akaiky ihany koa
Satria ny lavitry ny maso tsy hoe lavitry ny fo.
Nosintany anivon-driaka, Lova avy amin-Janahary,
Tsy atakalo, tsy amidy, tsaroan'ny aina raha marary.

Enim-bolan-garangidina izato ianao niari-pery,
Tolona tsy omby tratra, maizim-pito izay jinery
Dia natao ankilabao, nailakilaka aok'izany,
Natopatopan'onjan-drano nefa dia nijoro hatrany

Ilay fonao noratraina 'njao mbola mitepo, velon-kira,
Ny fahamarinana no ilaina fa tsy ny masirasira
Ny fahamasinana ihany koa ary ny mangarahara...

Nisava 'lay raho-mainty nanarona Ilay Nosy mena
Izao tontolo izao mitazana ny fiandrianam-pirenena
Foto-drofia mavamavana..., lovan-janaka amam-para.

Antsiva, Frantsa, jolay 2002

Anniversaires Nationaux

59 TAONA LASA IZAY !
29 MARTSA 1947 - 29 MARTSA 2006

Hono, ho'aho, ry Nenibe,
Azafady, etsy ange :
Mba lazao, tantarao
Raha azo atao izay fantatrao,
Ny zava-nisy sy nitranga,
Ny vagao tao Moramanga.

Aoka re, aoka re, rey anaka,
Izaho efa reraka sy hana ka
Mafy, tsy ho haiko ny hitantara
Mafy e, ry zanaka amam-para !

Liana izahay ry Nenibe,
Liana tokoa mba handre.
Tsy angano, zava-nisy,...

Tena nangidy, eny, indrisy !

Liana izahay ry Nenibe
Tena liana mba handre

Aoka re, aoka re, rey anaka,
Aza mangarom-biby an-davaka !
Tsy ho haiko ny hamohafoha
Mafy loatra ka tsy toha !
Fa mahafadiranovana ahy,
Mandratra saina, fo, fanahy.

Fa nahoana loatra re,
Nahoana angaha ry Nenibe
No tsy tianao hotantaraina
Nefa hoe namoizana aina ?

Tsy hoe tsy tiako hotantaraina,
Satriko e, ry sombin'ny aina !
Zonareo ny hahalala
Ny nanjo anay tanaty ala.
Tsy hohadinoina na oviana,
Nampitondra fahoriana...

Antsiva, Frantsa 29 martsa 2006

ARAHABA RE RY TANIKO !
26 JONA 1960-26 JONA 2003

Arahaba re ry taniko nahatratra ity Asaramanitra !
Ny fo midoboka hafaliana ka finaritra, salanitra.
Iaraha-miravo anio ny fahaleovantenam-pirenena
Soa ho an'ny taranaka, ambony noho ny volamena.

Arahaba re ry taniko izay efa niaritra ny mafy !
Hahatsiaro izany hatrany irony zanaka aman-jafy.
Ny mazava he miposaka noho ity androm-pahafahana
Efa navalon'ny fotoana raha ny vahohom-panjanahana.

Ny Fahaleovantenam-pirenena manan-kasina, hajaina,
Fanala haizin'ny tantara sy mitondra ny maraina.
He jereo fa mibaliaka ny fanantenan'ny Malagasy
Nahazo ny fahafahana, ka iza indray no hilasilasy ?

Be ny asa mbola miandry ho fanarenam-pirenena.
Mitaky adidy sy andraikitra izany hoe fahaleovantena
Tsy miankin-doha intsony fa efa vonona dia vonona
Hiasa ho fampandrosoana ny fiainam-piaraha-monina.

Fositra tsy mampandroso ny karazan-tandrametaka.
Ny fahaleovantenam-pirenena tsy vitan'ny hetaketaka.
Ny fiaraha-mientan'ny rehetra no hitondra fivoarana
Hirosoana hatrany hatrany amin'ny làlam-pahasambarana.

Arahaba re ry taniko novangian'izato Asaramanitra !
Hirotsaka aminao anie ny andon'ny tany sy ny lanitra !
Dia mba ho lasan'izay ny andro matroka, nanjombona,
Fa hanoakoako kosa ny feon'anjomara sy ny anjombona !

Koa arahaba re ry taniko tsy diso ity Asaramanitra !
Ny fahafahanao anie hamololona, hitondra hanitra
Ho an'izao tontolo izao hanjariany ho fitahiana
Ka hanafaka ihany koa izay mbola anaty fijaliana !

Antsiva, Frantsa, jona 2003

Merci de SIGNER GUESTBOOK (LIVRE D’OR)

Pour de nombreux sujets culturels sur Madagascar RETOUR à

HELI'S MADAGASCAR http://www.helis-madagascar.info

ANTSIVA - VEHIVAVY MALAGASY – MADAGASCAR

Membre Union des Poètes et Ecrivains Malgaches (UPEM) France

Webmestre: Olga HELISOA

ANTSIVA - Vehivavy Malagasy - Femme Malgache - MADAGASCAR Mpitandrina - Mpampianatra sy Mpanoratra - Pasteure - Enseignante et Ecrivain Membre Havatsa-UPEM France - Membre Association des auteurs indépendants

ANTSIVA - Vehivavy Malagasy - Femme Malgache - MADAGASCAR
Mpitandrina - Mpampianatra sy Mpanoratra - Pasteure - Enseignante et Ecrivain Membre Havatsa-UPEM France - Membre Association des auteurs indépendants