ANTSIVA - Vehivavy Malagasy - Femme Malgache - MADAGASCAR
Mpitandrina - Mpampianatra sy Mpanoratra - Pasteure - Enseignante et Ecrivain Membre Havatsa-UPEM France - Membre Association des auteurs indépendants

I Dada sy Neny dia samy hajaina,
Masoandro amam-bolana, tena lalaina,
Angady nananana sy vy nahitana
Toky sy ampinga, fihantahantana.

Toky sy ampinga fihantahantana
'Reo ray aman-dreny, ka satry mazàna
Hitoetra eo anilany amin'ny andro rehetra
Satria ny fiainana toa feno herisetra.

Satria ny fiainana toa feno herisetra
Dia i Dada sy Neny no tiana hitoetra.
Ireo no mpiaro raha misy manjo,
Ny saina mifendro tsy aminy koa.

Ny saina mifendro tsy aminy koa
Ka satriny ihany hizara ny soa,
Milofo, mamelona sady mananatra,
Na dia mavomavo dia tena filamatra.

 Antsiva, mai 2003

I Dada malala no tsarotsaroana
Raha sendra ka tojo fisentosentoana :
Mpitondra hafaliana sy tsiky isan'andro,
Mamao-dranomaso izay mihandrohandro.

Izany izy miverina avy niantsena !...
Mifaly ny fo mamonjy mitsena,
Matoky sy mino ary koa manantena
Fa ny ho be ao an-karona dia mofo sy hena.

Antsiva, avril 2003

Rehefa lasa i Neny ka Izandry mbola kely,
Ny alaheloko azy tsy hita velively.
Jereo izato izy kamboty mahonena,
Tsy afaka hikomy, ny kibo no tonena.

Rehefa lasa i Neny ka Izandry mbola kely,
Ny Zoky no fitaratra sy tokony ho modely.
Ontsa ery mijery an'i Izandry miari-pery !
Nongotana amin'ny tany Ilay Reny mpampahery.

Izandry tena tiana, masoandrom-pifaliana,
Mitondra hery vao, tsy hohadinoina na oviana,
Mandretsika ny tena hitolona tsy hiato,
Hamboly sy hanangana, hanorin-tsangambato.

Rehefa lasa i Neny ka Izandry no jerena,
Mipoaka ny masoandro, mivolom-bolamena.
Ny haizin'ny fiainana manidina, tsy hita...
Hipaika izany ora, ny zandriko ho tafita !

Antsiva, mai 2003

Fa dia azon-dozan'inona
No ataonao tsinontsinona
Ireo sinibe manga roa,
Sa ny loha no efa voa ?

Fa raha ny lakana nitana
No atositosika, dakana,
Mbola handatsa sy hanody,
Sa dia efa tsy mataho-tody ?

Na matanjaka izy na mavozo,
Na hoe koa mangozohozo,
Andrianina ary koa lalaina,
Fa tsy ailikilika sy tevaina.

Malama maina anie ny tany
Koa aza mandrora mitsilany !
Ny ratsy atao toa ranomody
Ka mety hifotitra sy hanody.

Du firmament du souvenir, le voile
Se soulève et voilà que défilent les feux
Du bonheur servant de texture à la toile
Faisant de nous des enfants heureux.

Contre vents et marées, tu ne baissais
Pas les bras. La pente, tu remontais
Malgré les épines qui ne se lassaient
Pas de te décourager, qu'il pleuvait ou ventait.

Je remercie le Ciel de nous t'avoir donnée.
Le soleil brillait partout où tu étais ;
Mais voilà qu'au tournant, la destinée
Nous sépara. Que dire ? Le sort en est jeté.

Malgré ton absence, tu es toujours présente,
Une présence invisible, mais prenante et prégnante.
Ton passage ici-bas, ô regrettée mère aimante,
N'aurait pas été vain mais a laissé des empreintes.

Antsiva, France, 06 juin 2004

Arahaba re ry ray
Nahatratra ity fetinao indray
Andro feno fifaliana
Anoloram-pirariana !

Mangamanga ery ny lanitra
Isika rehetra dia salanitra
Noho ity androm-pitahiana
Fetin'ny raim-pianakaviana.

Koa faly, ravo koa izahay
Noho ity fetinao ry ray
Ka misaotra ny Mpahary,
Mpandahatra, Mpandavorary.

Koa tsodrano no atao
Enga ho ela velona ianao !
Eny, ny fiainanao anie
Mbola hanatombo be dia be !

Antsiva, Melun 15 jona 2003

(La progéniture est douce)

Mamy ny zanaka
Ireo no taranaka
Sombin'ny aina
Ka tena lalaina.

Mamy ny zanaka
Ka na dia efa lanaka
Tsy kivy, tsy ketraka
Noho Ikoto sy Iketaka.

Mamy ny zanaka.
Ireo no taranaka
Ka ampiana sy tohanana
Andaniana koa fananana.

Mamy ny zanaka
Ka na efa lanaka
Dia mbola mitsiky
Sy mivikiviky.

Antsiva, 31 décembre 2003

ANTSIVA, Vehivavy Malagasy – Femme Malgache - Madagascar