ANARSHAHBAZI2007
BU SITE ANAR SHAHBAZI NIN KHUSUSI SITI DIR VA BURDAN SHAKIL VA YA MATLABI UNVANSIZ GOTURMAK DUZ DEYIL
كوسگون حيات
هئي شاعير!
حيات فيكريندهميسن؟
حياتين بوز باغلايان
و كوسگون چاغيندا .
اينانجيمين قاشـ قاباقلي حئيرتيندن
هئچ بيلميرم
« هارادان آسيم
جيريقـ جيريق پالتاريمي »
كيمدي
چوروموش گونش قالاسينا حاكيم ؟
پيسـ ميريتلي بولودلار
قانادسيز قوشلارمي ؟
قوْرخاق
و آخساق ياشاميشام انسان آديندا من
گؤيون قامچيسي آلتيندا
و اؤلومومده موتلولوق تاپميشام.
گئجهـ گوندوز
بؤلمهيهجك اؤزلريني؛
گئجه، گئجهدير
گوندوز ده ائله گوندوز.
بولودلار
أن گوجلو هئيكل
گؤيون شاققيلتيسي تك.
مئشهلر ،
گوجسوز
و چيلپاق آغاجلار تك.
گاه گونش بوْيلانيب
گاهداندا گئجه ؛
و بيز
كؤزهرن حسرتده اوْلساق ،
يئر اوزونده گزيريك علاجسيز
و قبيرسيز
سوْلغون چيچك تك.
بو دوستاغين قيفيللاري جوجهرهجك
جوجهرهجك
جوجهرهجكمي ؟
قيفيللارينين دئشيگي
توتولاجاق
توتولاجاق
توتولاجاقمي ؟
يابانجيليق غضبيله ياشاياقمي ؟
اوچوش ذيروهسينده اوْخويان بير قوش يوخ.
گيزلي اورهك
دئييرسن :
سئودانين آيريميندا
ماوي گؤيله دنيزين
قارينـ قارين اوْتوروشونا باخ!
بيليرسن :
منده دنيزين قدرتي يوخ
سوْيوق مئشهنين اوزونه چيرپام.
گؤيون گئنيشليگي يوخ
ايليق اورهييمي ايسينديرم.
اللريمده
بوْشلوق توْمورجوغو
ديليمده :
يالنيزليق نغمهسيندن باشقا
تحفهم يوخ.
اورهييمي گيزلتميشم
و سئوگيلريم
سارماشيق كيمي
ساريليبدير اورهييمه.
كسديم سئودانين باشيني
كسديم سئودانين باشيني
أن غريب يوْلچو اوْلدوغونا گؤره ؛
بيرداها چكمهسين
گونشين قاپالي دوْداغينين داديني.
پنجرهلر دهييشديلر
سيرـ صيفتيني ؛
بوْغازلارينا داش دهيهرك.
و من
سئوينجيمي ياتيرميشام
دووارلارين كؤلگهسينده .
و حاييفيملا پوفلهييرم
حياتيمين لؤهمهسينه .
نفسلريمي يازماق ايستهسم
آتاـ آنامين سيجيلليسينه
بارماقلارينين ايزي يوخ اوْنلارين .
اللرين اورهييمده ترپهنير
يوخوسوزلوقدان
يوْرغونلوقدان
پوْزغونلوقدان مي
اسنهييرسن؟
دوشونمورم.
چوْخدور سنين كؤنولداشين .
اللريني قوْيما اورهيينين باشينا ؛
اللرين ،
اورهييمده ترپهنير
گؤزلرين ،
يوخومدا قيشقيرير.
اورهييني سيخما
كي يئرلهشيم
اورهيينين ووقاريندا.
آخيرام من
حياتين آخيميلا
آخاـ آخا،
ايچين ـ ايچين.
كؤنلوم أييلير بنؤوشه تك،
اورهييم سيخيلير ،
سيخيلديقجا كيچيليرم.
اوْ قدهر كيچيليرم
قاريشقالار دا اؤتور باشيمين اوستوندن.
او قدهر كيچيليرم
ووقاريمين دا باشي أييلير.
گئجهلر توكنمير؛
آلنيم ايسه
بايقوشون يوواسيدير.
اللرين سه
اورهييمده ترپهنير.
گؤزلرين ،
يوخومدا قيشقيرير.
قانلي شرقي
دوزلاق دويغولاريني
دهمير آياقلار تاپداياندا
سازاقلار
يازاجاقدير مينايلليك كدهريني
يارپاقلارين ساچينا.
بو توْزلو مئشهنين آراسيندا
چوروموش آغاجلار
دنيزدن دانيشيرلار
دنيزين ووقاريندان ،
دالغاسيندان ،
گئنيشليگيندن،
و يئل ،
قانلي بوْغازيلا
قانلي شرقي اوْخويور
آغاجلارين جسدينه.
گبه اللرين سنين
ياغمورسوز گوندوزلرده پؤهرهليردي ؛
و اورهييمين وورغوسونو
دوشونولمز وورغويا چئويريردي.
دوزلاق دويغولاريملا آغلاياجاغام
گئجه اوْغروسو
ووقاريني آپارسادا،
رؤيالارينين سومويونو
ابليسين گؤرونمز اللري
قويلاسادا ،
سازاقلار
سؤيلهيهجك نجابتيني ؛
سازاقلار
يازاجاقدير مينايلليك كدهريني
يارپاقلارين ساچينا .
چنلي ثانيهلر
ياشيل يئللرين سيغاليني
دوياندا يالنيزليغيمدا ؛
ايچيمين آلاقلارينين سسيني ائشيديرم :
آغيز آچيبدير
گؤيون پنجرهسينه.
نئجه باخيم
چايين قيوريمينا
ـ شلالهيه يئتن زامان ـ
لحظهلريمين قوْخوسو
ايزلريمي يالاياندا .
اولدوزلارين قاشـ گؤز آتماسي
آلدادير مني .
چنلي ثانيهلرين
سيمفونياسينين وورغوسوندان
چيخماق اولارمي هئچ ؟
من
بو گيج يارپاقلاري
توْپلاياناجاق ،
دومانلي يئللر
هاميسيني اوْغورلاياجاق.
ياشيل تپهنين ساچلاريني
هؤرهن زامان
كئچيدسيز درهلره هوْپاجاغام.
من
و بو بيچيمسيز پارلاق گوزگوم
گئجهنين قارنيندا
پاس باغلاياجاغيق .
اليميز اوستـ اوسته
هادي قاراچاي اوچون
گَل
اوزداق اليميزي تاريخه دوْغرو
يئره گيرسين اوتانديغيندان باري.
اليم ، اللرين كيمي ،
اورهييم، اورهيين كيمي قابارـ قابار.
اليميز اوستـ اوسته
تاريخي ديكلتدي بئله ؛
دويغوموز ،
دويغوسوزلاري
ياشاتدي بئله .
اليمده ايز سالان حسرتيمه باخ!
ديشيمده بوْغولان هاراييما باخ!
گؤزلرينده ايزلهنن حسرته بنزهر.
قوللاريني سنده آچ!
آغريلاريميزلا ياشاياق.
اورهييني سنده آچ!
درديميزين سوفرهسينه ياياق ؛
بوْيلاناق اوجـ بوجاقدان
مامير كيمي ،
قابارـ قاباردير اورهييم
اورهيين كيمي .
گَل چورومهسين ـ دئيه
دوز ايچينده ساخلاياق
عؤمروموزون شيرين أتيني .
اللريم بومـ بوْش بئكار
گزير تيترهك گؤزلريم
ايتميش اوشاق تك.
آياقلاريملا أزيرم
حياتيمين قوپـ قورو داماريني.
گزيرم يالقيزليغيمدا بو شهههري
بلكه اؤلمهيم بير تهههري.
قان دامير خياوانا .
اؤلوشگهيير آياغيم،
دوداقلاريمدا گولوش دوْنوب ،
اللريم:
بومـ بوش بئكار.
چيگنيمده:
حسرت دوْلو توربا،
يادا كي :
بورنومدا نوْخدا ؛
سحر تئزدن آخشامادك
سوموكلريمي شاققيلداديرام.
آياق اوسته گزيرم :
بير بؤلوك آدام
بير نفرين باشينا ييغيشيب .
اوتانيرام ياخينلاشام.
هوْپدورورام هئيكليمي بير بوجاغا،
بلكه گؤيدن ياغيش ياغا !!!
نسيمينين سون قاني
« باريشماز» اوچون
ائهئي شاعير!
سؤيله،
سؤيله،
سؤيلهمي
نئجهگولهجك« هرزامان ضحاكه دؤران؟ »
ايندي منم
نسيمينين سوْن قانينين آخيميندا
باتاقليغا تؤكولن.
بوْغازيمين بارماغيندا
قورويوبدو قان لكهلري.
دهريمين پنجرهسيندن
مرميلر بوْيلانير.
كرپيجلرين آلتيندان دويورام آلقانيمين سسيني.
ائهئي شاعير!
سؤيله،
سؤيله،
سؤيلهمي
نئجه گولهجك هر زامان ضحاكه دؤران؟
ايندي منم
ناغيللار زامانيندان گلن
سورگون بير آغاج.
زامانين نفسينده
سن بير اؤسگورتو
من بير اؤسگورتو.
خاطيرهلر
ياتميش حئيرتلري اوياتماقدير آنجاق.
بورنومدا نوْخدا
آغزيمدا اوشاق كيمي امزيك،
اوزهرليك توستوسيله
بوْغولان من.
كوره لرده نفسلريم بيشهن زامان
سؤيله
سؤيله
سؤيلهمي
نئجه گولهجك هر زامان ضحاكه دؤران؟
هارايا گئدير بو حيات؟
هارايا گئدير گؤرهسن
بو دورومدا
بو حيات ؟
قوْروماقلا دا اوْلمور
سئوداني ياشاماق.
اوزانير يالاقليق
ايلغيملي نرديوانلا.
ديمديكلهيير قوشلار
دايغالارين ايزيني.
گونش :
بير سيلديريم قايا،
آرخاسيندا
سيرا دوران گؤيرتيلر
اؤلوملوـ ديريملي يوخولاردا
بلكهده.
هر آدديمدا سانكي
ايللرين قوْخوموش ايزي وار ؛
بو ايزلرده :
قوْخوموش اللر ،
چوروموش ديللر.
بو ديللرده :
بوْغولموش حيات.
بو دورومدا بو حياتين :
« ساغ اولسون ،
صداسي گلسين. »
بو بير سئوينج،
بو بير نيسگيل،
هارايا گئدير گؤرهسن
بو دورومدا بو حيات؟
نه دنيزده بير سئوينج،
نه داملا دا بير آرزو .
سسسيزـ سميرسيز هيچقيرتيدير
بو حيات .
ببكلرينده ايزقوْيان
بو باخيشلارين توْزوندا ،
هارايا گئدير گؤرهسن
بو حيات ،
بو دورومدا ؟
توْزلو آياغيم
ايستهييرسن
باخيشيمين پاسلي آياغيني
سارماشيقلي اتهيينه سريم!
گؤزلرينين اؤنونده
باشماق تاخسام آياغيما
داباني جيريق
و موردار قوْخولودور.
باشماقسيز دوْلانسام
ايز سالاجاق گؤزلرينه
تؤزلو آياغيم.
قوْي ديرچلسين اورهييم سنينله.
دنيزله ساحيلي قوْووشدوران
دالغالاردير.
سينيق قاناديمدان دوت،
سينيق قاناديندان دوتوم.
دالغالاردير
دنيزله ساحيلي قوْووشدوران .
ايستهميرم
ايستهميرم
دووارلارا سووانسين
يامـ ياشيل خوْل ـ بوداغين.
گؤزلريمين يوموشاق اوزانماسينا باخ
اينانميرسان ايهر.
جاساراتسيز بولودلار
يوللارين قيقاجي باخيشيندا
سوْرغوـ سؤال گؤرونور
آغاجلارين نسليني آلدادان
حياتين آخيميندان
ياغيشين چورومهسيندن
دانيشير هامي ؛
بولودلار
جاساراتسيز آنجاق.
يئللر
آغلاييردي اؤلن يارپاقلارا .
گئجهلر
اودوردو كؤلگهلري ؛
و كؤلگهلر
يئنيلشمهدن كؤهنهليردي.
گئجه گئدير
گئجه گئدير
دالغالارين اوْوجوندا ياشايان بيز.
اورهييميز
گؤيرمك هوهسينده
گؤيرمهيينسه باشي كسيليب.
□□□
اوزون بير يوْل اولدوق ائي
!
ديلنچي يوْلچولارا .
ديلكلريني
شنلهديك شئهلي دويغولاريميزلا.
يوخولاريني چؤله آتديق
قفسلرينين دئشيگيندن
حياتي دويماق اوچون.
و أريتديك بوزلاق گئجه لريني
فانيسلارين ايشيغيلا ؛
و ايشيق ساچديق
قورقوشوملو گؤزلرينه.
سسيميزين گولوشو
بوْغونتو توْزونو سيلدي
دوزلاق دوداقلاريندان.
اورهيميز ،
الـ آياغيميز ،
و ديليميز
نفس چكمهيي اؤيرهتدي .
و ايندي
نفس چكمك حسرتيندهدير
اورهييميز ،
الـ آياغيميز،
و ديليميز.
بوْمبا قو سانلار
اورهيي قالخان
بوْمبا قوسور بشريته .
ايت توكوندن ايرهنن
چيمخيرير بشريته .
تيرـ تير اسير بوْمبادان يئر اوزو ؛
سالاميندا دا وار
گولـلهلرين دوروملو سسي .
سن دئينده كي :
ـ بيزده قارانليق يوخ
قاراجاسيز بوغدادير هاوا ـ
ديسكينديم بير آز ياوا.
گؤرورسن كي
يومور قارانليغا گؤزلريني اولدوزلار دا.
بؤلونور آيين ايشيغي
بؤلومـ بؤلوم
قوْرخوسوندان .
هاردا وار انسان اوغلو
ساواش وار
اؤلوم وار.
ساواشيني قورتارماقلا
كلمهلري قوجاقلار :
ـ « ديلسيزديلر بونلار ديلسيز
يارديم ائتمك گرهك
اومانيتار.
يئر اوزونون اولدوزودور
ابديتين گوزگوسودور
يارديم ائتمك گرهك
اومانيتار.» ـ
بير طرفدن بوْمبا قوسان
بير طرفدن يارديم ائدير.
هاردا وار انسان اوغلو
ساواش وار
اؤلوم وار.
اورهيي قالخان
بوْمبا قوسور بشريته.
يارانيبدي گؤزلر :
اؤپولمهيه.
اللر سه :
ايشلهمهيه .
و دوشونجهلر
يوْرغونلوغو ديشلهمهيه.
گؤزلرين سه سنين
بوْمبا كارخاناسيدير
اللرينده وار اوْد قيغيلجيمي.
دوشونجهن ايسه
گئتـ گللر خياواني.
گؤز دوْيورسا
كؤنول دوْيمور.
و قوربان اولور انسان اوغلو انسان
بو گؤزون تاماهينا ،
بو كؤنولون
گولومسهين هيككهسينه .
قوْللاريمي آچين منيم
قوْللاريمي آچين منيم
ديشلريم كينيتليسه، يوخ.
آياقلاريمي سينديرين منيم
قاسيرغالار بوينوزوندا اؤلن
سسيم واي !
قارـ قيروولار قولاغيندا دوْنان
اليم واي !
كولومده چيميرم
بير سوْنا كيمي.
كؤنلومده اؤلورم
بير اوشاق كيمي.
آچيلمايان كيپريگيمدن
قوْرخماغيم
نهيه گرهك؟
دوْغولمايان اينانجيمدان
اينجيمهييم
نهيه گرهك ؟
نهدير گؤرهن بونلار :
ـ « سورونمك گرهك
ديزين ـ ديزين
كؤلگهلرله .
سونماق گرهك
ايچيم ـ ايچيم
بو دونيانين وارليغيندان »
□□□
قوْللاريمي آچين منيم
آياغيمي ايزلهيين
كؤيدن ـ كؤيه ،
: « گزهجهيم
بير ائل بوْيدا
ديزين ـ ديزين.
اؤله جهيم
يوْللار قدهر
ايزين ـ ايزين.»
قوْللاريمي آچين
و آياغيمي ايزلهيين
ـ دئيه،
ديله توتورام هاميني .
تووْخان دورجاغام
دوْداغينين گولوشونده
اؤلسم ايهر،
يونگولهييب ،
گزهجهيم
سويون اوزونده
بير تيخاج كيمي.
آنلاريمي ديرچلدهرم
سؤيودلرين اوزونلوغوندا
بير آنا كيمي.
كپنك اوْلوب
قوْنارام
چلنگلرين اوستونه.
آغارتميشام اورهييمي تئلمه ـ تئلمه
عؤمرومون قاسناغيندا
دوْغرودان دا .
كيمدير
حسرتسيز ياشايان بو دونيادا
دوْغرودان دا ؟
آنيرام كي :
دوْداغينين گولوشونده
اؤلسم ايهر
آشيق آتيب
تووْخان دوراجاغام
دوْداغيمين بو گولوشونده.
آيلا سوْلان گوندوزهم
گونشله آچان
آيلا سوْلان گوندوزهم.
بو گوندوزون اورهيينده
قارالان لكهيم.
بو گوندوزون ساچيندا
آغاران دهنم.
ديمديگينده
قيزاران ديلهيم.
و گؤودهسينده
قانادلانان حياتام.
بو گوندوزو گؤزهتلهين بير گؤزهم.
گونشله آچان
آيلا سوْلان گوندوزهم.
آيريليغي سئوسئيديم
آيريليغي سئوسئيديم ايهر
چاي آخاري بويدا يوخ
دنيز بويدا
بير كيتاب يازارديم
سئودا بيچيمينده.
و آجييارديم
بوتون آيريليقلارا.
آغزيمدا گؤوشهنن
آيريليغين ديمديگي.
ديليمده آجييان
آيريليغين
آجـ يالاواج أتيدير.
ائله،
حسرتينده قينانان دا
آيريليغين بوْينو بوكوك قاتيدير.
گؤينهييرم آنجاق يئنهده
يادداشيمدا ياشاياندا.
آغيرليغيم ـ بوغورلوغوم
قونشو اولموشام خياليملا من
گاه كدردي دارتان اورهييمي،
گاهدان دا حسرت.
بير گولوش بوْيدا توْنقال آراييرام،
خياليمين قوْرونا گولهم :
آغيرليغيم
بوغورلوغومو
هوْپدورام.
دونيانين حشيهسي
اؤتوروك آنلاريميزلا
الده اؤتن تابيتلارتك.
نه بير كولك وييلديسي،
نه ده
گوزگولرين پاخيرسيزليغي گؤرونور.
يازيليريق
أيري ـ دوزگون جيزيقلارلا
بو دونيانين حشيهسينه .
بو لانيق سو
سو گؤزوندن بولانيقدير هلهم.
دومـ دورو سو تاپماغا
گؤزلريني
گوزگو ائت!
باخيشلاريني آخارليق.
دونياميزي دورولتماغا
اؤزلوگونو سيلكهله
قلبيرـ قلبير
ويجدان اَله.
سو،
گؤزوندن بولانيقدير هله .
دنيزين آداخليسي
گونشه آداخلانان ،
اورهييمين باخيشيدير.
گونشدن آسيلان
سئودا پاييم.
بولودلارين سالخيملاري
كيپريگيمدن آسيليب.
دنيز آداخليسيدير بولود ؛
گونشي ايچير
ايچيم ـ ايچيم .
آرزولاريمين لؤهمهسي
كدهريمين يئريشيني
سولارين زومزومه سيله ايزلهييرم
گوموش سيرغالاريمي
آسميشام اورهييمين قولاغيندان.
باخيشلاريمي
ديكميشم بارماقسيز اللريمه.
دهليـ چيلغين آياغيما ،
و قابارلي اورهييمه كي
جوجهرير ياواشـ ياواش قابارلاري.
باش ساغليغي دئييرم بوتون قانبيرلريمه :
ايندي منم
اومودسوز ،
حياتسيز بير انسان
گولوشلريم
ديشلريمين قاتيندا چورويور
آياقلاريمين ايزي
موردار جسد قوْخوسو وئرير.
ديلكلريم
اؤزومدن ده پيس لؤهمهلره باتميش.
من
آرزولاريمين لؤهمهسينده ياشاييرام.
قيزيل اوْد
عزاليدير يئل
اؤز سسينين اؤلوموندن .
آمما قاپـ قارا قارغالار
قوْنوبدور آسلانين باش تاجينا ؛
و سوْنسوز حكمدارليغيندان دانيشير.
دومـ دورو سولار
اوْولانميش قوشلارين قانيلا بوْيانيب.
قيزيل قانلا
سوواريليب توْرپاق ،
و يئركورهسي
قيزيل توْرپاقلا ،
قيزيل چمنله دوْلوب .
آمما « آلقانليق ،
آلقانليقدير « ـ دئييبلر.
تكجه بير كيربيت يانديرسان
قيزيل اوْد قالخاجاق
بو قيزيل قاندان.
ببكلريندن اوچارام
گؤزلرينين
قوْنور رنگلي بهبهيينده
عؤمرومون سوْناسي چيمير.
مني اونوتسان ايهر
ببكلريندن اوچارام
گئرييه باخمادان.
اؤدهمهديم
و من
قارا پول قدهر ده
اؤدهمهديم
جمدهيينه يئرلشمهين جيرتقوزلاري ؛
و تؤوشودوم
توْيوغونا كيش دئينده
ساققيزلاريني ديديشديرهنلره.
باشيمدان قالخان دومانلاري
ياتيمينا داراياجاغام.
تؤرـ تؤكونتو بوغازلاريني
توپورهجهيم
توپورجك قدهر
قاشـ قاباقلي سانباللارينا.
توْپوغوندا غورور وارسا
سورونهجك آياغيملا بيرگه.
توْخونولماز بير قيز كيميدير
آلاـ توْرانلي غوروروم :
دوْغودان ديرچهلير
ـ آغزيندا ميزراق ،
بئلينده ياشاماق ،
و ديلينده:
تام باشقا بير ديلده
لهجه ايله دانيشان توْرپاق.
دالاغيم سانجان كيمي اولدو ؛
و
آغيز دوْلوسو بير يوخوسوزلوق پوفلهديم.
□□□
اولاشديلار، اولاشديلار
ياللاريني كسميش ايتلر كيمي،
بولاشديلار،
بولاشديلار
سوپورولمهميش بير ائو كيمي.
اوزولدو بو دالاشقانليق
دالغيجليفلا ؛
و من
اللريمي
دنيز ديبينده بيتميش
بير مامير كيمي اكديم
و اكديم.
دامارلانديم باغيرتيلاريملا من
اورهييمه دامدي كي :
اوزو قارا اوْلاجاق
جمدهيينه يئرلشمهين
جيرتقوْزلار دا بئله.
بوينو بوروق بير يارپاغام هلهم
بير داش اولوب
ساپاند ايچينده گزيرم .
بوينو بوروق بير يارپاغام هلهم.
هارادان آسيلماغيم
ياشامين خوْلـ بوداغيندان
هارايا دوشهجهييم
بو قوْمرال يئرين اوْوجوندان آسيلي.
بير نوْخدا اوْلوب
آسيلميشام
بو آغاجين بورنوندان هلهم.
دارتيليرام
گاه سوْلا
گاهدان دا ساغا.
كولكلرين ديشلرينده چينهنيب
سريلهجهيم يئر اوزونه
أتك كيمي.
نه سوْلومدا اؤتكمليك،
نه ساغيمدا بير هاراي ؛
بير داش اولوب
ساپاند ايچينده گزيرم هلهم.
گئتدييم بو يوْلدا
قيوريليب دهيهجهيم
اركؤيونلو بير گؤزه
اركؤيونلو بير گونده.
بوينو بوروق
بير يارپاغام هلهم.
ياغيش وورموش آدام كيمي
سوْخولموشام چارداقلارا ؛
آياغيمين آلتينا ياييلير اؤدوم.
باشيمين اوستونده
دهلي ـ قانلي ياغمور.
بير دهمير اولوب
پاخيرلاميشام هلهم.
بوينو بوروق بير يارپاغام هلهم.
ياسالاردا ياشانماميش حيات
« ناظيم حكمت»ين نيسگيللي ياشاييشي اوچون
و من
قاريشـ قاريش داماريمدا
هپ سسيني دويورام.
« بورسا » دوستاغينين جيزيغيندان
حياتين اللرين اؤپمك ؛
ياسالار
حبس ائلهمكله ياشاماقدا ،
دوْغرودان دا .
آه كي حيات
نه ساياق كي اؤتمور.
بير طرفده اوزـ اوزه باخيب گولنلر ؛
بير طرفده
آجليق گونلري كئچيرهنلر
و عؤمروندن اوزون دوستاغيني ياشايانلار.
اؤلولر :
حياتدا دوستاقدا
اوجـ بوجاقسيز دوزلاقدا .
و سن
كولكلرين ديلينده ؛
دويورام ديرچهليشي اوندا من .
سن گلنده
يئل ده كوكرهمير.
و زامان
سيلـ سوپور ائدير كئچميشيني،
ايرهلي گئدير دابانـ قيرما.
اويخولار پاييز كيمي سوْلور ،
دويورام ديرچهليشي اوْندا من.
سن گلنده،
يئل ده كوكرهمير.
سن كي يوْخسان
پوْزغونلوغو اؤيهسن!
سؤزلريني
قيرمانج ائديب دؤيهسن.
بورادا ايشيق يوخ
و قارانليق
اوجـ بوجاقسيز دوزلاق.
دايانديرين ياغيشي
سوكوتو دا يوماسين.
بورادان باغيرتي اؤتور.
دايانديرين كؤلهليگي
بورادان حيات اؤتور.
قوشلار دا اوْخويور :
« باغير،
باغير ،
باغيريوروم
قوشون قورشون اريتمهغه چاغيريوروم.»
بو سؤزلر :
گولر اوزلر ،
بير كولك تك كوكرهر :
« داغلارلا دالغالارلا ، داغ گيبي دالغالارلا،
دالغا گيبي داغـ لارـ لا»
و من
قاريش ـ قاريش داماريمدا
عؤموردن اوزون بير دوستاق
و ياسالاردا
ياشانماميش بير حيات دويدوم.
بارماقلار
بارماقلارين
اوْددا جيلالانميش
قيلينجدير سانكي.
پارچالايير
پارچاـ پارچا
گووهنديگيم ارليگيمي.
ديدير
ديديم ـ ديديم
ترپنديگيم يئرينده اوزونو.
اؤتدويوم يوْللاري دا قازير
بو بارماقلار.
□□□
كؤنلوم آزير
بير ييرتيجي قورد اولور.
بير ايتي بارماغا دؤنور
سنه بنزهر.
بارماق اولوب
خينجير بوتون ارليكلري
خينجيم ـ خينجيم
اوْددا جيلالانميش قيلينج كيمي.
اوتاندين
اولدوز چيخماقلا
تاپديم سني
بير چييه لهيين كؤلگهسينده .
گؤزوم ،
گؤزونه ساتاشدي.
اوتاندين
باشيني سالدين آشاغي
چييهلك ساياغي .
ناخيشلار
يوخولاري اوياديريق
و لامپا چكيريك
قارانليغين پردهسينه.
بئله بير سينيقـ سالخاق
ياريمچيق ناخيشلار ؛
بولودلارين
ماويليكده
اويناماسيدير دئمك.
قارانليغي ايتيرمكله
قارانليغي بيتيرمك ،
يوخولاري اوْياتماقلا
يوخولارا اويوماق.
ناخيشلار اوياقدير دئمك.
ناخيشلارين ناخيشيني چكيريكسه،
كولكلرين هيككه سيله
پوزولوروق دئمك.
چابالايير آياغيميز
لؤهمهلرين دهرينليگينده.
اوْياناركن يوخودان
سانكي حياتين هاواسي
سسلنمهيهجك هئچ واخ.
سريلير قوْجا انسان
اؤلوم دووارينين آراسينا.
تكجه قوردلارين اولاماسي
ائشيديلير
سوْيوق مئشهده.
قارلي كولك
وولكانين آغزيني توتموش ؛
گونش آنجاق
باهار كيمي قورخودور قيشي
سحرلر يوخودان اوْياناندا
زويويور آياغيم
بوزلارين اوستونده.
بولودلار
كؤلگه ساليبدير يئره.
قارلا اؤرتولموش يئره باخما!
گونش
باهاركيمي قوْرخودور قيشي.
اينان
باهار كيمي قوْرخودور قيشي.
ايندي
اورهييمين قوجا چاغيدير.
قوْيون راحاتجا ياتيم.
قيچلاريمي اوزاديم.
بير كيمسه آلماسين قارشيمي منيم
اورهييمين قوجا چاغيندا .
اولسايدي آرزودان بير پاييم منيم،
مين آرزويا بؤلرديم اونو.
بير پاي ايستهرم
ـ كيچيك بير پاي ـ
بو حياتين سئوينجيندن
اورهييمين قوْجا چاغيندا .
اؤلوملو يوروش
دئديلر :
گئت ايرهلي !
آنلامسيز گئديشله گئتديك
و آلدانديق
بو حياتين جنت آديندا درهسينه.
نه بير ايچيم ايچگي.
و نهده گوللرين قوخوسو وار اوردا .
آلدانديق بير ايچيمليك حياتا.
و ايندي
يات بير يوْللوق
اورهيينين دويغوسونو دويمادان.
دؤيوش رسيملري چكير
ـ جانيمدان ايراق ـ
آلداديجي رسام ،
و اؤلوم تويو توتور انسانلارا .
دوْغولدوغو گوندن
اؤلوبدور ائلهبيل كي انسان.
گئت ايرهلي آنلامسيز گئديشله.
گؤيون شاققيلديسيني
قايالارين اوچماغيني دويمادان ،
واز كئچديك بو حياتين شن دؤيوشوندن
و اؤلوم زورناسيلا
اؤلومه دوْغرو گئتديك.
بو دؤيوش تانريلاري
بوراخماياجاق بيزلري
بودور انسانين طالعي.
قان ،
قان ،
قاندير دالغالارين ساپينا دوزولن.
هايدي ، هايدي.
ايرهلي گئت
آنلامسيز گئديشله ،
و گئري قاييتمادان.
گئت ايرهلي
اؤلوملو اؤلومه دوْغرو.
اؤلوم شرقيسي ايله قوتارير
اؤلوم سيمفونياسي
و آل قان ايله سوْنا چاتير
بو حياتين سوْن ناخيشي.
انسانليق هارايي
هئي
!
انسانليغين هايـ هارايي
گؤزون گؤرمور
دونيا قدهر خوْرتلايان
مينبير حياتي ؟
ايچين دويمور
حسرتين قوْخوسوندان دا آجي
اؤزگه بير كؤينهگي ؟
ديلين دينمير ديلسيزليگيمه.
سسين گلمير سسسيزليگيمه.
بير سادهجه ماهني تك
مني دينله .
قوْخوموش بير لئشم
مني اييله .
مني ديندير
بير ديلسيز ايت بالاسي تك .
داغلارين اتهييندن قوْپان فيرتينا منم ؛
تاريخين انگينده
چئينهنن ده من .
اوْتلار كيمي ياشيلليغام.
آنجاق
اليم اسنه يير ،
ديليم دينمهيير
گؤزوم گؤرمهيير
كئچمه بير آه كيمي كانداريمدان .
مني دوي !
مني حيس ائت ائي
. !
انسانليغين هايـ هارايي
هئچ اولماسا
تولا نسليندن اوْلان حئيوانليغيما گؤره.
كدر
بوزولمكله بير بوجاغا
كدر بوْيدا بير قايا
ديرچهلير قارشيندا ؛
نه كؤلگهسينده سرينليك
و نهده
گونشينده ايسينتي وار.
گون كئچيريريك يالانـ گئرچك
أن دويغولو دويغولارلا،
اورهييميزين شعرينده.
سئودامين آخشامي
دويموشام ايچيمي قالميشام مات، مات
منم بوْشلوغومدا ياشايان قات ـ قات
قوْلومو گؤزلهين بوخوومو ، حيات ؟
قلبيم !
قازانديغين اينامين خئيير.
قوْروقلو يئر كيمي چكيلسه چپر
اوجقاردا حياتيم قوزو تك مهلر
گزيرم قلبلري باغريمدا كدر
سئودامين ايستهيي ،
آخشامين خئيير.
ترسينه كوكرهين ترس يئلي كيمي
گؤزلريم ،
قيزاران قان سئلي كيمي
كدردن كؤكلهنن ساز تئلي كيمي
داماريمدا جوشان موغامين خئيير.
داماريمدا آخان قانديمي گويا
خياليمدا چيمن ايستكلي رؤيا
آخشام چنهسيندن ياپيشان آيا
سؤيله !
بو عيبهجر مقامين خئيير.
ساتيلميش كؤنول
قارانليق گئجهده ،
قانلي حياتدا ،
باختيمين اولدوزو باتميش كيميدير.
حيات آلـ وئرينده بير اوْووج دن تك
كؤنلومون ووقاري
ساتميش كيميدير.
ايلان تك ازيرم كؤنلومون باشين
اليمده ياشاييم گؤزومون ياشين
نئجه دوزهلديممي حياتين قاشين؟
باشيندان بؤركونو آتميش كيميدير.
هارا سورگون اولدو سيلديريم داغلار
حياتين اؤزو تك چايلار دا آغلار
گؤزهلليك باغيندا ،
گون گؤزلو چاغلار
يوخولو دؤوشان تك
ياتميش كيميدير.
داغلارا چؤكوبدور لايبا لاي بولود
دوزلردن ،
كرواني
گونشسيز كئچيرت .
بو يئلين آرديمي ياغيشسا
اونوت .
گؤيده كي ايلديريم باتميش كيميدير.
ياشاييممي سني
اؤلوممو سني ؟
يوردسيز حياتيمدا
بؤلوممو سني ؟
حسرتيم ،
حياتيم ،
گولوممو سني
كوسگون طالعيمه قاتميش كيميدير.
تاپدايير يوخومو گؤزلرين سنين
قبريمه كؤچوروم قيوريلماغيمي
تاپدايير يوخومو گؤزلرين سنين
قينجيمـ قينجيم بئله حيات سورمك تك
يانديرير كؤزومو كؤزلرين سنين.
هرلحظهم دومانا چئوريلن چاغدا
دولاشير حسرتين ديلدهـ دوداقدا
ايچيمي هؤنكورتو بيشيرهن چاغدا
سوكوتو كؤچورور سؤزلرين سنين.
دويونلهنير كدر ايلگگلريمده
يانيرام يانيقلي يئريكلريمده
سيخيليب قالميشام دئديكلريمده
قيريشير آلنيمدا ديزلرين سنين .
قيشقيرين ايچيمدن او سؤزلر منيم
الهنين عؤمرومدن او كؤزلر منيم
كئچين گوناهيمدان او گؤزلر منيم
تاپدايير يوخومو گؤزلرين سنين .
اؤله بيلميرم
گزيرم شهري اليم جيبيمده
« يا ياشات!
يا اؤلدور» آللاهيم مني
زهيملي گؤزلرله قاخينج اوْلورام
يا يئندير يا قالدير آللاهيم مني.
گيزلهنيرم ائوده اوتانديغيمدا
سومسونور قلبيمده اؤگئي بير كدر
زنجيرسيز قيسيليب دوستاق اولموشام
چرلتدي روحومو قومسال كئچيدلر
بو چرخين تئلينده فيرلانيرام من
ياشايا بيلميرم
اؤله بيلميرم ،
حياتين گؤزوندن كدر توْزونو
گؤيون پردهسيله،
سيله بيلميرم.
فيرلات بوينوزوندا ،
فيرلات مني سن
منيمده هراييم اؤتر كؤكسومدن
آدديميم كؤهنهليب ناز ائدير هلهم
بيرگون دوْغاناقدان كئچهجك اؤركن .
ناغيللار
بوْيلان اؤتموش گونوم، آرخامجا بوْيلان
حيات قاپيسيندا ناغيللار ياتيب
قيوريليب ياشاياق قانادا ـ قانادا
حيات قاپيسيندا ناغيللار ياتيب.
قابارير اوزومه قارشيدا كي يوْل
دونيايا بوْيلانيب باخما، سن يومول!
جيغيرلاردا ايتهن ساپاقلي ائي خوْل
حيات قاپيسيندا ناغيللار ياتيب.
ناغيللار قودورور قودوز قورد كيمي
پوسگورور آغزيندان اود قيغيلجيمي
ييخا بيلرسنمي گؤر بو طيلسيمي
حيات قاپيسيندا ناغيللار ياتيب.
گون كئچيرمك اولمور، آدام قورويور
قارا ساچلاريمي كدردير، هؤرور
يارالي قوش كيمي چيرپينير، عؤمور
حيات قاپيسيندا ناغيللار ياتيب.
سنسيز
سسينله ياشارام باهاريم سنين
اينانيممي بيرگون سن گلهجكسن؟
گؤزومو ديكميشم تؤزلو يوْللارا
توْزلاري آراييب يوكسهلهجكسن.
گؤزلريم تامارزي ،
اورهييم ايسه ،
ديسكينير قاپيمي دؤينده باخيش
قاچيرام اوشاق تك